ನರೇಗಲ್ | ಕೆಸರು ಗದ್ದೆಯಂತಾಗುವ ರಸ್ತೆ: ಜೀವಭಯ

ನರೇಗಲ್:‌ ಹೋಬಳಿ ಕೇಂದ್ರವಾಗಿರುವ ನರೇಗಲ್‌ ಪಟ್ಟಣಕ್ಕೆ ಸಂಪರ್ಕ ಕಲ್ಪಿಸುವ ಬಹುತೇಕ ರಸ್ತೆಗಳು ಹದಗೆಟ್ಟಿದ್ದು ಎಲ್ಲೆಂದರಲ್ಲಿ ತಗ್ಗು ದಿಣ್ಣೆಗಳ ಸಾಮ್ರಾಜ್ಯವೇ ನಿರ್ಮಾಣವಾಗಿದೆ. ಇದರಿಂದ ರಸ್ತೆ ಅಪಘಾತ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿದೆ. ಆದರೆ, ಪಿಡಬ್ಲ್ಯುಡಿ ಹಾಗೂ ಪಿಎಂಜಿಎಸ್‌ವೈ ಹಾಗೂ ಇತರೆ ಇಲಾಖೆಯ ಅಧಿಕಾರಿಗಳು ರಸ್ತೆ ಅಭಿವೃದ್ದಿಗೆ ಮುಂದಾಗುತ್ತಿಲ್ಲ ಎನ್ನುವುದು ಜನರ ಆರೋಪವಾಗಿದೆ.

ಜಕ್ಕಲಿ-ಹೊಸಳ್ಳಿ ಮಾರ್ಗದ ರಸ್ತೆ ಮೊದಲೇ ಹಾಳಾಗಿತ್ತು. ಆದರೆ ಈಚೆಗೆ ಸುರಿದ ಮಳೆಗೆ, ಅತಿ ಭಾರದ ವಾಹನಗಳ ಓಡಾಟದಿಂದ ಸಂಪೂರ್ಣವಾಗಿ ಕಿತ್ತು ಹೋಗಿದೆ. ರಸ್ತೆ ಮಧ್ಯೆ ಬರುವ ಸೇತುವೆಗಳು ಅಲ್ಲಲ್ಲಿ ಬಿರುಕು ಬಿಟ್ಟಿವೆ. ಕೆಲವೊಂದು ಕಡೆ ಆಳವಾದ ಗುಂಡಿ ಬಿದ್ದಿರುವ ಕಾರಣ ಸವಾರರಿಗೆ ಗೊತ್ತೇ ಆಗುವುದಿಲ್ಲ. ಇದರಿಂದ ಜನರ ಜೀವದ ಜೊತೆಯಲ್ಲಿ ಆಟವಾಡುವಂತೆ ರಸ್ತೆ ಮಾರ್ಪಟ್ಟಿದೆ.

ಸೇತುವೆಗಳ ಗುಂಡಿಗಳು ಗೊತ್ತಾಗಲಿ ಎಂದು ಕೆಲವು ಕಡೆಗಳಲ್ಲಿ ರೈತರು ಮುಳ್ಳಿನ ಕಂಟಿಗಳನ್ನು, ಗಿಡದ ಟೊಂಗೆಗಳನ್ನು ಹಾಕಿದ್ದಾರೆ. ಹೊಸಳ್ಳಿ ಸಮೀಪದ ಹಳ್ಳಕ್ಕೆ ಅಡ್ಡಲಾಗಿ ನಿರ್ಮಾಣ ಮಾಡಲಾಗಿರುವ ಸೇತುವೆ ಎರಡು ಕಡೆಗಳಲ್ಲಿ ಅವೈಜ್ಞಾನಿಕವಾಗಿ ಕಲ್ಲುಗಳನ್ನು ಜೋಡಿಲಾಗಿದೆ. ಸೇತುವೆ ಮೂಲಕ ಹಳ್ಳಕ್ಕೆ ಮರಳು ತರಲು ಹೋಗುವ ವಾಹನಗಳು ಅಪಘಾತ ನಡೆಯುವ ಮಾದರಿಯಲ್ಲಿ ರಸ್ತೆಯನ್ನು ಕೊರೆದಿದ್ದಾರೆ. ಇದರಿಂದ ಸೇತುವೆ ಏರಲು ಹಾಗೂ ಇಳಿಯಲಾಗದಂತಹ ಹಂತಕ್ಕೆ ತಲುಪಿದೆ.

