ಮುಂಡರಗಿ: ತುಂಗಭದ್ರೆಯಲ್ಲಿ ಮತ್ತೆ ಗರಿಗೆದರಿದ ಮೀನುಗಾರಿಕೆ

ಮುಂಡರಗಿ: ಮಳೆ ಕೊರತೆ, ನದಿಯಲ್ಲಿ ನೀರಿನ ಅಭಾವ ಹಾಗೂ ಮತ್ತಿತರ ಕಾರಣಗಳಿಂದ ತುಂಗಭದ್ರಾ ನದಿಯಲ್ಲಿ ಕಳೆದ ಹಲವು ತಿಂಗಳುಗಳಿಂದ ಸ್ಥಗಿತಗೊಂಡಿದ್ದ ಮೀನುಗಾರಿಕೆ ಈಗ ಪುನಃ ಗರಿಗೆದರಿದ್ದು, ನದಿ ಪಾತ್ರದ ಗ್ರಾಮಗಳ ಮೀನುಗಾರರ ಮುಖದಲ್ಲಿ ಮಂದಹಾಸ ಮೂಡಿದೆ.

ತುಂಗಭದ್ರಾ ನದಿ ದಂಡೆಯ ಮೇಲಿರುವ ತಾಲ್ಲೂಕಿನ ಹೆಸರೂರು, ಕಕ್ಕೂರು, ಕೊರ್ಲಹಳ್ಳಿ, ಶಿಂಗಟಾಲೂರು, ಹಮ್ಮಿಗಿ, ಬಿದರಳ್ಳಿ ಮೊದಲಾದ ಗ್ರಾಮಗಳಲ್ಲಿ ನೂರಾರು ಮೀನುಗಾರ ಕುಟುಂಬಗಳು ವಾಸಿಸುತ್ತಿವೆ. ಕೊರ್ಲಹಳ್ಳಿ ಗ್ರಾಮವೊಂದರಲ್ಲಿಯೇ ಸುಮಾರು 300 ಮೀನುಗಾರ ಕುಟುಂಬಗಳಿವೆ. ಅವರೆಲ್ಲ ಮೀನುಗಾರಿಕೆಯೊಂದನ್ನೇ ಅವಲಂಬಿಸಿದ್ದು, ಅದರಿಂದಲೇ ಜೀವನ ನಿರ್ವಹಿಸುತ್ತಾರೆ.
ಕಳೆದ ಬೇಸಿಗೆಯಲ್ಲಿ ಅವಧಿ ಪೂರ್ವದಲ್ಲಿಯೇ ತುಂಗಭದ್ರಾ ನದಿ ಬತ್ತಿದ್ದರಿಂದ ಕಳೆದ ವರ್ಷ ನವೆಂಬರ್ ತಿಂಗಳಿನಲ್ಲಿಯೇ ಮೀನುಗಾರಿಕೆ ಸಂಪೂರ್ಣ ಸ್ಥಗಿತಗೊಂಡಿತ್ತು. ಮೀನುಗಾರರು ಮಳೆ ಹಾಗೂ ಹೊಳೆ ಬರುವುದನ್ನೆ ಕಾಯುತ್ತಿದ್ದರು. ಪ್ರಸ್ತುತ ಮುಂಗಾರು ಹಂಗಾಮಿನಲ್ಲಿ ಸಕಾಲದಲ್ಲಿ ನಿರೀಕ್ಷಿಸಿದಷ್ಟು ಮಳೆಯಾಗದ ಕಾರಣ ಮೀನುಗಾರಿಕೆ ಇಲ್ಲದೇ ನೂರಾರು ಕುಟುಂಬಗಳು ಪರಿತಪಿಸಿದವು.

ಎರಡು-ಮೂರು ತಿಂಗಳಿಂದ ಶಿವಮೊಗ್ಗ, ಮಲೆನಾಡು ಸೇರಿದಂತೆ ತುಂಗಭದ್ರಾ ಅಚ್ಚುಕಟ್ಟು ಪ್ರದೇಶದಲ್ಲಿ ಸಾಕಷ್ಟು ಮಳೆ ಸುರಿದ ಕಾರಣ ತುಂಗಭದ್ರಾ ನದಿಗೆ ಸಾಕಷ್ಟು ನೀರು ಹರಿದು ಬರತೊಡಗಿತು. ಜೂನ್, ಜುಲೈ ತಿಂಗಳಿನಲ್ಲಿ ನದಿ ಭರ್ತಿಯಾಗಿ ಸಾಕಷ್ಟು ನೀರು ಹರಿಯತೊಡಗಿತು. ಇದರಿಂದಾಗಿ ಕಳೆದ ಹಲವು ದಿನಗಳಿಂದ ನದಿಯಲ್ಲಿ ಮೀನು ಹಿಡಿಯುವ ಕಾರ್ಯ ಭರದಿಂದ ಸಾಗಿದ್ದು, ಮೀನುಗಾರರಿಗೆ ಕೈತುಂಬಾ ಕಾಸು ಹಾಗೂ ಕೆಲಸ ದೊರೆಯುವಂತಾಗಿದೆ.

