ಕೊಡಗು: ಜಿಲ್ಲೆಗೆ ಬೇಕು ಸುರಕ್ಷಿತ ‘ಮಾನ್ಸುನ್ ಟೂರಿಸಂ’

ಮಡಿಕೇರಿ: ಕೊಡಗು ಜಿಲ್ಲೆಯಲ್ಲಿ ಜೂನ್ ತಿಂಗಳಿನಿಂದಲೂ ಸುರಿಯುತ್ತಿರುವ ಮಳೆ ಕೃಷಿ, ತೋಟಗಾರಿಕೆ ಚಟುವಟಿಕೆಗಳಿಗೆ ಇಂಬು ನೀಡಿದ್ದರೆ, ಪ್ರವಾಸೋದ್ಯಮ ವಲಯವನ್ನು ಮಂಕಾಗಿಸಿದೆ. ಇದೇ ವಲಯವನ್ನು ನಂಬಿಕೊಂಡಿರುವ ಜನರಿಗೂ ನಷ್ಟ ತರಿಸಿದೆ. ಮಳೆ ಯಾವಾಗ ನಿಲ್ಲುವುದೋ ಎಂದು ಚಾತಕ ಪಕ್ಷಿಗಳಂತೆ ಅವರು ಕಾಯುವಂತಾಗಿದೆ.

ಜಿಲ್ಲೆಯಲ್ಲಿ ಸುಮಾರು 300ಕ್ಕೂ ಅಧಿಕ ಹೋಟೆಲ್‌ ಹಾಗೂ ರೆಸಾರ್ಟ್‌ಗಳಿವೆ. ಇಲ್ಲಿ ಸುಮಾರು 10 ಸಾವಿರ ಮಂದಿ ನೇರವಾಗಿ ಉದ್ಯೋಗದಲ್ಲಿದ್ದಾರೆ. ಸುಮಾರು 4 ಸಾವಿರಕ್ಕೂ ಅಧಿಕ ಹೋಂಸ್ಟೇಗಳಿವೆ. ಒಟ್ಟಾರೆ ಇವುಗಳ ಮೇಲೆ ಪ್ರತ್ಯಕ್ಷವಾಗಿ ಹಾಗೂ ಪರೋಕ್ಷವಾಗಿ ಸುಮಾರು 1.5 ಲಕ್ಷ ಮಂದಿ ಅವಲಂಬಿಸಿದ್ದಾರೆ ಎಂದು ಕೊಡಗು ಜಿಲ್ಲಾ ಹೋಟೆಲ್‌, ರೆಸಾರ್ಟ್ಸ್‌ ಮತ್ತು ರೆಸ್ಟೋರೆಂಟ್ ಅಸೋಸಿಯೇಷನ್‌ ಅಧ್ಯಕ್ಷ ನಾಗೇಂದ್ರಪ್ರಸಾದ್ ಹೇಳುತ್ತಾರೆ.

ಮಳೆಯ ಪ್ರಮಾಣ ಕಡಿಮೆ ಇದ್ದಲ್ಲಿ ಪ್ರವಾಸಿಗರು ಬರುತ್ತಿದ್ದರು. ಆದರೆ, ಈಗ ಮಳೆಯ ಪ್ರಮಾಣ ಹೆಚ್ಚಾಗಿರುವುದರಿಂದ ಪ್ರವಾಸಿಗರ ಸಂಖ್ಯೆ ಕಡಿಮೆಯಾಗಿದೆ. ಶೇ 10ರಿಂದ 20ರಷ್ಟು ಮಾತ್ರವೇ ಭರ್ತಿಯಾಗುತ್ತಿದ್ದು, ಉಳಿದಂತೆ ಎಲ್ಲೆಡೆ ಖಾಲಿ ಖಾಲಿ ರೂಂಗಳೇ ಇವೆ. ರೆಸಾರ್ಟ್‌ಗಳು ಭಣಗುಡುತ್ತಿವೆ. ಕೆಲವು ಹೋಟೆಲ್‌ನವರಿಗಂತೂ ಉದ್ಯೋಗಿಗಳಿಗೆ ಸಂಬಳ ಕೊಡುವುದೂ ಸೇರಿದಂತೆ ಹೋಟೆಲ್‌ಗಳ ನಿತ್ಯದ ನಿರ್ವಹಣೆಯೇ ಕಷ್ಟಸಾಧ್ಯವಾಗಿದೆ ಎಂದು ಅವರು ತಮ್ಮ ಮಳೆಗಾಲದ ಕಷ್ಟಗಳನ್ನು ಬಿಡಿಸಿಡುತ್ತಾರೆ.

