ದಾವಣಗೆರೆ: ಜಿಲ್ಲೆಯಲ್ಲಿ ಮನೆಮಾಡಿದ ರಂಜಾನ್‌ ಸಂಭ್ರಮ

ದಾವಣಗೆರೆ: ನಗರವೂ ಸೇರಿದಂತೆ ಜಿಲ್ಲೆಯಲ್ಲಿ ‘ಪವಿತ್ರ ರಂಜಾನ್‌’ ಹಬ್ಬದ ಸಂಭ್ರಮ ಮನೆಮಾಡಿದೆ. ಮುಸ್ಲಿಮರು ಮಾರ್ಚ್‌ 12ರಿಂದ ಉಪವಾಸ ಆಚರಿಸುತ್ತಿದ್ದು, ಚಂದ್ರ ಕಂಡ ಮರು ದಿನವೇ (ಏಪ್ರಿಲ್‌ 11 ಇಲ್ಲವೇ 12ರಂದು) ‘ಈದ್‌ ಉಲ್‌ ಫಿತರ್‌’ ಆಚರಿಸಲು ಸಕಲ ಸಿದ್ಧತೆ ನಡೆಸಿದ್ದಾರೆ.

ಮುಸ್ಲಿಮರು ರಂಜಾನ್‌ ಉಪವಾಸವನ್ನು ಅತ್ಯಂತ ಶ್ರದ್ಧೆ ಹಾಗೂ ಕಟ್ಟುನಿಟ್ಟಿನಿಂದ ಪಾಲಿಸುತ್ತಿದ್ದಾರೆ. ಬೆಳಿಗ್ಗೆ 5 ಗಂಟೆಯೊಳಗೆ ಊಟ ಸೇವಿಸಿದರೆ, ಸಂಜೆ 6.43ರ ಬಳಿಕವೇ ಊಟ ಮಾಡುವುದು. ಸೂರ್ಯಾಸ್ತ ಹಾಗೂ ಸೂರ್ಯೋದಯದ ಸಮಯದಲ್ಲಿ ಕೊಂಚ ವ್ಯತ್ಯಾಸ ಆಗುವುದರಿಂದ ಸಹರಿ ಹಾಗೂ ಇಫ್ತಾರ್‌ನ ಸಮಯದಲ್ಲೂ ಸ್ವಲ್ಪ ಬದಲಾವಣೆ ಆಗುತ್ತಿರುತ್ತದೆ. ಮುಸ್ಲಿಮರು ಬೆಳಿಗ್ಗೆಯಿಂದ ಸಂಜೆಯವರೆಗೂ ಒಂದು ಹನಿ ನೀರನ್ನೂ ಸೇವಿಸದೇ ಉಪವಾಸ ಆಚರಿಸುತ್ತಾರೆ.

10 ವರ್ಷದೊಳಗಿನ ಮಕ್ಕಳು, ಅನಾರೋಗ್ಯ ಪೀಡಿತರು ಹಾಗೂ ವೃದ್ಧರು ಉಪವಾಸದಿಂದ ದೂರ ಉಳಿಯುತ್ತಾರೆ. ಉಳಿದಂತೆ ಸಮುದಾಯದ ಬಹುತೇಕ ಜನರು ಉಪವಾಸ ಆಚರಿಸುತ್ತಿದ್ದಾರೆ.

ಖರೀದಿ ಭರಾಟೆ:

ರಂಜಾನ್‌ ಮಾಸದ ಹಿನ್ನೆಲೆಯಲ್ಲಿ ನಗರದಲ್ಲಿ ಅದರಲ್ಲೂ ಮುಸ್ಲಿಂ ಸಮುದಾಯದವರು ಹೆಚ್ಚಿರುವ ಪ್ರದೇಶಗಳಲ್ಲಿ ಬಟ್ಟೆ, ಆಹಾರ ಪದಾರ್ಥ, ದಿನಸಿ, ಹಣ್ಣುಗಳ ಖರೀದಿ ಭರಾಟೆ ಜೋರಾಗಿಯೇ ಇದೆ. ಸಂಜೆ ಮಸೀದಿಗೆ ತೆರಳಿ ಪ್ರಾರ್ಥನೆ ಸಲ್ಲಿಸಿದ ಬಳಿಕ ಹಣ್ಣು, ಆಹಾರ ಪದಾರ್ಥವನ್ನು ಖರೀದಿಸಿ ಮನೆಗೆ ಕೊಂಡೊಯ್ದು ಕುಟುಂಬದ ಸದಸ್ಯರೊಂದಿಗೆ ಸೇವಿಸುತ್ತಿದ್ದಾರೆ.

