ಬಿಜೆಪಿಯಿಂದ ಕುಟುಂಬ ರಾಜಕಾರಣ: ಸಿದ್ದರಾಮಯ್ಯ
ಶಿಗ್ಗಾವಿ (ಹಾವೇರಿ ಜಿಲ್ಲೆ): ‘ನೆಹರೂ ಕುಟುಂಬದ ಬಗ್ಗೆ ಬಿಜೆಪಿಯವರು ಟೀಕಿಸುತ್ತಾರೆ. ಕುಟುಂಬ ರಾಜಕಾರಣಕ್ಕೆ ಅವಕಾಶ ನೀಡಲ್ಲವೆಂದು ಪ್ರಧಾನಿ ನರೇಂದ್ರ ಮೋದಿ ಹೇಳುತ್ತಾರೆ. ಆದರೆ, ಬೊಮ್ಮಾಯಿ ಮಗ, ಯಡಿಯೂರಪ್ಪ ಅವರ ಇಬ್ಬರು ಮಕ್ಕಳು ಮತ್ತು ದೇವೇಗೌಡರ ಮಗ, ಸೊಸೆ ರಾಜಕೀಯದಲ್ಲಿದ್ದಾರೆ. ಇದು ಕುಟುಂಬ ರಾಜಕಾರಣವಲ್ಲವೇ’ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಪ್ರಶ್ನಿಸಿದರು.
ತಾಲ್ಲೂಕಿನ ಚಂದಾಪುರದಲ್ಲಿ ಕಾಂಗ್ರೆಸ್ ಪ್ರಚಾರ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ‘ಶಿಗ್ಗಾವಿಯಲ್ಲಿ ಬೊಮ್ಮಾಯಿ ಮಗನಿಗೆ ಹಾಗೂ ಚನ್ನಪಟ್ಟಣದಲ್ಲಿ ದೇವೇಗೌಡರ ಮೊಮ್ಮಗನಿಗೆ ಟಿಕೆಟ್ ಕೊಟ್ಟಿದ್ದಾರೆ. ಕುಟುಂಬ ರಾಜಕಾರಣ ಬೇಡ ಎಂದರೆ ಟಿಕೆಟ್ ಏಕೆ ಕೊಟ್ಟರು? ನಾವು ಎಲ್ಲಿಯೂ ಕುಟುಂಬ ರಾಜಕಾರಣ ವಿರೋಧಿಸಿಲ್ಲ’ ಎಂದರು.
‘ನನ್ನ ರಾಜಕೀಯ ಜೀವನ, ತೆರೆದ ಪುಸ್ತಕ. ಮುಡಾ ಬಗ್ಗೆ ಸುಳ್ಳು ಹೇಳಿ ನನ್ನ ಮೇಲೆ ಕಳಂಕ ತರಲು ಬಿಜೆಪಿ–ಜೆಡಿಎಸ್‌ನವರು ಯತ್ನಿಸಿದರು. 14 ನಿವೇಶನಕ್ಕಾಗಿ ಇಷ್ಟು ವರ್ಷ ನಾನು ರಾಜಕೀಯ ಮಾಡಬೇಕಾ? ಅರಿಶಿಣ-ಕುಂಕುಮಕ್ಕೆಂದು ನನ್ನ ಬಾಮೈದ, ನನ್ನ ಪತ್ನಿಗೆ ಜಮೀನು ನೀಡಿದ್ದ. ಇದೇ ಜಮೀನಿನಲ್ಲಿ ಮುಡಾದವರು ನಿವೇಶನ ಮಾಡಿದರು. ಆಗ, ಕಾನೂನು ಪ್ರಕಾರವೇ ನನ್ನ ಪತ್ನಿಗೆ 14 ನಿವೇಶನ ಕೊಟ್ಟರು. ಇದು ತಪ್ಪಾ’ ಎಂದರು.
ಬಸವರಾಜ ಬೊಮ್ಮಾಯಿ ಶಕುನಿಯೆಂದು ಎಲ್ಲರೂ ಹೇಳುತ್ತಾರೆ. ಮುಖ್ಯಮಂತ್ರಿಯಾಗಲು ಯಡಿಯೂರಪ್ಪಗೆ ಟಾಂಗ್ ಕೊಟ್ಟರು. ಅವರನ್ನು ರಾಜಕೀಯವಾಗಿ ಮುಗಿಸಲು ತಂತ್ರ ರೂಪಿಸಿದರು.ಸಿದ್ದರಾಮಯ್ಯ ಮುಖ್ಯಮಂತ್ರಿ
ಉಪಮುಖ್ಯಮಂತ್ರಿಯನ್ನಾಗಿ ಮಾಡಿ ರಾಜಕೀಯವಾಗಿ ಬೆಳೆಸಿದ್ದ ದೇವೇಗೌಡರಿಗೆ ಕೈಕೊಟ್ಟು ಕಾಂಗ್ರೆಸ್‌ಗೆ ಹೋದ ಸಿದ್ದರಾಮಯ್ಯ ಅವರು ನಿಜವಾದ ಶಕುನಿ ಎಂದು ಜನರು ಹೇಳುತ್ತಾರೆ.ಬಸವರಾಜ ಬೊಮ್ಮಾಯಿ ಸಂಸದ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.