ರೈತರಿಗೆ ₹ 439 ಕೋಟಿ ಸಾಲ ವಿತರಣೆ- ಸಹಕಾರ ಸಚಿವ ಎಸ್.ಟಿ. ಸೋಮಶೇಖರ್

ಕಲಬುರಗಿ: ಕಲಬುರಗಿ–ಯಾದಗಿರಿ ಜಿಲ್ಲೆಗಳ 1,35,461 ರೈತರಿಗೆ ಶೂನ್ಯ ಬಡ್ಡಿದರದಲ್ಲಿ ಡಿಸಿಸಿ ಬ್ಯಾಂಕ್ ಮೂಲಕ ಒಟ್ಟು ₹ 439 ಕೋಟಿ ಸಾಲ ವಿತರಿಸಲಾಗಿದೆ ಎಂದು ಸಹಕಾರ ಸಚಿವ ಎಸ್.ಟಿ. ಸೋಮಶೇಖರ್ ತಿಳಿಸಿದ್ದಾರೆ.

ವಿಧಾನಪರಿಷತ್ ಸದಸ್ಯ ಬಿ.ಜಿ. ಪಾಟೀಲ ಅವರ ಪ್ರಶ್ನೆಗೆ ಇತ್ತೀಚೆಗೆ ಸದನದಲ್ಲಿ ಲಿಖಿತ ಉತ್ತರ ನೀಡಿದ ಸಚಿವರು, ಕಲಬುರಗಿ ಜಿಲ್ಲೆಯ 94,395 ರೈತರಿಗೆ ₹ 306.94 ಕೋಟಿ, ಯಾದಗಿರಿ ಜಿಲ್ಲೆಯ 41066 ರೈತರಿಗೆ ₹ 132 ಕೋಟಿ ಸಾಲ ನೀಡಲಾಗಿದೆ. ಕನಿಷ್ಠ ₹ 25 ಸಾವಿರದಿಂದ ಗರಿಷ್ಠ ₹3 ಲಕ್ಷದವರೆಗೆ ಸಾಲ ವಿತರಣೆ ಮಾಡಲಾಗಿದೆ. ಅರ್ಜಿ ಸಲ್ಲಿಸಿದ ಎಲ್ಲ ರೈತರಿಗೂ ಸಾಲ ವಿತರಿಸಲಾಗಿದೆ. ಕಲಬುರಗಿ–ಯಾದಗಿರಿ ಜಿಲ್ಲೆಗಳ 1,33,333 ರೈತರಿಗೆ ₹ 400 ಕೋಟಿಗಳ ಅಲ್ಪಾವಧಿ ಬೆಳೆ ಸಾಲ ವಿತರಿಸಲಾಗಿದ್ದು, ನವೆಂಬರ್ 30ರವರೆಗೆ 1,35,461 ರೈತರು ಸಾಲವನ್ನು ಪಡೆದಿದ್ದಾರೆ. 58,598 ರೈತರಿಗೆ ಹೊಸದಾಗಿ ಸಾಲ ವಿತರಿಸಲಾಗಿದೆ ಎಂದು ಹೇಳಿದ್ದಾರೆ.