ಕೊರ್ಲಹಳ್ಳಿ ಗ್ರಾಮದ ಬಳಿ ತುಂಗಭದ್ರಾ ನದಿಯಲ್ಲಿ ನಿತ್ಯ ಹಲವು ಮೀನುಗಾರ ಕುಟುಂಬಗಳ ಸದಸ್ಯರು ತೆಪ್ಪಗಳ (ನೀರಿನಲ್ಲಿ ಮೀನು ಹಿಡಿಯಲು ಮೀನುಗಾರರು ಬಳಸುವ ಬುಟ್ಟಿ) ನೆರವಿನಿಂದ ಮೀನು ಹಿಡಿಯುವ ಕಾಯಕದಲ್ಲಿ ನಿರತರಾಗಿರುತ್ತಾರೆ. ನಸುಕಿನಲ್ಲಿಯೇ ನದಿಗೆ ಇಳಿಯುವ ಮೀನುಗಾರರು ಮುಂಜಾನೆ 9ರಿಂದ10ಗಂಟೆಯೊಳಗೆ ತಲಾ 8-10 ಕೆ.ಜಿ ಮೀನು ಸಂಗ್ರಹಿಸಿ ದಡ ಸೇರುತ್ತಾರೆ.

ನದಿಯಲ್ಲಿ ಹಿಡಿದ ಮೀನುಗಳನ್ನು ಹತ್ತಿರದ ಏಜಂಟರಿಗೆ ಅಥವಾ ವ್ಯಾಪಾರಸ್ಥರಿಗೆ ಮಾರಾಟ ಮಾಡುತ್ತಾರೆ. ಇಲ್ಲಿ ದೊರೆಯುವ ಮೀನುಗಳನ್ನು ಹತ್ತಿರದ ಹೂವಿನಹಡಗಲಿ, ಮುಂಡರಗಿ, ಕೊಪ್ಪಳ, ಶಿರಹಟ್ಟಿ, ಲಕ್ಷ್ಮೇಶ್ವರ ಮೊದಲಾದ ಪಟ್ಟಣಗಳ ವ್ಯಾಪಾರಸ್ಥರು ಕೊಂಡುಕೊಳ್ಳುತ್ತಾರೆ.

ನದಿಯಲ್ಲಿ ನೀರು ಈಗಿರುವಂತೆ ತಟಸ್ಥವಾಗಿ ನಿಂತರೆ ಡಿಸೆಂಬರ್‌ವರೆಗೆ ಮೀನುಗಳನ್ನು ಸುಲಭವಾಗಿ ಹಿಡಿಯಬಹುದು. ಆದರೆ ನದಿಯಲ್ಲಿ ಅಕಾಲದಲ್ಲಿ ನೀರು ಖಾಲಿಯಾದರೆ ಅಥವಾ ಮಳೆ ಹೆಚ್ಚಾಗಿ ನದಿಯಲ್ಲಿ ನೀರು ರಭಸವಾಗಿ ಹರಿಯತೊಡಗಿದರೆ ಪುನಃ ಮೀನುಗಾರಿಕೆಗೆ ಹಿನ್ನಡೆಯಾಗುತ್ತದೆ. ಹಾಗಾಗದಿರಲಿ ಎಂದು ಮೀನುಗಾರರು ಬೇಡಿಕೊಳ್ಳುತ್ತಾರೆ.

ಸಾಮಾನ್ಯವಾಗಿ ಪ್ರತಿ ವರ್ಷ ಆಗಸ್ಟ್‌ ತಿಂಗಳಿನಿಂದ ಮೀನುಗಾರಿಕೆ ವೇಗ ಪಡೆದುಕೊಳ್ಳುತ್ತದೆ. ಆದರೆ ಈ ವರ್ಷ ಆಗಸ್ಟ್‌ನಲ್ಲಿ ಹೊಸಪೇಟೆ ಬಳಿಯ ತುಂಗಭದ್ರಾ ಡ್ಯಾಂನ 19ನೇ ಗೇಟ್ ಮುರಿದು ಹೋಯಿತು. ಇದರಿಂದಾಗಿ ಸಾಕಷ್ಟು ಪ್ರಮಾಣದ ನೀರು ನಿತ್ಯ ಹರಿದು ಹೋಯಿತು. ಹೀಗೆ ನಿತ್ಯ ನೀರು ರಭಸದಿಂದ ಹರಿಯತೊಡಗಿದ್ದರಿಂದ ಇಲ್ಲಿಯ ಮೀನುಗಾರಿಕೆ ವಿಳಂಬವಾಯಿತು.