ಕಲಬುರಗಿ: ಜಿಲ್ಲೆಯಾದ್ಯಂತ 1,925 ಬಿಪಿಎಲ್ ಕಾರ್ಡ್‌ಗಳು ಅನರ್ಹ

ಕಲಬುರಗಿ: ಜಿಲ್ಲೆಯಾದ್ಯಂತ ಆದಾಯ ತೆರಿಗೆ ಪಾವತಿದಾರರ, ಸರ್ಕಾರಿ/ ಅರೆ ಸರ್ಕಾರಿ ನೌಕರರ ಹಾಗೂ ₹1.20 ಲಕ್ಷಕ್ಕೂ ಮೀರಿದ ಆದಾಯ ಹೊಂದಿರುವ ಒಟ್ಟು 1,925 ಬಿಪಿಎಲ್‌ (ಬಡತನ ರೇಖೆಗಿಂತ ಕೆಳಗಿರುವವರು) ಕಾರ್ಡ್‌ಗಳನ್ನು ಎಪಿಎಲ್ (ಬಡತನ ರೇಖೆಗಿಂತ ಮೇಲಿರುವವರು) ಕಾರ್ಡ್‌ಗಳಾಗಿ ಬದಲಾವಣೆ ಮಾಡಲಾಗಿದೆ.

ಆಹಾರ, ನಾಗರಿಕ ಸರಬರಾಜು ಹಾಗೂ ಗ್ರಾಹಕ ವ್ಯವಹಾರಗಳ ಇಲಾಖೆಯು ಕಳೆದ ಎರಡು ತಿಂಗಳಿಂದ ಬಿಪಿಎಲ್‌ ಹಾಗೂ ಎಪಿಎಲ್‌ ಕಾರ್ಡ್‌ದಾರರ ಸ್ಥಾನಮಾನವನ್ನು ಆಧರಿಸಿ ಅವರ ಕಾರ್ಡ್‌ಗಳನ್ನು ಪರಿಷ್ಕರಿಸುವ ಕಾರ್ಯಯನ್ನು ಕೈಗೆತ್ತಿಕೊಂಡಿದೆ. ಈ ಅವಧಿಯಲ್ಲಿ ಸರ್ಕಾರಿ/ ಅರೆ ಸರ್ಕಾರಿ ನೌಕರರ 360 ಹಾಗೂ ಆದಾಯ ತೆರಿಗೆ ಪಾವತಿ ಮತ್ತು ₹1.20 ಲಕ್ಷಕ್ಕೂ ಮೀರಿದ ಆದಾಯದ ಮಾನದಂಡದಡಿ 1,565 ಕಾರ್ಡ್‌ಗಳು ಎಪಿಎಲ್‌ ಆಗಿವೆ.

ಬಿಪಿಎಲ್‌ ಕಾರ್ಡ್‌ಗಳನ್ನು ಪಡೆದು ಅವುಗಳನ್ನು ದುರುಪಯೋಗ ಮಾಡಿಕೊಂಡಿದ್ದ 12 ಮಂದಿ ಸರ್ಕಾರಿ ನೌಕರರಿಂದ ₹18 ಸಾವಿರ ದಂಡ ವಸೂಲಿ ಮಾಡಲಾಗಿದೆ. 60ಕ್ಕೂ ಹೆಚ್ಚು ನೌಕರರಿಗೆ ನೋಟಿಸ್ ಸಹ ಕೊಡಲಾಗಿದೆ. ಬದಲಾವಣೆಯಾದ 1,565 ಕಾರ್ಡ್‌ದಾರರಲ್ಲಿ 70 ಜನರಿಗೆ ನೋಟಿಸ್ ಹೋಗಿದೆ ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದರು.

ಅಫಜಲಪುರ ತಾಲ್ಲೂಕಿನ 82, ಆಳಂದದ 197, ಚಿಂಚೋಳಿಯ 75, ಚಿತ್ತಾಪುರದ 145, ಜೇವರ್ಗಿಯ 66, ಕಲಬುರಗಿಯ 769, ಕಾಳಗಿಯ 36, ಕಮಲಾಪುರದ 55, ಸೇಡಂನ 59, ಶಹಾಬಾದ್‌ನ 39 ಹಾಗೂ ಯಡ್ರಾಮಿ ತಾಲ್ಲೂಕಿನ 42 ತೆರಿಗೆ ಪಾವತಿದಾರರ ಬಿಪಿಎಲ್‌ ಕಾರ್ಡ್‌ಗಳು ಅನರ್ಹವಾಗಿವೆ.

ಅಫಜಲಪುರದ 11, ಆಳಂದದ 48, ಚಿಂಚೋಳಿಯ 14, ಚಿತ್ತಾಪುರದ 15, ಜೇವರ್ಗಿಯ 7, ಕಲಬುರಗಿಯ 224, ಕಾಳಗಿಯ 5, ಕಮಲಾಪುರದ 21, ಸೇಡಂನ 3, ಶಹಾಬಾದ್‌ನ 2 ಹಾಗೂ ಯಡ್ರಾಮಿ ತಾಲ್ಲೂಕಿನ 10 ಸರ್ಕಾರಿ/ ಅರೆ ಸರ್ಕಾರಿ ನೌಕರರು ತಮ್ಮ ಬಿಪಿಎಲ್‌ ಕಾರ್ಡ್‌ಗಳ ಮಾನ್ಯತೆಯನ್ನು ಕಳೆದುಕೊಂಡಿದ್ದಾರೆ.

