ಕಾಳಗಿ: ನರಸಮ್ಮಗೆ ಬೇಕಿದೆ ಸ್ವಂತ ಸೂರಿನ ಆಸರೆ

ಕಾಳಗಿ: ‘ಹೊಲ ಇಲ್ಲ, ಮನೆಯಿಲ್ಲ ಇಲ್ಲ ಸರ್‌, ಇಷ್ಟು ವರ್ಷ ಬಾಡಿಗೆ ಮನೆಯಲ್ಲಿಯೇ ಇದ್ದೇವೆ, ಈಗ ಬಾಡಿಗೆ ಕಟ್ಟಲು ಸಾಧ್ಯವಾಗುತ್ತಿಲ್ಲ, ಇನ್ನು ಮುಂದೆ ನಮಗೆ ಬಸ್ಟಾಂಡೇ ಗತಿ... ಇವು ತಾಲ್ಲೂಕಿನ ಕೋಡ್ಲಿ ಗ್ರಾಮದ ವೃದ್ಧೆ ನರಸರಮ್ಮ ನಾರಾಯಣ ಇಟಗಿ ಅವರ ಅಳಲು.

ಸರ್ಕಾರ, ನಿರ್ಗತಿಕರು, ಆರ್ಥಿಕವಾಗಿ ಹಿಂದುಳಿದವರಿಗಾಗಿಯೇ ವಸತಿ ಯೋಜನೆ ಜಾರಿಗೊಳಿಸಿದೆ. ಆದರೆ ಅರ್ಹರಿಗೆ ಮಾತ್ರ ಯೋಜನೆಗಳ ಲಾಭ ಸಿಗುತ್ತಿಲ್ಲ. ಅದಕ್ಕೆ ನರಸಮ್ಮ ತಾಜಾ ಉದಾಹರಣೆಯಾಗಿದ್ದಾರೆ.

ರಾಮತೀರ್ಥ ಗ್ರಾಮದ ನರಸಮ್ಮ ಅವರನ್ನು ಕೋಡ್ಲಿ ಗ್ರಾಮದ ನಾರಾಯಣ ಅವರೊಂದಿಗೆ ವಿವಾಹ ಮಾಡಿಕೊಡಲಾಗಿತ್ತು. ನಾರಾಯಣ ಅವರಿಗೆ ಹೊಲ, ಮನೆಯಿಲ್ಲದೇ ಹಮಾಲಿ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದರು. ಆದರೆ ಕಾರಣಾಂತರಗಳಿಂದ ಅವರು ನಿಧನರಾಗಿದ್ದರಿಂದ, ಕುಟುಂಬ ಬೀದಿಗೆ ಬಂದಿದೆ.

ನರಸಮ್ಮ(65) ಅವರ ಪತಿ ತೀರಿಕೊಂಡು 7 ವರ್ಷಗಳಾಗಿವೆ. ಮೂವರು ಪುತ್ರರಲ್ಲಿ ಮೊದಲ ಮಗ ನಾಗಪ್ಪ ಮನೆಗೆ ಆಸರೆಯಾಗಿಲ್ಲ. 2ನೇ ಪುತ್ರ ರಮೇಶ ಆಕಸ್ಮಿಕವಾಗಿ ಮೃತಪಟ್ಟಿದ್ದಾನೆ. ಮತ್ತೊಬ್ಬ ಪುತ್ರ ಬಸವರಾಜ ಎಂಬಾತ, ಕೂಲಿನಾಲಿ ಮಾಡಿ, ತಾಯಿಯನ್ನು ಸಲಹುತ್ತಿದ್ದಾನೆ. ಆದರೆ ಕೂಲಿಯಿಂದ ಬರುವ ಹಣದಲ್ಲಿ ಮನೆ ಬಾಡಿಗೆ, ಖರ್ಚು ವೆಚ್ಚಗಳನ್ನು ನಿಭಾಯಿಸಲು ಸಾಧ್ಯವಾಗುತ್ತಿಲ್ಲ.

‘ನನಗೆ ವಯಸ್ಸಾಗಿದೆ. ಬಸವರಾಜ(ಪುತ್ರ) ಕೂಲಿ ಮಾಡಿ ನನ್ನನ್ನು ಸಾಕುತ್ತಿದ್ದಾನೆ. ಆದರೆ ಸ್ವಂತ ಮನೆಯಿಲ್ಲ. ಈಗಾಗಲೇ ಹಲವು ಬಾಡಿಗೆ ಮನೆಗಳನ್ನು ಬದಲಿಸಿದ್ದೇವೆ. ಈಗ ಬಾಡಿಗೆ ಇರುವ ಮನೆ ಮಾಲೀಕರು, ಮನೆಯನ್ನು ಬಿಡಲು ಹೇಳುತ್ತಿದ್ದಾರೆ. ಈಗ ಮತ್ತೆ ಮನೆ ಹುಡುಕು ಚಿಂತೆ ಎದುರಾಗಿದೆ’ ಎಂದು ಹೇಳುವಾಗ ನರಸಮ್ಮ ಕಣ್ಣೀರಾದರು.

ಪ್ರಸ್ತುತ ವಾರ್ಡ್ ನಂ.1ರ ತಮ್ಮಣ್ಣ ನರಬೋಳಿ ಎಂಬುವರ ಮನೆಯಲ್ಲಿ ಬಾಡಿಗೆ ಇದ್ದಾರೆ. ಈಗ ಮತ್ತೆ ಮನೆ ಬದಲಾಯಿಸುವ ಸಮಸ್ಯೆ ಕಾಡುತ್ತಿದೆ. ಸುಮಾರು ನಾಲ್ಕು ದಶಕಗಳಿಂದ ಮನೆ ಬದಲಾಯಿಸುತ್ತಲೇ ಇದ್ದಾರೆ. ಆದರೆ ಸ್ವಂತ ಮನೆ ಕಟ್ಟಿಕೊಳ್ಳುವ ಕನಸು ಮಾತ್ರ ನನಸಾಗಿಲ್ಲ. ಜತೆಗೆ ಮಗನ ಮದುವೆ ಮಾಡಬೇಕೆಂದರೂ ಬಾಡಿಗೆ ಮನೆಯಲ್ಲಿರುವ ನಮಗೆ ಯಾರು ಹೆಣ್ಣು ಕೊಡುತ್ತಾರೆ? ಎಂದು ಚಿಂತೆ ಮಾಡುತ್ತಿದ್ದಾರೆ.