ಸಾರಿಗೆ ಸಂಸ್ಥೆ ಉಳಿವಿಗಾಗಿ ಪಾದಯಾತ್ರೆ

ರೋಣ: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ಸುಗಳ ಉಳಿವಿಗಾಗಿ ಮತ್ತು ಸಿಬ್ಬಂದಿಯ ಹಿತರಕ್ಷಣೆಗಾಗಿ ಸಾರ್ವಜನಿಕ ಜಾಗೃತಿ ಮೂಡಿಸಲು ತಾಲೂಕಿನ ಕರ್ಕಿ ಕಟ್ಟಿ ಗ್ರಾಮದ ಗಾಂಧಿವಾದಿ ಮುತ್ತಣ್ಣ ತಿರ್ಲಾಪುರವರು ರೋಣ ಬಸ್ ನಿಲ್ದಾಣದಿಂದ ಶುಕ್ರವಾರ ಬೆಂಗಳೂರು ಕೇಂದ್ರ ಬಸ್ ನಿಲ್ದಾಣದವರೆಗೆ ಪಾದಯಾತ್ರೆ ಆರಂಭಿಸಿದರು.

ಪಾದಯಾತ್ರೆಯ ಪ್ರಾರಂಭದ ಅಂಗವಾಗಿ ನಡೆದ ಕಾರ್ಯಕ್ರಮದಲ್ಲಿ ದಿವ್ಯ ಸಾನಿಧ್ಯ ವಹಿಸಿ ಮಾತನಾಡಿದ ಗುಲಗಂಜಿ ಮಠದ ಗುರುಪಾದ ಸ್ವಾಮೀಜಿ, ‘ಕರ್ನಾಟಕದ ಹೆಮ್ಮೆಯಾದ ಕೆಎಸ್ಆರ್‌ಟಿಸಿಯನ್ನು ಉಳಿಸಿ ಬೆಳೆಸುವುದು ಕೇವಲ ಸರ್ಕಾರದ ಕೆಲಸವಲ್ಲ. ನಮ್ಮೆಲ್ಲರ ಕೆಲಸವಾಗಿದೆ. ಸೇವೆಗೆ ಮತ್ತೊಂದು ಹೆಸರೇ ನಮ್ಮ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯಾಗಿದ್ದು ಇಂತಹ ಸಂಸ್ಥೆಯಲ್ಲಿ ನಿಷ್ಠೆಯಿಂದ ಸೇವೆ ಸಲ್ಲಿಸುತ್ತಿರುವ ಎಲ್ಲಾ ಚಾಲಕ ಮತ್ತು ನಿರ್ವಾಹಕರೊಂದಿಗೆ ಜನತೆ ಸಹಕಾರದಿಂದ ವರ್ತಿಸಬೇಕು‘ ಎಂದರು.

ಅಬ್ದುಲ್ ಸಾಬ್ ಹೊಸಮನಿ ಅವರು, ‘ದೇಶದ ಅರ್ಥ ವ್ಯವಸ್ಥೆಗೆ ಸಾರಿಗೆ ಸಂಸ್ಥೆಗಳ ಕೊಡುಗೆ ಮಹತ್ವದ್ದಾಗಿದ್ದು ಇಡೀ ಏಷ್ಯಾ ಖಂಡದಲ್ಲಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯು ತನ್ನದೇ ಆದ ಉತ್ತಮ ಸೇವೆಯ ಮೂಲಕ ಅತ್ಯುತ್ತಮ ಸಾರಿಗೆ ಸಂಸ್ಥೆ ಎಂದು ಹೆಸರು ಸಂಪಾದಿಸಿದ್ದು ಬಸ್ಸುಗಳಿಗೆ ಬೆಂಕಿ ಇಡುವುದಾಗಲಿ ಹಾನಿ ಮಾಡುವುದಾಗಲಿ ಮಾಡದೆ ಇದು ನಮ್ಮ ಸ್ವತ್ತು ಎಂದು ತಿಳಿದು ಪ್ರತಿಯೊಬ್ಬ ನಾಗರಿಕರು ಅದರ ರಕ್ಷಣೆ ಮಾಡಬೇಕು‘ ಎಂದರು.

ಸಾರಿಗೆ ಸಂಸ್ಥೆಯ ಪರ ಜಾಗೃತಿ ಪಾದಯಾತ್ರೆ ಕೈಗೊಂಡ ಮುತ್ತಣ್ಣ ತಿರ್ಲಾಪುರ ಅವರನ್ನು ಅಬ್ದುಲ್ ಸಾಬ್ ಹೊಸಮನಿ ಅಭಿಮಾನಿ ಬಳಗ ಹಾಗೂ ರೋಣ ಘಟಕದ ನಿವೃತ್ತ ಚಾಲಕ ಪರಸಪ್ಪ ಜಿಗಳೂರ ಅವರಿಂದ ಸನ್ಮಾನಿಸಲಾಯಿತು.

ಕರ್ನಾಟಕ ರಾಜ್ಯ ರೈತ ಸಂಘದ ಮಹಿಳಾ ಘಟಕದ ಉಪಾಧ್ಯಕ್ಷೆ ಲೀಲಾ ಚಿತ್ರಗಾರ, ನಿವೃತ್ತ ಇಂಜಿನಿಯರ್ ಜಗದೀಶ ಮಡಿವಾಳರ, ನಿವೃತ್ತ ಎಪಿಎಂಸಿ ಕಾರ್ಯದರ್ಶಿ ಮಹದೇವಪ್ಪ ಹೊಸಮನಿ, ಅಬ್ದುಲ್ ಸಾಬ್ ಹೊಸಮನಿ ಅಭಿಮಾನಿ ಬಳಗದ ಅಧ್ಯಕ್ಷ ಶಂಕರ ದಂಡಿನ, ರೈತ ಸಂಘದ ಕಾರ್ಯದರ್ಶಿ ದೊಡ್ಡಬಸಪ್ಪ ನವಲಗುಂದ, ಸಿದ್ದಪ್ಪ ಗದಗಿನ, ಮುತ್ತಣ್ಣ ಕಟಗೇರಿ ಸೇರಿದಂತೆ ಇತರರು ಇದ್ದರು.