ಚನ್ನರಾಯಪಟ್ಟಣ: ಅಂತರರಾಷ್ಟ್ರೀಯ ಯೋಗ ದಿನಾಚರಣೆಗೆ ಮತ್ತೆ ಪ್ರಪಂಚ ಸಜ್ಜಾಗಿದೆ. ಭಾರತದ ಕೊಡುಗೆಯಾದ ಯೋಗಾಸನ ಇಂದು ಗಡಿ, ಭಾಷೆ ಮೀರಿ ಬೆಳೆದು ನಿಂತಿದೆ. ಯೋಗಾಸನ ಮಾಡುವುದು ಜೀವನ ಶೈಲಿಯಾಗಿ ಮಾರ್ಪಟ್ಟಿದೆ.
ಪಟ್ಟಣದ ಬಿಜಿಎಸ್ ಪಬ್ಲಿಕ್ ಶಾಲೆಯಲ್ಲಿ 8ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಎ.ಎಂ. ರುಥ್ವಿ, ನಾಲ್ಕು ವರ್ಷಗಳಿಂದ ಯೋಗಾಸನದಲ್ಲಿ ಉತ್ತಮ ಸಾಧನೆ ಮಾಡುತ್ತಿದ್ದಾಳೆ. ವೃಕ್ಷಾಸನ, ಅರ್ಧ ಚಕ್ರಾಸನ, ಭದ್ರಾಸನ, ವಜ್ರಾಸನ, ಶಶಂಕಾಸನ, ವಕ್ರಾಸನ, ಮಕರಾಸನ, ಭುಜಂಗಾಸನ, ಶಲಭಾಸನ, ಸೇತುಬಂಧಾಸನ, ಪವನಮುಕ್ತಾಸನ, ಭ್ರಾಮರಿ ಪ್ರಾಣಾಯಾಮ, ಕಪಾಲಭಾತಿ ಕ್ರಿಯೆ, ಶವಾಸನ, ನಾಡಿ ಶೋಧನ, ಶೀತಲಿ ಪ್ರಾಣಾಯಾಮ. ಕಷ್ಟಕರವಾದ ಆಸನಗಳಾದ ವಾಮದೇವತಿಪ್ರುರಾಸನ, ಗಂಡಭೇರುಂಡ ಆಸನ, ಪೂರ್ಣ ಚಕ್ರಬಂಧಾಸನ, ಋಶ್ವಿಕ ಆಸನ, ಬ್ರಹ್ಮಸ್ತ್ರ ಆಸನ, ದ್ವಿಪದ ಕೋಕಿಲಾಸನ ಸೇರಿ ಅಂದಾಜು 200 ಆಸನ ಪ್ರದರ್ಶಿಸಿದ್ದಾಳೆ.
‘ಯೋಗಾಸಾನ, ಪ್ರಾಣಾಯಾಮದ ವಿವಿಧ ಪ್ರಕಾರವನ್ನು ಅಭ್ಯಾಸ ಮಾಡುವುದರಿಂದ ಏಕಾಗ್ರತೆ, ಆತ್ಮಸ್ಥೈರ್ಯ, ಕ್ರಿಯಾಶೀಲತೆ, ಬುದ್ದಿಶಕ್ತಿ ಚುರುಕುಗೊಳ್ಳುತ್ತದೆ. ಇದರಿಂದ ವ್ಯಾಸಂಗದ ಮೇಲೆ ಸಕಾರಾತ್ಮಕ ಪರಿಣಾಮ ಬೀರುತ್ತದೆ’ ಎಂಬ ಅಭಿಮತ ರುಥ್ವಿಯದು.
ಚಿಕ್ಕಂದಿನಿಂದಲೇ ದೇಹವನ್ನು ಸುಲಭವಾಗಿ ದಂಡಿಸಲು ಅವಕಾಶ ಇರುವುದರಿಂದ ನಾಲ್ಕನೇ ತರಗತಿಯಲ್ಲಿ ಓದುತ್ತಿರುವಾಗಲೇ. ಯೋಗಾಸನ ಕಲಿಯಲು ಆರಂಭಿಸಿದಳು. ರಾಜ್ಯ ಮತ್ತು ರಾಷ್ಟ್ರಮಟ್ಟದ ಸ್ಪರ್ಧೆಯಲ್ಲಿ ಹಲವು ಪ್ರಶಸ್ತಿ ಗಳಿಸಿದ್ದಾಳೆ. ಯೋಗಾಸನದಲ್ಲಿ ಇನ್ನಷ್ಟು ಸಾಧನೆ ಮಾಡುವ ಹಂಬಲದಿಂದ ನಿತ್ಯ ಬೆಳಿಗ್ಗೆ ಆನ್ಲೈನ್ ಮೂಲಕ 2 ಗಂಟೆ ತರಬೇತಿ ಪಡೆಯುತ್ತಿದ್ದಾಳೆ. ಯೋಗಗುರುಗಳಾದ ಚಂದ್ರು, ಶರತ್, ಕೆ.ಆರ್. ನವೀನ್ ತರಬೇತಿ ನೀಡಿದ್ದಾರೆ. ಸದ್ಯ ಕಡೂರಿನ ಕೆ.ಆರ್. ನವೀನ್ ಆನ್ಲೈನ್ ತರಬೇತಿ ನೀಡುತ್ತಿದ್ದಾರೆ.
‘ಯೋಗಾಸನ, ಪ್ರಾಣಾಯಾಮ ಕಲಿಕೆಯಿಂದ ಮನಸ್ಸು ಸದಾ ಉಲ್ಲಾಸದಿಂದ ಇರುವಂತೆ ಮಾಡುತ್ತದೆ. ಯೋಗಾಸನ ಕಲಿಕೆ ಉತ್ತಮ ಆರೋಗ್ಯ ಕಾಪಾಡಿಕೊಳ್ಳಲು ಸಂಜೀವಿನಿ ಇದ್ದಂತೆ’ ಎನ್ನುತ್ತಾಳೆ ರುಥ್ವಿ.
ಭದ್ರಾವತಿ, ಮೈಸೂರು, ಕೋರಮಂಗಲ, ನವದೆಹಲಿ ಸೇರಿ 50 ಯೋಗಾಸನ ಸ್ಪರ್ಧೆಯಲ್ಲಿ ಪಾಲ್ಗೊಂಡು ಪ್ರಶಸ್ತಿಗಳನ್ನು ರುಥ್ವಿ ಮುಡಿಗೇರಿಸಿಕೊಂಡಿದ್ದಾಳೆ.
ರುಥ್ವಿ ಚಿಕ್ಕಂದಿನಲ್ಲಿಯೇ ಎಲ್ಲ ಕ್ಷೇತ್ರಗಳಲ್ಲೂ ಮುಂಚೂಣಿಯಲ್ಲಿದ್ದಾಳೆ. ಮಗಳ ಸಾಧನೆಗೆ ಬಿಜಿಎಸ್ ಶಿಕ್ಷಣ ಸಂಸ್ಥೆ ಪ್ರೋತ್ಸಾಹ ನೀಡುತ್ತಿದೆ.ಕೆ. ಮಂಜುನಾಥ– ಪೂರ್ಣಿಮಾ ರುಥ್ವಿ ಪೋಷಕರು
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.