KKRTC | ಮೊದಲ ಬಾರಿಗೆ ‘ಕಲ್ಯಾಣರಥ’ ಆರಂಭ: ಸಿಂಧನೂರಿನಿಂದ ಬೆಂಗಳೂರಿಗೆ ಸಂಚಾರ

ಕಲಬುರಗಿ: ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮ (ಕೆಕೆಆರ್‌ಟಿಸಿ)ವು ಆರಂಭವಾದ 23 ವರ್ಷಗಳ ಬಳಿಕ ಮೊದಲ ಬಾರಿಗೆ ಇದೇ 28ರಿಂದ ಐಷಾರಾಮಿ ವೋಲ್ವೊ ಮಲ್ಟಿ ಆ್ಯಕ್ಸೆಲ್ ಎ.ಸಿ. ಸ್ಲೀಪರ್ ಬಸ್ (ಕಲ್ಯಾಣ ರಥ) ಸೇವೆಯನ್ನು ಆರಂಭಿಸಲಿದ್ದು, ಪ್ರಯಾಣಿಕರಿಗೆ ‘ಹಿತಾನುಭವ’ ನೀಡಲು ಮುಂದಾಗಿದೆ.

ರಾಯಚೂರು ಜಿಲ್ಲೆಯ ಸಿಂಧನೂರು–ಬೆಂಗಳೂರು ಮಧ್ಯೆ ಅಂದು ಮಧ್ಯಾಹ್ನ 12ಕ್ಕೆ ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ ಅವರು ನೂತನ ಬಸ್‌ ಲೋಕಾರ್ಪಣೆ ಮಾಡಲಿದ್ದು, ಅಂದು ರಾತ್ರಿ 10ಕ್ಕೆ ತನ್ನ ಮೊದಲ ಪ್ರಯಾಣವನ್ನು ಆರಂಭಿಸಲಿದೆ.

ಕೆಕೆಆರ್‌ಟಿಸಿಯು ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿಯ ₹ 40 ಕೋಟಿ ಅನುದಾನ ಹಾಗೂ ಬ್ಯಾಂಕಿನಿಂದ ಸಾಲ ಪಡೆದು ₹ 330 ಕೋಟಿ ವೆಚ್ಚದಲ್ಲಿ ಆರು ವೋಲ್ವೊ, 30 ನಾನ್ ಎ.ಸಿ. ಸ್ಲೀಪರ್ ಸೇರಿದಂತೆ 802 ಬಸ್‌ಗಳನ್ನು ಖರೀದಿಸುತ್ತಿದೆ. ಮೊದಲ ಹಂತದಲ್ಲಿ 380ಕ್ಕೂ ಅಧಿಕ ಎಕ್ಸ್‌ಪ್ರೆಸ್ ಬಸ್ ಹಾಗೂ ಎರಡು ವೋಲ್ವೊ ಮಲ್ಟಿ ಆ್ಯಕ್ಸೆಲ್ ಸ್ಲೀಪರ್ ಬಸ್‌ಗಳು ನಿಗಮಕ್ಕೆ ಬಂದಿವೆ.

ಮೊದಲಿಗೆ ನಿಗಮದ ಕೇಂದ್ರ ಕಚೇರಿ ಇರುವ ಕಲಬುರಗಿಯಿಂದಲೇ ಬೆಂಗಳೂರಿಗೆ ವೋಲ್ವೊ ಬಸ್ ಸೇವೆಯನ್ನು ಆರಂಭಿಸಲು ಚಿಂತನೆ ನಡೆದಿತ್ತು. ಆದರೆ, ಕಲಬುರಗಿಯಿಂದ ಬೆಂಗಳೂರಿಗೆ ನಿಗಮದಿಂದ ಎ.ಸಿ. ಬಸ್ ಸೇವೆ ಈಗಾಗಲೇ ಇದೆ. ಜೊತೆಗೆ, ವಿಮಾನ, ರೈಲುಗಳ ಸಂಚಾರವೂ ಇರುವುದರಿಂದ ಇನ್ನೊಂದು ತಿಂಗಳಲ್ಲಿ ಬರುವ ಮತ್ತೆರಡು ವೋಲ್ವೊ ಬಸ್‌ಗಳನ್ನು ಇಲ್ಲಿಂದ ಕಾರ್ಯಾಚರಣೆ ನಡೆಸಲು ತೀರ್ಮಾನಿಸಲಾಗಿದೆ ಎಂದು ನಿಗಮದ ಹಿರಿಯ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದ್ದಾರೆ.

ರಾಯಚೂರು ಜಿಲ್ಲೆಯಿಂದ ಸದ್ಯಕ್ಕೆ ನಿಗಮದಿಂದ ಎ.ಸಿ. ಬಸ್ ಸೇವೆ ಇಲ್ಲ. ಹೀಗಾಗಿ, ಮೊದಲ ಎರಡು ಬಸ್‌ಗಳು ರಾಯಚೂರಿನ ಸಿಂಧನೂರಿನಿಂದ ಸಂಚರಿಸಲಿವೆ ಎಂದು ಮೂಲಗಳು ಮಾಹಿತಿ ನೀಡಿವೆ.

ಸದ್ಯಕ್ಕೆ ಎರಡು ವೋಲ್ವೊ ಬಸ್‌ಗಳನ್ನು ರಾಯಚೂರು ಜಿಲ್ಲೆಗೆ ನಿಯೋಜಿಸಲಾಗಿದ್ದು, 28ರಿಂದ ರಾತ್ರಿ ಒಂದು ಬಸ್ ಸಿಂಧನೂರಿನಿಂದ ಹೊರಟರೆ, ಮತ್ತೊಂದು ಬಸ್ ಬೆಂಗಳೂರಿನಿಂದ ಸಿಂಧನೂರಿಗೆ ಬರಲಿದೆ. ಒಂದು ತಿಂಗಳಲ್ಲಿ ನಾಲ್ಕು ವೋಲ್ವೊ ಬಸ್‌ಗಳು ನಿಗಮಕ್ಕೆ ಸೇರ್ಪಡೆಯಾಗಲಿದ್ದು, ಅವುಗಳನ್ನು ಕಲಬುರಗಿ ಹಾಗೂ ವಿಜಯಪುರದಿಂದ ಓಡಿಸುವ ಸಾಧ್ಯತೆ ಇದೆ.