ಬೇಲೂರು | ದಾಳಿಗೆ ಯತ್ನಿಸಿದ ಕಾಡಾನೆ: ತಪ್ಪಿಸಿಕೊಂಡ ಬೈಕ್ ಸವಾರ

ಬೇಲೂರು: ತಾಲ್ಲೂಕಿನ ಕೆಳ್ಳಬಿಕ್ಕೋಡಿನಲ್ಲಿ ಬಿ.ಬಿ.ನಾಗೇಶ್ ಎಂಬುವವರನ್ನು ಆನೆ ದಾಳಿ ಮಾಡಲು ಯತ್ನಿಸಿದ್ದು ಶನಿವಾರ ಕೂದಲೆಯ ಅಂತರದಲ್ಲಿ ತಪ್ಪಿಸಿಕೊಂಡು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ನಾಗೇಶ್ ಕಾಫಿ ತೋಟಕ್ಕೆ ಬೈಕ್‌ನಲ್ಲಿ ತೆರಳುತ್ತಿದ್ದ ಸಂದರ್ಭ ಕಾಡಾನೆಗಳ ಹಿಂಡು ಅಡ್ಡ ಬಂದಿದೆ. ಇದರಿಂದ ಗಾಬರಿಗೊಂಡ ಸವಾರ ಬೈಕ್ ಸಹಿತ ನೆಲಕ್ಕೆ ಬಿದ್ದರು. ಇದನ್ನು ಗಮನಿಸಿ ಹಿಂಡು ದಾಳಿಗೆ ಮುಂದಾಗಿವೆ. ಈ  ಸಂದರ್ಭದಲ್ಲಿ ಓಡಿ ತಪ್ಪಿಸಿಕೊಂಡರು.

ಗ್ರಾಮಕ್ಕೆ ಆಗಮಿಸಿದ ಬಿ.ಬಿ. ನಾಗೇಶ್‌ರನ್ನು ಗ್ರಾಮಸ್ಥರು ಬೇಲೂರಿನ ಸರ್ಕಾರಿ ಆಸ್ಪತ್ರೆಗೆ ಕರೆ ತಂದು ಚಿಕಿತ್ಸೆ ಕೊಡಿಸಿದ್ದಾರೆ. ಸ್ಥಳಕ್ಕಾಮಿಸಿದ ಅರಣ್ಯ ಇಲಾಖೆ ಅಧಿಕಾರಿಗಳು ಬಿ.ಬಿ.ನಾಗೇಶ್ ಆರೋಗ್ಯ ವಿಚಾರಿಸಿ ಮನೆಗೆ ಕಳುಹಿಸಿದ್ದಾರೆ.