ವಾಸ್ತವದಲ್ಲಿ ಕೊಡಗಿನಲ್ಲಿ ಮಳೆಯೇ ಪ್ರಧಾನ. ಬೇರೆಲ್ಲೂ ಸಿಗದಂತಹ ಮಳೆಯ ಅನುಭವವನ್ನು ಈ ಜಿಲ್ಲೆ ನೀಡುತ್ತದೆ. ದಕ್ಷಿಣ ಕನ್ನಡ, ಉತ್ತರ ಕನ್ನಡ ಸೇರಿದಂತೆ ಕೆಲವಾರು ಜಿಲ್ಲೆಗಳಲ್ಲೂ ಮಳೆ ವಿಪರೀತ ಎನ್ನುವಷ್ಟೂ ಇದ್ದರೂ ಕೊಡಗಿನ ಮಳೆಯ ಅಂದವೇ ಬೇರೆ. ಅದರ ಮಧುರಾನುಭೂತಿಯೇ ಬೇರೆ.

ಹತ್ತಿಯ ಉಂಡೆಗಳಂತೆ ಬೆಟ್ಟಗಳನ್ನು ಮುತ್ತುವ ಮೋಡಗಳು, ಕೆಲವೊಮ್ಮೆ ಇಡೀ ಬೆಟ್ಟಶ್ರೇಣಿಯೇ ಮಂಜು ಹೊದ್ದು ಮಲಗಿದಂತಹ ದೃಶ್ಯಗಳು, ಎಲ್ಲಿ ನೋಡಿದರಲ್ಲಿ ಹಸಿರಿನಿಂದಲೇ ಕಂಗೊಳಿಸುವ ಗಿರಿ, ಕಂದರಗಳು, ಧುಮ್ಮಿಕ್ಕುವ ಅಸಂಖ್ಯಾತ ಜಲಧಾರೆಗಳು ಇವೆಲ್ಲವೂ ‘ಕರ್ನಾಟಕದ ಕಾಶ್ಮೀರ’ ಎನಿಸಿಕೊಂಡಿರುವ ಕೊಡಗಿನಲ್ಲಿ ಬಿಟ್ಟರೆ ಬೇರೆಲ್ಲೂ ಸಿಗದು. ಇಂತಹ ಅನನ್ಯವಾದ ಹಾಗೂ ವಿಸ್ಮಯವಾದ ಅನುಭವವನ್ನು ಪ್ರವಾಸಿಗರು ಕಂಡು ಅನುಭವಿಸುವಂತೆ ಮಾಡಲು ಸರ್ಕಾರಕ್ಕೊಂದು ದೂರದೃಷ್ಟಿ ಹಾಗೂ ಇಚ್ಛಾಶಕ್ತಿ ಬೇಕಿದೆ.

ಇಲ್ಲಿ ಮಳೆಗಾಲದಲ್ಲಷ್ಟೇ ಕಾಣಸಿಗುವ ಅತ್ಯಮೋಘವಾದ ಜಲಪಾತಗಳ ಸುರಕ್ಷಿತ ವೀಕ್ಷಣೆಗೆ ಅನುವು ಮಾಡಿಕೊಡಬೇಕು ಎಂದು ಪ್ರವಾಸೋದ್ಯಮದ ವಲಯದಲ್ಲಿ ದುಡಿಯುವ ಅನೇಕ ಮಂದಿ ಒತ್ತಾಯಿಸುತ್ತಾರೆ. ಮೊದಲು ಪ್ರವಾಸಿ ಸ್ಥಳದಲ್ಲಿ ಸುರಕ್ಷಿತವಾದ ಕ್ರಮಗಳನ್ನು ಕೈಗೊಳ್ಳಬೇಕು. ನಂತರ, ಪ್ರವಾಸಿಗರನ್ನು ಬನ್ನಿ ಎಂದು ಕರೆದರೆ ಯಾವುದೇ ಅನಾಹುತಗಳು ಸಂಭವಿಸುವುದಿಲ್ಲ ಎಂದು ಹೇಳುತ್ತಾರೆ.