ಮಾರನಬಸರಿ-ಕಳಕಾಪುರ, ಮಾರನಬಸರಿ-ನರೇಗಲ್‌, ಮಾರನಬಸರಿ-ನಿಡಗುಂದಿಕೊಪ್ಪ ರಸ್ತೆಯು ಹದಗೆಟ್ಟಿದ್ದು ಗ್ರಾಮೀಣರು ನಿತ್ಯ ನರಕಯಾತನೆ ಅನುಭವಿಸುತ್ತಿದ್ದಾರೆ. ಈ ಮಾರ್ಗಗಳಲ್ಲಿ ಬರುವ ಹಳ್ಳಗಳಿಗೆ ಎಲ್ಲಿಯೂ ಸೇತುವೆ ನಿರ್ಮಾಣ ಮಾಡದಿರುವ ಕಾರಣ ಜೋರು ಮಳೆ ಬಂದರೆ ಸಂಚಾರಕ್ಕೆ ತೊಂದರೆ ಆಗುತ್ತಿದೆ. ಗಜೇಂದ್ರಗಡ-ನರೇಗಲ್‌ ಮಾರ್ಗದ ಹೆದ್ದಾರಿಯು ಕಚ್ಚಾ ದಾರಿಯಂತಾಗಿದೆ. ಎಲ್ಲೆಂದರಲ್ಲಿ ಗುಂಡಿಗಳು ನಿರ್ಮಾಣವಾಗುತ್ತಿವೆ. ಇದರಿಂದ ಅಪಘಾತಗಳು ನಡೆಯುತ್ತಿವೆ. ರಸ್ತೆ ಸರಿಪಡಿಸಲು ಮುಂದಾಗಬೇಕು ಎಂದು ದಲಿತ ಮುಖಂಡ ಹನುಮಂತ ಪೂಜಾರ ಆಗ್ರಹಿಸಿದ್ದಾರೆ.

ಪಟ್ಟಣದಿಂದ ಅಬ್ಬಿಗೇರಿ ಗ್ರಾಮದ ಕಡೆಗೆ ಹೋಗುವ ಕಾಲೇಜು ರಸ್ತೆಯ ತುಂಬಾ ಗುಂಡಿಗಳು ನಿರ್ಮಾಣವಾಗಿವೆ. ಸ್ವಲ್ಪ ಮಳೆ ಬಂದರು ರಸ್ತೆಯ ತುಂಬಾ ನೀರು ನಿಲ್ಲುತ್ತದೆ. ಇದರಿಂದ ಶಾಲಾ ಕಾಲೇಜಿಗೆ ಹೋಗುವ ಸಾವಿರಾರು ವಿದ್ಯಾರ್ಥಿಗಳು ತೊಂದರೆ ಅನುಭವಿಸುವಂತಾಗಿದೆ. ನರೇಗಲ್‌ ಪಟ್ಟಣದಿಂದ ಯಲಬುರ್ಗಾ ತಾಲ್ಲೂಕಿನ ತೊಂಡಿಹಾಳ, ಬಂಡಿಹಾಳ, ಕುಕನೂರ ಸೇರಿದಂತೆ ಇತರೆ ಗ್ರಾಮಗಳಿಗೆ ತೆರಳುವ ರಸ್ತೆಯು ಸಂಪೂರ್ಣವಾಗಿ ಕಿತ್ತು ಹೋಗಿದೆ. ತೆಗ್ಗು, ಗುಂಡಿಯಲ್ಲಿ ಬೀಳುವ ವಾಹನ ಸವಾರರು ಪರದಾಡುವಂತಹ ಸ್ಥಿತಿ ನಿರ್ವಣವಾಗಿದೆ. ಹದಗೆಟ್ಟಿರುವ ರಸ್ತೆಗಳಲ್ಲಿ ಸಂಚರಿಸುವ ಸವಾರರು ಜನಪ್ರತಿನಿಧಿಗಳಿಗೆ ಹಾಗೂ ಅಧಿಕಾರಿಗಳಿಗೆ ಹಿಡಿ ಶಾಪ ಹಾಕುತ್ತಿದ್ದಾರೆ.