ನರಗುಂದ: ಹದಗೆಟ್ಟ ಎನ್ಎಚ್‌ಟಿ ಮಿಲ್ ಕಾಲೊನಿ ರಸ್ತೆ

ನರಗುಂದ: ಪಟ್ಟಣದ ಪ್ರಮುಖ ಬಡಾವಣೆಗಳಲ್ಲಿ ಒಂದಾದ ಹೊರಕೇರಿ ಓಣಿಯ ಎನ್ಎಚ್‌ಟಿ ಮಿಲ್ ಕಾಲೊನಿ ಹಾಗೂ ಟಿಎಪಿಸಿಎಂಎಸ್‌ಗೆ ತೆರಳುವ ರಸ್ತೆ ಸಂಪೂರ್ಣ ಹದಗೆಟ್ಟ ಪರಿಣಾಮ, ಸಂಚಾರಕ್ಕೆ ಸಂಚಕಾರ ಉಂಟಾಗಿದೆ. ರಸ್ತೆ ಅವ್ಯವಸ್ಥೆಯಿಂದಾಗಿ ಜನರು ತೀವ್ರ ತೊಂದರೆ ಅನುಭವಿಸುವಂತಾಗಿದೆ.

ಪುರಸಭೆಗೆ ತೆರಳುವ ಮುಖ್ಯರಸ್ತೆಯನ್ನು ಸಂಪರ್ಕಿಸುವ ರಸ್ತೆಯಿಂದ ಟಿಎಪಿಸಿಎಂಎಸ್‌, ಎಸ್‌ವೈಎಸ್ ಪದವಿ ಹಾಗೂ ಶಿಕ್ಷಣ ಮಹಾವಿದ್ಯಾಲಯ, ಹೆಸ್ಕಾಂನ ಗ್ರಿಡ್, ಎಂಪಿಎಸ್ ನಂ. 4 ಸರ್ಕಾರಿ ಶಾಲೆ, ಸಹಕಾರಿ ಇಲಾಖೆ ಕಚೇರಿ, ಎಂಎಸ್‌ಬಿಸಿ ಘಟಕ, ಈದ್ಗಾ ಮೈದಾನ, ಖಬರಸ್ತಾನಕ್ಕೆ ತೆರಳಲು ಈ ರಸ್ತೆ ಬಳಕೆಯಾಗುತ್ತದೆ. ಆದರೆ, ರಸ್ತೆ ಹದಗೆಟ್ಟಿರುವ ಪರಿಣಾಮ ಜನರ ಪರದಾಟ ಹೇಳತೀರದಾಗಿದೆ. ಅದರಲ್ಲೂ ಮಳೆಯಾದರೆ ಇಲ್ಲಿನ ಕೆಸರಿನ ಹೊಂಡದಂತಾಗಿ ಎಲ್ಲಿ ಪಾದವಿಡಬೇಕು ಎಂಬ ಗೊಂದಲ ಜನರಲ್ಲಿ ಮೂಡುತ್ತದೆ. ಈ ರಸ್ತೆಯನ್ನು ಕಾಂಕ್ರೀಟ್ ರಸ್ತೆಯಾಗಿ ನಿರ್ಮಿಸಲು ಅನುದಾನ ಬಿಡುಗಡೆ ಆಗಿದ್ದರೂ ಕಾಮಗಾರಿ ವಿಳಂಬವಾಗಿದೆ. ಆದರೆ, ತಾತ್ಕಾಲಿಕವಾದರೂ ದುರಸ್ತಿ ಮಾಡದೇ ರಸ್ತೆಗೆ ಕೆಂಪು ಮಣ್ಣು ಹಾಕಿರುವ ಪರಿಣಾಮ ಸಂಚಾರ ಮತ್ತಷ್ಟು ದುಸ್ತರವಾಗಿದೆ.

ಕಳೆದ ಎರಡು ದಿನ ಮಳೆ ಸುರಿದ ಪರಿಣಾಮ ಈ ರಸ್ತೆ ಸ್ಥಿತಿ ತೀವ್ರ ಹದಗೆಟ್ಟಿದೆ. ಪುರಸಭೆ ಆಡಳಿತ ಏನು ಮಾಡುತ್ತಿದೆ ಎಂದು ತಿಳಿಯದಾಗಿದೆ. ರಸ್ತೆ ನಿರ್ಮಾಣಕ್ಕೆ ಹಲವಾರು ಸಲ ಪುರಸಭೆಗೆ ಮನವಿ ಸಲ್ಲಿಸಿದರೂ ಪ್ರಯೋಜನವಾಗಿಲ್ಲ ಎಂದು ಎನ್ಎಚ್‌ಟಿ  ಮಿಲ್ ಕಾಲೊನಿ ರಸ್ತೆ ನಿವಾಸಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದು ಪ್ರಮುಖ ರಸ್ತೆಯಾಗಿದ್ದು, ನೂರಾರು ವಿದ್ಯಾರ್ಥಿಗಳು, ಸಾರ್ವಜನಿಕರು ದಿನನಿತ್ಯ ಪರದಾಡುವಂತಾಗಿದೆ. ಬೇಗನೆ ರಸ್ತೆ ನಿರ್ಮಿಸಬೇಕು. ಇಲ್ಲವಾದರೆ ಪುರಸಭೆ ವಿರುದ್ಧ ಪ್ರತಿಭಟನೆ ನಡೆಸಲಾಗುವುದು ಎಂದು ಇಲ್ಲಿನ ನಿವಾಸಿಗಳು ಎಚ್ಚರಿಸಿದ್ದಾರೆ.