ದ್ವಾರಸಮುದ್ರ: ಬೆಳೆ ಹಾನಿ, ರಸ್ತೆ, ಬಯಲು ಜಲಾವೃತ

ಹಳೇಬೀಡು:  ಭಾರಿ ಮಳೆಗೆ ಹಳೇಬೀಡಿನ ದ್ವಾರಸಮುದ್ರ ಕೆರೆ ಕೋಡಿಯಲ್ಲಿ ಶನಿವಾರ ನೀರಿನ ಹರಿವು ಹೆಚ್ಚಾಗಿದೆ. ನೀರು ಹರಿಯುವ ವೇಗದ ಪರಿಣಾಮ ಕಾಲುವೆಗಳಿಂದ  ನೀರು ರಸ್ತೆ, ಗದ್ದೆಗಳಿಗೆ ನುಗ್ಗಿದ್ದು, ರೈತರು ನಷ್ಟ ಅನುಭವಿಸುವಂತಾಗಿದೆ.

ದ್ವಾರಸಮುದ್ರ ಕೆರೆಯ ಕೋಡಿಹಳ್ಳದ ಪಕ್ಕದ ಭೂದಿಗುಂಡಿ ಬಡಾವಣೆಯ ಮನೆಗಳು ಜಲಾವೃತವಾಗಿವೆ. ಕಾಲುವೆ ಸ್ವಚ್ಛವಾಗಲಿ ಎಂದು ನಿವಾಸಿಗಳು ಪೇಟೆ ಕಾಲುವೆಗೆ ನೀರು ಬಿಟ್ಟಿದ್ದಾರೆ. ಕಿರಿದಾದ ನಾಲೆಗಳ ಮೂಲಕ ಹೊರ ಚೆಲ್ಲಿದ ನೀರು ಗದ್ದೆಗಳನ್ನು ಆವರಿಸಿದೆ.

ಸಂಪರ್ಕ ಸ್ಥಗಿತ: ನೀರು ರಸ್ತೆ ಮೇಲೆ ಹರಿಯುತ್ತಿದ್ದು, ದ್ವಿಚಕ್ರ ವಾಹನವೂ ಚಲಿಸಲಾಗದೆ, ರೈತರು ತಮ್ಮ ಜಮೀನಿನ ಸ್ಥಿತಿಗತಿ ನೋಡಲು ಸಾದ್ಯವಿಲ್ಲದಂತಾಗಿದೆ.  ಹಳೇಬೀಡು ಹಾಗೂ ಮಲ್ಲಾಪುರ ಗ್ರಾಮಸ್ಥರ ಜಮೀನುಗಳು ಹೆಚ್ಚಾಗಿದ್ದು, ಎರಡೂ ಗ್ರಾಮದ ರೈತರಿಗೆ ತೊಂದರೆ ಉಂಟಾಗಿದೆ.

ಬೆಳೆ ಹಾನಿ: 100 ಎಕರೆಗೂ ಹೆಚ್ಚಿನ ಗದ್ದೆಗಳಿಗೆ ನೀರು ನುಗ್ಗಿ ಬೆಳೆಗಳಿಗೆ ಹಾನಿಯಾಗಿದೆ. ಬಾಳೆ, ಟೊಮೆಟೊ, ಮೆಣಸು, ಬದನೆ, ಬೀನ್ಸ್, ಶುಂಠಿ ಬೆಳೆದ ಗದ್ದೆಗಳಲ್ಲಿ ನೀರು ತುಂಬಿ, ಬೆಳೆಗಳು ಕೊಳೆಯ ತೊಡಗಿವೆ ಎಂದು ರೈತರು ತಿಳಿಸಿದರು.

ಬೆಳೆ ಹಾನಿಯಾದ ಸ್ಥಳಕ್ಕೆ ಹೋಗಲು ಸಾಧ್ಯವಿಲ್ಲ. ರಸ್ತೆಯಲಿ ನೀರು ಹರಿಯುತ್ತಿದೆ. ಗದ್ದೆ , ಜಮೀನುಗಳು ಎರೆ ಮಣ್ಣಿನ ಭೂಮಿಯಾಗಿರುವುದರಿಂದ ಕಾಲು ಹೂತುಕೊಳ್ಳುತ್ತದೆ.  ಗದ್ದೆಯಿಂದ ನೀರು ಹೊರ ಹಾಕಲು ಸಾಧ್ಯವಾಗದೆ ರೈತರು ಪರದಾಡುತ್ತಿದ್ದಾರೆ. 

ಶಾಲೆ ಮೈದಾನ ಜಲಾವೃತ: ಎಸ್‌ಜಿಆರ್ ಶೈಕ್ಷಣಿಕ ಸಮೂಹದ ಮೈದಾನದಲ್ಲಿಯೂ ನೀರು ತುಂಬಿ ಮೈದಾನ ಜಲಾವೃತವಾಗಿದೆ. ಸ್ಕೌಟ್ಸ್‌ ಮತ್ತು ಗೈಡ್ಸ್‌ ಹಾಗೂ ಕ್ರೀಡಾ ಚಟುವಟಿಕೆಗೆ  ಅಡಚಣೆಯಾಗಿದೆ.  

ಸಣ್ಣ ನೀರಾವರಿ ಇಲಾಖೆ ಎಂಜಿನಿಯರ್ ಸುಂದರರಾಜು ಭೇಟಿ ನೀಡಿ  ರೈತರ ಜೊತೆ ಚರ್ಚೆ ನಡೆಸಿದರು. ಬೂದಿಗುಂಡಿಯಲ್ಲಿ ಪೇಟೆ ಕಾಲುವೆಗೆ ನೀರು ಬಿಟ್ಟಿರುವುದನ್ನು ಇಲಾಖೆಯೇ  ಸರಿಪಡಿಸಬೇಕು ಎಂದು ರೈತರು  ಆಗ್ರಹಿಸಿದರು.  ರಸ್ತೆ ನಿರ್ಮಾಣದ ಜಲ್ಲಿ, ಡಾಂಬರ್ ಮಿಶ್ರಣವನ್ನು ಪೇಟೆ ಕಾಲುವೆಗೆ ತುಂಬಿಸಿ ನೀರನ್ನು ನಿಯಂತ್ರಿಸಲಾಯಿತು.

ಪೇಟೆಯ ಗಟಾರದಲ್ಲಿ ನೀರು ಹರಿಸಿ, ಸೊಳ್ಳೆ ಸಮಸ್ಯೆ ಬಗೆ ಹರಿಸಲು ಬೂದಿಗುಂಡಿ ಜನ ಅದರ ಮೂಲಕ ನೀರು ಹರಿಸಿದ್ದರು. ಇಲ್ಲದ್ದರೆ ಕೋಡಿ  ನೀರು ಮನೆಗಳಿಗೆ ನುಗ್ಗುತ್ತಿತ್ತು.  ಇನ್ನಷ್ಟು ಬೆಳೆ ಹಾನಿಯಾಗಿ ರೈತರಿಗೂ ಸಮಸ್ಯೆಯಾಗುತ್ತಿತ್ತು. ಸುಂದರೇಶ್ ತಿಳಿಸಿದರು.