ರಾಣೆಬೆನ್ನೂರು | ಅತ್ಯಾಚಾರ, ಕೊಲೆ: ಇಬ್ಬರು ಬಾಲಕರಿಗೆ 25 ವರ್ಷ ಜೈಲು

ರಾಣೆಬೆನ್ನೂರು (ಹಾವೇರಿ ಜಿಲ್ಲೆ): ಬಾಲಕಿಯ ಮೇಲೆ ಅತ್ಯಾಚಾರ ಎಸಗಿ, ಕೊಲೆ ಮಾಡಿದ ಇಬ್ಬರು ಬಾಲಕರಿಗೆ ಸೆಷನ್ಸ್‌ ನ್ಯಾಯಾಧೀಶ ನಿಂಗನಗೌಡ ಪಾಟೀಲ ಅವರು 25 ವರ್ಷ ಜೈಲು ಮತ್ತು ತಲಾ ₹ 3 ಲಕ್ಷ ದಂಡ ವಿಧಿಸಿ ಆದೇಶಿಸಿದ್ದಾರೆ.

ದಂಡದ ಹಣದಲ್ಲಿ ಮೃತ ಬಾಲಕಿಯ ತಾಯಿ ಮತ್ತು ತಮ್ಮನಿಗೆ ₹ 3 ಲಕ್ಷ ಪರಿಹಾರ, ಕರ್ನಾಟಕ ಸರ್ಕಾರವು ನೊಂದವರ ಪರಿಹಾರ ನಿಧಿ ಯೋಜನೆಯಡಿ ನೀಡುವ ಪರಿಹಾರ ನಿಧಿಯಿಂದ ಬಾಲಕಿಯ ತಾಯಿ, ತಮ್ಮನಿಗೆ ₹ 10 ಲಕ್ಷ ಪರಿಹಾರ ನೀಡಬೇಕೆಂದು ತೀರ್ಪು ನೀಡಿದ್ದಾರೆ.

ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕ ವಿಜಯಕುಮಾರ ಶಂಕರಗೌಡ ಪಾಟೀಲ ವಾದ ಮಂಡಿಸಿದ್ದರು.

ಹಿನ್ನೆಲೆ: 2016 ರಲ್ಲಿ ನ. 19ರಂದು ಇಬ್ಬರು ಬಾಲಕರು ಮನೆಯೊಂದರಲ್ಲಿ ಯಾರೂ ಇಲ್ಲದ ವೇಳೆ ಬಾಲಕಿಯನ್ನು ಸ್ಟೋರ್‌ ರೂಂಗೆ ಕರೆದೊಯ್ದು, ಅತ್ಯಾಚಾರ ಮಾಡಿ ಕುತ್ತಿಗೆಗೆ ಚಾಕುವಿನಿಂದ ಚುಚ್ಚಿ ಕೊಲೆ ಮಾಡಿದ್ದರು. ಈ ಬಗ್ಗೆ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ನಗರ ಠಾಣೆ ಸಿಪಿಐ ರವೀಂದ್ರ ಕುರುಬಗಟ್ಟಿ ಅವರು ತನಿಖೆ ಕೈಗೊಂಡು ಇಬ್ಬರು ಬಾಲಕರನ್ನು ಬಂಧಿಸಿ ಪೋಕ್ಸೊ ಕಾಯ್ದೆಯ ಅಡಿ ನ್ಯಾಯಾಲಯಕ್ಕೆ ದೋಷಾರೋಪಣ ಪಟ್ಟಿ ಸಲ್ಲಿಸಿದ್ದರು. ಸುಮಾರು 8 ವರ್ಷಗಳ ಕಾಲ ವಿಚಾರಣೆಯ ನಂತರ ಈಗ ನ್ಯಾಯಾಲಯವು ತೀರ್ಪು ನೀಡಿದೆ.