ಮಳೆ ನೋಡಲೆಂದೇ, ಮಳೆಯನ್ನು ಅನುಭವಿಸಲೆಂದೇ ಬರುವ ಪ್ರವಾಸಿಗರಿಗೂ ಅವಕಾಶ ಮಾಡಿಕೊಡಬೇಕು. ರೆಸಾರ್ಟ್, ಹೋಟೆಲ್‌ನವರು ತಮ್ಮಲ್ಲಿ ಸೂಕ್ತ ಸುರಕ್ಷಿತ ವ್ಯವಸ್ಥೆ ಕಲ್ಪಿಸಿಕೊಡಬೇಕಿದೆ.

ಇನ್ನು ಮಳೆಗಾಲದಲ್ಲಷ್ಟೇ ಇಲ್ಲಿ ಸಿಗುವ ಅಪರೂಪದ ಖಾದ್ಯಗಳನ್ನು ಬ್ರ್ಯಾಂಡಿಗ್ ಮಾಡಬೇಕಿದೆ. ಕೊಡಗಿನ ಜೇನು, ಕೊಡಗಿನ ಕಿತ್ತಲೆಯಂತೆ ಮಳೆಗಾಲದಲ್ಲಿ ದೊರೆಯುವ ಜೀವಂತ ಏಡಿ, ಕಳಲೆ, ಮರಕೆಸ ಮೊದಲಾದ ತಿನಿಸುಗಳನ್ನು ಬ್ರ್ಯಾಂಡಿಂಗ್ ಮಾಡುವುದು, ಮಳೆ ಕಡಿಮೆಯಾದ ನಂತರ ಮಳೆಗಾಲದ ಆಹಾರ ಮೇಳ ಏರ್ಪಡಿಸುವುದೂ ಸೇರಿದಂತೆ ಅನೇಕ ಬಗೆಯ ಕ್ರಮಗಳನ್ನು ಕೈಗೊಳ್ಳಬಹುದಾಗಿದೆ.

ಇನ್ನು ಇಲ್ಲಷ್ಟೇ ಸಿಗುವ ರಿವರ್ ರ್‍ಯಾಫ್ಟಿಂಗ್‌ಗೆ ಹೆಚ್ಚು ಪ್ರಚಾರ ದೊರಕಿಸಿಕೊಟ್ಟರೆ ಮಳೆಗಾಲದ ಪ್ರವಾಸೋದ್ಯಮಕ್ಕೆ ಜೀವ ತುಂಬಿದಂತಾಗುತ್ತದೆ. ಇಲ್ಲಿನ ಕುಶಾಲನಗರದ ದುಬಾರೆ ಸಮೀಪ ಕಾವೇರಿ ನದಿಯಲ್ಲಿ ಹಾಗೂ ಟಿ.ಶೆಟ್ಟಿಗೇರಿಯ ಟಾಟಾ ಚಹಾ ಎಸ್ಟೇಟ್ ಸಮೀಪದ ಬರಪೊಳೆ ಸೇರಿದಂತೆ ರ‍್ಯಾಫ್ಟಿಂಗ್ ನಡೆಸುವ ಸ್ಥಳಗಳ ಮಾಹಿತಿಯನ್ನು ಪ್ರವಾಸೋದ್ಯಮ ಇಲಾಖೆ ಇನ್ನಷ್ಟು ಪ್ರಚುರಪಡಿಸಬೇಕಿದೆ. ಜತೆಗೆ, ಜಲಸಾಹಸ ಕ್ರೀಡೆಗಳಿಗೆ ಇನ್ನಷ್ಟು ಸ್ಥಳಗಳನ್ನು ಗುರುತಿಸಿ, ಅವುಗಳ ಅಭಿವೃದ್ಧಿಗೂ ಗಮನ ಕೊಡಬೇಕಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಇಲ್ಲಿ ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡಬೇಕಿದೆ.

‌ನಿರೂಪಣೆ: ಕೆ.ಎಸ್.ಗಿರೀಶ

ಮಾಹಿತಿ: ಜೆ.ಸೋಮಣ್ಣ

ಸುರಕ್ಷಿತ ಪರಿಸರ ಸ್ನೇಹಿ ಪ್ರವಾಸೋದ್ಯಮ ಬೇಕು