ಇಲ್ಲಿನ ಭಾಷಾನಗರ, ಮದೀನಾ ಸರ್ಕಲ್‌, ಕೆ.ಟಿ.ಜೆ. ನಗರ, ವಿನೋಬನಗರ, ಆಜಾದ್ ನಗರ, ಎಸ್‌.ಎಸ್‌.ಎಂ. ನಗರ, ಅಹಮದ್ ನಗರ, ಇಮಾಮ್ ನಗರ, ನರಸರಾಜಪೇಟೆ ಸೇರಿದಂತೆ ಹಲವು ಕಡೆಗಳಲ್ಲಿ ಸಂಜೆ ವೇಳೆ ಭರ್ಜರಿ ವ್ಯಾಪಾರ ನಡೆಯುತ್ತಿದೆ. ಹಬ್ಬಕ್ಕೆಂದು ಹೊಸ ಬಟ್ಟೆ, ಬಳೆ, ಚಪ್ಪಲಿ, ಶೂ, ಟೋಪಿ, ಬುರ್ಖಾ, ಅಲಂಕಾರಿಕ ವಸ್ತುಗಳು, ಸುಗಂಧ ದ್ರವ್ಯಗಳು, ಮೆಹೆಂದಿ ಖರೀದಿ ಕೂಡ ಜೋರಾಗಿದೆ.

ವಿವಿಧ ಖಾದ್ಯ:

ರಂಜಾನ್‌ ಹಿನ್ನೆಲೆಯಲ್ಲಿ ಮನೆಗಳು ಹಾಗೂ ಹೋಟೆಲ್‌ಗಳಲ್ಲಿ ವಿವಿಧ ಖಾದ್ಯಗಳನ್ನು ತಯಾರಿಸಲಾಗುತ್ತಿದೆ. ನಗರದ ವಿವಿಧೆಡೆಯ ಹೋಟೆಲ್‌ಗಳಲ್ಲಿ ಮಟನ್‌ ಬಿರಿಯಾನಿ, ಚಿಕನ್ ಬಿರಿಯಾನಿ, ಚಿಕನ್ ಕಬಾಬ್, ಫಿಶ್ ಕಬಾಬ್, ಲಿವರ್‌ ಫ್ರೈ, ಚಿಕನ್ ಫ್ರೈ, ಕೈಮಾ, ಪರೋಟಾ, ಎಗ್‌ ಮಸಾಲಾ, ಚಿಕನ್‌ 65 ಸೇರಿದಂತೆ ಹಲವು ಖಾದ್ಯಗಳ ಮಾರಾಟ ಜೋರಾಗಿದೆ. ಉಪವಾಸ ಆಚರಿಸುತ್ತಿರುವವರು ಕೆಲವು ಖಾದ್ಯಗಳನ್ನು ಮನೆಯಲ್ಲೇ ತಯಾರಿಸಿದರೆ, ಇನ್ನೂ ಕೆಲವು ಖಾದ್ಯಗಳನ್ನು ಹೋಟೆಲ್‌ಗಳಿಂದ ಖರೀದಿಸಿ ಸವಿಯುತ್ತಿದ್ದಾರೆ. ಹೋಟೆಲ್‌ಗಳಲ್ಲದೇ ಬೀದಿಬದಿಗಳಲ್ಲಿ ಸಮೋಸಾ ಹಾಗೂ ಇನ್ನಿತರ ಸಿಹಿ ಪದಾರ್ಥಗಳ ಮಾರಾಟವೂ ಹೆಚ್ಚಾಗಿದೆ.