ವಿದ್ಯುತ್, ರಸಗೊಬ್ಬರ ಕೇಳಿದ ರೈತರೊಂದಿಗೆ ಖೂಬಾ ಉಡಾಫೆ ವರ್ತನೆ: ಸಾಗರ್ ಖಂಡ್ರೆ

ಚಿಂಚೋಳಿ: ‘ಸಚಿವ ಖೂಬಾ ಅವರಿಗೆ ರೈತನೊಬ್ಬ ಕರೆ ಮಾಡಿ ವಿದ್ಯುತ್ ಕೊಡಿಸಿ ಎಂದರೆ ನನ್ನ ಕಾರಿನ ಡಿಕ್ಕಿಯಲ್ಲಿದೆ ಒಯ್ಯಿರಿ ಎಂದಿದ್ದಲ್ಲದೇ, ರಸಗೊಬ್ಬರ ಕೇಳಿದ ರೈತ ಹಾಗೂ ಸರ್ಕಾರಿ ನೌಕರನೊಂದಿಗೆ ಉಡಾಫೆಯಿಂದ ವರ್ತಿಸಿ ಆತನನ್ನು ಅಮಾನತು ಮಾಡಿಸಿದರು. ಅವರಿಗೆ ರೈತರ ಮತ ಕೇಳುವ ನೈತಿಕತೆಯಿಲ್ಲ’ ಎಂದು ಕಾಂಗ್ರೆಸ್ ಅಭ್ಯರ್ಥಿ ಸಾಗರ್ ಈಶ್ವರ್ ಖಂಡ್ರೆ ಹೇಳಿದರು.

ಬೀದರ್ ಲೋಕಸಭಾ ಮತಕ್ಷೇತ್ರದ ವ್ಯಾಪ್ತಿಯ ಚಿಂಚೋಳಿ ತಾಲ್ಲೂಕಿನ ಐನೋಳ್ಳಿಯಲ್ಲಿ ಗುರುವಾರ ನಡೆದ ಕಾಂಗ್ರೆಸ್ ಚುನಾವಣಾ ಪ್ರಚಾರ ಸಭೆಯಲ್ಲಿ ಮಾತನಾಡಿದರು.

‘ಕೇಂದ್ರ ಸಚಿವ ಭಗವಂತ ಖೂಬಾಗೆ ರೈತರ ಬಗ್ಗೆ ಕಾಳಜಿಯಿಲ್ಲ. ಅವರು ಬೇರೆಯೊಬ್ಬರ ಹೆಸರಲ್ಲಿ ಎರಡು ಚುನಾವಣೆ ಗೆದ್ದಿದ್ದಾರೆ. ಈಗಲೂ ಅದೇ ತವಕದಲ್ಲಿದ್ದಾರೆ ಹೀಗಾಗಿ ನೀವು ಅವರಿಗೆ ತಕ್ಕ ಪಾಠ ಕಲಿಸಬೇಕು’ ಎಂದರು.

ಜಿ.ಪಂ. ಮಾಜಿ ಅಧ್ಯಕ್ಷ ದೀಪಕನಾಗ್ ಪುಣ್ಯಶೆಟ್ಟಿ, ಮಾಜಿ ಶಾಸಕ ಕೈಲಾಸ ವೀರೇಂದ್ರ ಪಾಟೀಲ, ಕೆಪಿಸಿಸಿ ಉಪಾಧ್ಯಕ್ಷ ಸುಭಾಷ ರಾಠೋಡ್, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಜಗದೇವ ಗುತ್ತೇದಾರ, ಮುಖಂಡ ಬಾಬುರಾವ್ ಪಾಟೀಲ, ಲಕ್ಷ್ಮಣ ಆವುಂಟಿ, ಲಕ್ಷ್ಮಿ ಮಂಜುನಾಥ ಕೊರವಿ, ಆನಂದ ಟೈಗರ್ ಮಾತನಾಡಿದರು.

ಸುರೇಶ ಬಂಟಾ, ಮಹಿಮೂದ್ ಪಟೇಲ್, ಬಸವರಾಜ ಮಾಲಿ, ಅಜೀತ ಪಾಟೀಲ, ಸಂತೋಷ ಗುತ್ತೇದಾರ, ವೀರಶೆಟ್ಟಿ ಪಾಟೀಲ ನಾಗಾಈದಲಾಯಿ, ಬಕ್ಕಪ್ಪ ಕಾಮಣಿ, ಅಲ್ಲಾವುದ್ದಿನ್ ಅನ್ಸಾರಿ, ರಾಜು ಮಂದಾ, ಮಶಾಖ ಲಕಪತಿ, ಇಬ್ರಾಹಿಂಸಾಬ್ ದೇಗಲಮಡಿ, ವಿಜಯಕುಮಾರ ರೊಟ್ಟಿ, ಶರಣು ಪಪ್ಪಾ ಮೊದಲಾದವರು ಉಪಸ್ಥಿತರಿದ್ದರು.

Quote - ವಿಧಾನಸಭೆ ಚುನಾವಣೆಯಲ್ಲಿ ವಾಗ್ದಾನ ಮಾಡಿದಂತೆ 5 ಗ್ಯಾರಂಟಿ ಜಾರಿ ಮಾಡಿದೆ. ಈಗ ಕೇಂದ್ರದಲ್ಲಿ ಅಧಿಕಾರ ಕೊಡಿ 25 ಗ್ಯಾರಂಟಿ ಜಾರಿಯಾಗುತ್ತವೆ ಕೈಲಾಸ ವೀರೇಂದ್ರ ಪಾಟೀಲ ಮಾಜಿ ಶಾಸಕ