ಕಲಬುರಗಿ: ‘ಅಮೃತ ಭಾರತ ನಿಲ್ದಾಣ’ಕ್ಕಿಲ್ಲ ವೇಗ

ಕಲಬುರಗಿ: ರೈಲು ನಿಲ್ದಾಣಗಳ ಆಧುನೀಕರಣಕ್ಕೆ ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಅಮೃತ ಭಾರತ ನಿಲ್ದಾಣ ಯೋಜನೆ ಜಿಲ್ಲೆಯಲ್ಲಿ ಇನ್ನೂ ವೇಗ ಪಡೆದಿಲ್ಲ.

2023ರಲ್ಲಿ ಕೇಂದ್ರ ಸರ್ಕಾರ ಜಾರಿ ಮಾಡಿದ ಈ ಯೋಜನೆಗೆ ಕೇಂದ್ರ ರೈಲ್ವೆ ವಲಯದ ಸೋಲಾಪುರ ವಿಭಾಗದ ಒಟ್ಟು 15 ನಿಲ್ದಾಣಗಳು ಆಯ್ಕೆಯಾಗಿದ್ದವು. ಜಿಲ್ಲೆಯ ವಾಡಿ, ಕಲಬುರಗಿ, ಶಹಾಬಾದ್ ಹಾಗೂ ಗಾಣಗಾಪುರ ರೋಡ್ ನಿಲ್ದಾಣಗಳೂ ಈ ಪಟ್ಟಿ ಸೇರಿದ್ದವು.

ಈ ಯೋಜನೆಯಡಿ ಕಲಬುರಗಿ ರೈಲು ನಿಲ್ದಾಣಕ್ಕೆ ₹ 29.55 ಕೋಟಿ, ಶಹಾಬಾದ್‌ ನಿಲ್ದಾಣ ₹ 26.76 ಕೋಟಿ ಹಾಗೂ ವಾಡಿ ₹ 36.32 ಕೋಟಿ, ಗಾಣಗಾಪುರ ನಿಲ್ದಾಣಕ್ಕೆ ₹ 20.78 ಕೋಟಿ ಮಂಜೂರು ಮಾಡಲಾಗಿದೆ. ಟೆಂಡರ್‌ ಪ್ರಕ್ರಿಯೆ ಮುಗಿದಿದೆ. ಕೆಲ ನಿಲ್ದಾಣಗಳಲ್ಲಿ ಆರಂಭಿಸಲಾದ ಕಾಮಗಾರಿಗಳು ಆಮೆಗತಿಯಲ್ಲಿ ನಡೆಯುತ್ತಿವೆ. ಇನ್ನೂ ಕೆಲ ಕಡೆ ಸ್ಥಗಿತಗೊಂಡಿವೆ.

ಕಲಬುರಗಿ ರೈಲು ನಿಲ್ದಾಣದಲ್ಲಿ ಎಲೆಕ್ಟ್ರಿಕ್ ಕೊಠಡಿ, ಮಾದರಿ ಶೌಚಾಲಯ ನಿರ್ಮಾಣ ಮತ್ತು ಸಂಚಾರ ಪ್ರದೇಶದ ಸುಧಾರಣೆ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ. ಅದೂ ಆಮೆಗತಿಯಲ್ಲಿ ನಡೆಯುತ್ತಿದೆ.

ವಾಡಿಯಲ್ಲಿ ರೈಲು ನಿಲ್ದಾಣದ ಕಟ್ಟಡ ನಿರ್ಮಾಣ ಕಾಮಗಾರಿ ಮಾತ್ರ ನಡೆಯುತ್ತಿದೆ. ಶಹಾಬಾದ್‌ನಲ್ಲಿ ಶೌಚಾಲಯ ನಿರ್ಮಾಣ ಮಾಡಲಾಗಿದೆ. ರಸ್ತೆ ನಿರ್ಮಾಣ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ. ಉದ್ಯಾನ ನಿರ್ಮಾಣ ಕಾಮಗಾರಿ ಆರಂಭಿಕ ಹಂತದಲ್ಲಿಯೇ ಸ್ಥಗಿತಗೊಂಡಿದೆ. ಗಾಣಗಾಪುರ ರೋಡ್ ನಿಲ್ದಾಣದಲ್ಲಿ ಕಟ್ಟಡ ನಿರ್ಮಾಣ ಕಾಮಗಾರಿಯನ್ನು ಮಾತ್ರ ಆರಂಭಿಸಲಾಗಿದೆ.

