ಕೈಗಾರಿಕಾ ಕ್ಷೇತ್ರದಲ್ಲಿ ಕಳೆಗುಂದಿದ ಕಲಬುರ್ಗಿ

‘ರಾಜ್ಯದಲ್ಲಿ ರಸ್ತೆ ನಿರ್ಮಾಣ ಮತ್ತು ತಲಾ ಆದಾಯದಲ್ಲಿ ಕಲಬುರ್ಗಿಗೆ ಕೊನೆಯ ಸ್ಥಾನವಿದೆ ಎಂದು ‘ಸಾರಿಗೆ ಸಂಪರ್ಕ’ ವಿಷಯದ ಕುರಿತು ಮಾತನಾಡಿದ ಕಲಬುರ್ಗಿ ಸರ್ಕಾರಿ ಮಹಾವಿದ್ಯಾಲಯದ ಅರ್ಥಶಾಸ್ತ್ರ ವಿಭಾಗದ ಮುಖ್ಯಸ್ಥ ಡಾ. ಟಿ. ಗುರುಬಸಪ್ಪ ಬೇಸರ ವ್ಯಕ್ತಪಡಿಸಿದರು.

 

‘ಭಾರತದಲ್ಲಿ ಒಂದು ಲಕ್ಷ ಜನಸಂಖ್ಯೆಗೆ 275 ಕಿ.ಮೀ ರಸ್ತೆ ಇದೆ. ದೇಶದಲ್ಲಿ 100 ಕಿ.ಮೀ ವಿಸ್ತೀರ್ಣಕ್ಕೆ 64 ಕಿ. ಮೀ ರಸ್ತೆ ಇದ್ದು, ರಾಜ್ಯದಲ್ಲಿ ಇದು 44.07 ಕಿ.ಮೀ. ಕಲಬುರ್ಗಿ ವಿಷಯಕ್ಕೆ ಬಂದರೆ ಇದು ಕೇವಲ 26.02 ಕಿ.ಮೀ. ಅದೇ ಮಂಡ್ಯ ಜಿಲ್ಲೆಯೂ 69.34 ಕಿ.ಮೀ ರಸ್ತೆ ಹೊಂದುವ ಮೂಲಕ ದೇಶ ಮತ್ತು ರಾಜ್ಯವನ್ನು ಮೀರಿಸಿದೆ’ ಎಂದರು.  ‘ರಾಜ್ಯದಲ್ಲಿ ವಲಯವಾರು ರಸ್ತೆ ನಿರ್ಮಾಣವಾಗಿರುವುದನ್ನು ಗಮನಿಸಿದರೆ ಮೈಸೂರು (ಶೇ 29.38), ಬೆಂಗಳೂರು (ಶೇ 28.86), ಬೆಳಗಾವಿಯ  (ಶೇ 25.85) ನಂತರದ ಸ್ಥಾನ ಕಲಬುರ್ಗಿ (ಶೇ 15.88) ವಲಯಕ್ಕೆ ಇದೆ. ಇದರಲ್ಲಿ ಕಲಬುರ್ಗಿ ಜಿಲ್ಲೆಯಲ್ಲಿ ಶೇ 5.73ರಷ್ಟು ಮಾತ್ರ ರಸ್ತೆ ನಿರ್ಮಾಣವಾಗಿದೆ’ ಎಂದು ಅಂಕಿ–ಅಂಶಗಳನ್ನು ಮುಂದಿಟ್ಟರು. ‘ಭಾರತೀಯನೊಬ್ಬನ ತಲಾದಾಯವು ₹86,879 ಇದ್ದು, ರಾಜ್ಯದಲ್ಲಿ ಇದು ₹1,30, 897 ಇದೆ. ಅದೇ ಕಲಬುರ್ಗಿಯಲ್ಲಿ ಕೇವಲ ₹67, 886 ಇದೆ’ ಎಂದು ವಿವರಿಸಿದರು.

 

‘ಪ್ರತಿ ದಿನ ಕಲಬುರ್ಗಿ ಮಾರ್ಗವಾಗಿ 17 ರೈಲುಗಳು ಸಂಚರಿಸುತ್ತಿದ್ದು, 15 ರೈಲುಗಳು ವಾರದಲ್ಲಿ ಎರಡು ಅಥವಾ ಮೂರು ದಿನಕ್ಕೊಮ್ಮೆ ಸಂಚರಿಸುತ್ತವೆ. ಉಳಿದಂತೆ ವಾಡಿಯಿಂದ 6 ರೈಲು ಸಂಚರಿಸುತ್ತಿದ್ದರೂ ಬೆಂಗಳೂರು, ಮುಂಬೈ ಮತ್ತು ಹೈದರಾಬಾದ್‌ನಂಥ ಮಹಾನಗರಗಳಿಗೆ ತಿಂಗಳಿಗೆ ಮುಂಚಿತವಾಗಿ ಟಿಕೆಟ್‌ ಕಾಯ್ದಿರಿಸಬೇಕು. ಇದು ಈ ಭಾಗದಲ್ಲಿನ ರಾಜಕೀಯ ಇಚ್ಛಾಶಕ್ತಿಯ ಕೊರತೆಗೆ ಕೈಗನ್ನಡಿ’ ಎಂದರು.

 

‘ಸ್ವಾತಂತ್ರ್ಯ ಬಂದು 70 ವರ್ಷವಾಗಿದ್ದು, ವಿಮಾನ ಏರುವುದಲ್ಲ, ನೋಡದೆಯೇ ಒಂದು ತಲೆಮಾರು ಕಣ್ಮುಚ್ಚಿದೆ. ಎರಡನೇ ತಲೆಮಾರಿಗಾದರೂ ವಿಮಾನ ಕಾಣುವ ಭಾಗ್ಯ ಬಹುಬೇಗ ಬರಲಿ. ಇದರಿಂದ ಈ ಭಾಗದ ಅಭಿವೃದ್ಧಿ ಸೂಚ್ಯಂಕ ಹೆಚ್ಚಾಗಲಿದೆ’ ಎಂದರು.