ಕಲಬುರಗಿ ಕಾರಾಗೃಹದಲ್ಲಿ ಸ್ಮಾರ್ಟ್‌ಫೋನ್ ಬಳಕೆ: ತನಿಖೆ ಆರಂಭ

ಕಲಬುರಗಿ: ಇಲ್ಲಿನ ಕೇಂದ್ರ ಕಾರಾಗೃಹದಲ್ಲಿ ಕೆಲ ಕೈದಿಗಳಿಂದ ಸ್ಮಾರ್ಟ್‌ಫೋನ್‌ ಬಳಕೆ ಹಾಗೂ ಮಾಧ್ಯಮಗಳಲ್ಲಿ ವರದಿಯಾಗಿರುವ ಜೈಲಿನ ಕೈದಿಯೊಬ್ಬರ ಫೋನ್‌ ಕರೆಯ ಸಂಭಾಷಣೆ ಘಟನೆಗಳ ಕುರಿತು ಕಾರಾಗೃಹ ಇಲಾಖೆಯ ಎಸ್‌ಪಿ ಯಶೋಧಾ ವಂಟಗೋಡಿ ಶುಕ್ರವಾರ ತನಿಖೆ ಆರಂಭಿಸಿದ್ದಾರೆ.

ಮಧ್ಯಾಹ್ನದ 12 ಗಂಟೆ ಸುಮಾರಿಗೆ ಬಂದ ಕೇಂದ್ರ ಕಾರಾಗೃಹಕ್ಕೆ ಬಂದ ಯಶೋಧಾ ವಂಟಗೋಡಿ ಅವರು ಉಭಯ ಘಟನೆಗಳ ಕುರಿತು ಸಂಬಂಧಿಸಿದವರಿಂದ ದಿನವಿಡೀ ಪ್ರಾಥಮಿಕ ಮಾಹಿತಿ ಕಲೆ ಹಾಕಿದರು.

ಈ ನಡುವೆ ಸುದ್ದಿಗಾರರೊಂದಿಗೆ ಮಾತನಾಡಿದ ಯಶೋಧಾ, ‘ಕೇಂದ್ರ ಕಾರಾಗೃಹದಲ್ಲಿ ಇತ್ತೀಚೆಗೆ ನಡೆದ ಘಟನೆಗಳಿಗೆ ಸಂಬಂಧಿಸಿದಂತೆ ಪ್ರಾಥಮಿಕ ತನಿಖೆ ನಡೆಸಲು ಬಂದಿರುವೆ. ಪ್ರಾಥಮಿಕ ತನಿಖೆ ಕಲೆ ಹಾಕಿ, ಒಂದು ವಾರದಲ್ಲಿ ನಮ್ಮ ಇಲಾಖೆಯ ಡಿಜಿಗೆ ವರದಿ ನೀಡುವೆ’ ಎಂದರು.

ಮತ್ತೊಂದೆಡೆ ಕೇಂದ್ರ ಕಾರಾಗೃಹದಲ್ಲಿ ಮೊಬೈಲ್‌, ಸಿಗರೇಟ್‌, ಗುಟ್ಕಾ ಪತ್ತೆಯಾದ ಪ್ರಕರಣವನ್ನು ಕಲಬುರಗಿ ನಗರ ಪೊಲೀಸ್‌ ಕಮಿಷನರ್‌ ಶರಣಪ್ಪ ಎಸ್.ಡಿ. ಅವರು ಸಿಸಿಬಿಗೆ ವರ್ಗಾಯಿಸಿದ್ದಾರೆ.