ಕಲಬುರಗಿ ನಿಲ್ದಾಣದಲ್ಲಿ ಮತ್ತೊಂದು ಪ್ರವೇಶ ದ್ವಾರ:

‘ವಾಹನ ಮತ್ತು ‍ಪ್ರಯಾಣಿಕರ ದಟ್ಟಣೆ ಹೆಚ್ಚುತ್ತಿರುವ ಕಾರಣ ಮತ್ತೊಂದು ಪ್ರವೇಶ ದ್ವಾರದ ಅಗತ್ಯ ಇದೆ. ಆದ ಕಾರಣ ಎಸ್‌.ಆರ್‌.ಕಾಂಟಿನೆಂಟಲ್ ಹೋಟೆಲ್ ಎದುರು ಹೊಸ ಪ್ರವೇಶ ದ್ವಾರ ನಿರ್ಮಿಸಲಾಗುವುದು. ಮುಖ್ಯ ಪ್ರವೇಶ ದ್ವಾರವನ್ನೂ ನವೀಕರಣ ಮಾಡಲಾಗುವುದು. ಕೆಲ ದಿನಗಳಲ್ಲಿಯೇ ಕಾಮಗಾರಿ ಆರಂಭಿಸಲಾಗುವುದು’ ಎಂದು ರೈಲು ನಿಲ್ದಾಣದ ವ್ಯವಸ್ಥಾಪಕ ಪಿ.ಜೆ.ಜಿಜಿಮೋನ್ ತಿಳಿಸಿದರು.

ವಾಡಿಯಲ್ಲಿ ಕೆಳ ಸೇತುವೆ ನಿರ್ಮಾಣಕ್ಕೆ ಒತ್ತಾಯ:

ವಾಡಿ ಪಟ್ಟಣ ರೈಲು ಹಳಿಯ ಎರಡು ಬದಿಗಳಲ್ಲೂ ವಿಸ್ತರಿಸಿದೆ. ಸರಿಯಾದ ರಸ್ತೆಯೂ ಇಲ್ಲ. ಆದ್ದರಿಂದ ಎರಡೂ ಬದಿಯ ಬಡಾವಣೆಗಳ ನಿವಾಸಿಗಳಿಗೆ ತೊಂದರೆಯಾಗುತ್ತಿದೆ. ಕಾರಣ ಕೆಳ ಸೇತುವೆ ನಿರ್ಮಿಸುವುದು ಅಗತ್ಯ. ಹಲವು ವರ್ಷಗಳಿಂದ ಹೋರಾಟ ಮಾಡಿಕೊಂಡು ಬರಲಾಗಿದೆ. ಸ್ಪಂದಿಸಿಲ್ಲ. ಅಮೃತ ಭಾರತ ನಿಲ್ದಾಣ ಯೋಜನೆಯಡಿ ಸೇತುವೆ ನಿರ್ಮಾಣದ ಪ್ರಸ್ತಾಪ ಮಾಡದಿರುವುದು ದುರಂತ ಎಂದು ವಾಡಿಯ ಹೋರಾಟಗಾರರು ತಿಳಿಸುತ್ತಾರೆ.

ಅಮೃತ ಭಾರತ ನಿಲ್ದಾಣ ಯೋಜನೆಯಡಿ ಕೈಗೊಳ್ಳಬೇಕಾದ ಅಭಿವೃದ್ಧಿ ಕಾಮಗಾರಿಗಳು

l ನಿಲ್ದಾಣ ಕಟ್ಟಡ ನವೀಕರಣ

l ಸಂಚಾರ ಪ್ರದೇಶದ ಸುಧಾರಣೆ

l ವಾಹನ ನಿಲುಗಡೆ ವ್ಯವಸ್ಥೆ

l ಪಾದಚಾರಿ ಸೇತುವೆಗಳ ವಿಸ್ತರಣೆ

l ಉದ್ಯಾನ ನಿರ್ಮಾಣ

l ಸುಧಾರಿತ ಬೆಳಕಿನ ವ್ಯವಸ್ಥೆ

l ಶೌಚಾಲಯ ನಿರ್ಮಾಣ

l ನಿರೀಕ್ಷಣಾ ಕೊಠಡಿಗಳ ಅಭಿವೃದ್ಧಿ

l ಎಸ್ಕಲೇಟರ್, ಲಿಫ್ಟ್‌ ಅಳವಡಿಕೆ

lಸುಧಾರಿತ ಸೂಚನಾ ಫಲಕಗಳು

l ಪ್ರವೇಶ ದ್ವಾರಗಳ ನವೀಕರಣ

l ಪ್ಲಾಟ್‌ ಫಾರಂ ಅಭಿವೃದ್ಧಿ