15,535 ಬಿಪಿಎಲ್‌ ಕಾರ್ಡ್‌ಗಳು ತಾತ್ಕಾಲಿಕ ಅಮಾನತು: ವಿವಿಧ ಕಾರಣಗಳಿಗಾಗಿ ಕಳೆದ ಆರು ತಿಂಗಳಿನಿಂದ ಪಡಿತರ ಪಡೆಯದ 15,535 ಬಿಪಿಎಲ್ ಕಾರ್ಡ್‌ಗಳನ್ನು ತಾತ್ಕಾಲಿಕವಾಗಿ ಅಮಾನತು ಮಾಡಲಾಗಿದೆ.  ಕಾರ್ಡ್ ಹೊಂದಿದವರು ಮುಂದೆ ಬಂದು ಇನ್ನು ಮುಂದೆ ತಾವು ಪಡಿತರ ಪಡೆಯುವುದಾಗಿ ತಿಳಿಸಿದರೆ, ತಾತ್ಕಾಲಿಕ ಅಮಾನತು ರದ್ದು ಹಿಂಪಡೆಯಲಾಗುವುದು ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.

‘ಕುಟುಂಬದ ಮುಖ್ಯಸ್ಥರ ಆದಾಯ ಮಾತ್ರ ಪರಿಗಣನೆ’

‘ಕುಟುಂಬದ ಸದಸ್ಯರು ಹೊಂದಿರುವ ಆದಾಯ ಪ್ರಮಾಣ ಪತ್ರಗಳಲ್ಲಿನ ಎಲ್ಲ ಆದಾಯವನ್ನು ಒಗ್ಗೂಡಿಸಿ ₹1.20 ಲಕ್ಷಕ್ಕೂ ಅಧಿಕ ಆದಾಯವೆಂದು ಪರಿಗಣನೆಗೆ ತೆಗೆದುಕೊಂಡಿದ್ದರಿಂದ ಕೆಲವು ಅರ್ಹ ಬಿಪಿಎಲ್‌ ಕಾರ್ಡ್‌ಗಳು ಎಪಿಎಲ್‌ಗೆ ಬದಲಾವಣೆಯಾಗಿವೆ. ಇದು ಸರಿಯಾದ ಮಾನದಂಡ ಅಲ್ಲ ಎಂಬುದನ್ನು ಈಗಾಗಲೇ ಇಲಾಖೆಯ ಆಯುಕ್ತರ ಗಮನಕ್ಕೆ ತರಲಾಗಿದೆ’ ಎಂದು ಆಹಾರ ನಾಗರಿಕ ಸರಬರಾಜು ಮತ್ತು ಗ್ರಾಹಕ ವ್ಯವಹಾರಗಳ ಇಲಾಖೆಯ ಜಂಟಿ ನಿರ್ದೇಶಕ ಭೀಮರಾಯ ಕಲ್ಲೂರ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ವಾರ್ಷಿಕ ಆದಾಯದ ಮಿತಿಯನ್ನು ಕುಟುಂಬದ ಮುಖ್ಯಸ್ಥರು ಹೊಂದಿರುವ ಆದಾಯವನ್ನು ಮಾತ್ರವೇ ಪರಿಗಣಿಸಲಾಗುತ್ತದೆ. ಹೀಗಾಗಿ ಅರ್ಹ ಬಿಪಿಎಲ್‌ ಕಾರ್ಡ್‌ದಾರು ತಾವು ಆದಾಯ ತೆರಿಗೆ ಪಾವತಿದಾರರಲ್ಲ ನಿಗದಿಗಿಂತ ಹೆಚ್ಚಿನ ಆದಾಯ ಹೊಂದಿಲ್ಲ ಎಂದು ಅರ್ಜಿ ಕೊಟ್ಟರೆ ಅದನ್ನು ಇಲಾಖೆಯ ಆಯುಕ್ತರಿಗೆ ಕಳುಹಿಸುತ್ತೇವೆ. ಬಳಿಕ ಬಿಪಿಎಲ್‌ ಕಾರ್ಡ್‌ ಮಾನ್ಯತೆ ನೀಡಲಾಗುವುದು’ ಎಂದರು. ‘ಇಂತಹ ಎಂಟೊಂಬತ್ತು ಪ್ರಕರಣಗಳು ಗಮನಕ್ಕೆ ಬಂದಿದ್ದು ಅವುಗಳ ಇತ್ಯರ್ಥಕ್ಕೆ ಕ್ರಮ ವಹಿಸಲಾಗಿದೆ. ಒಂದೇ ಒಂದು ಬಿಪಿಎಲ್ ಕಾರ್ಡ್‌ ರದ್ದು ಮಾಡಿಲ್ಲ’ ಎಂದು ಹೇಳಿದರು.