ವನಸಿರಿ ನಡುವೆ ಪ್ರಶಾಂತ ತಾಣ...

ಗೋಣಿಕೊಪ್ಪಲು: ಕಾಫಿ ತೋಟದ ನಡುವೆ ಸುಣ್ಣ ಬಣ್ಣಗಳಿಂದ ಅಲಂಕೃತ ಗೊಂಡು ಭಕ್ತರನ್ನು ಭಾವಪೂರ್ಣವಾಗಿ ಆಕರ್ಷಿಸುವ ಸುಂದರ ಆಲಯಗಳಲ್ಲಿ ಬೆಸಗೂರಿನ ಮಹದೇವರ ದೇವಸ್ಥಾನವೂ ಒಂದು.

ಸುತ್ತಲೂ ಇರುವ ಹಚ್ಚಹಸುರಿನ ವನಸಿರಿಯ ನಡುವೆ 700 ವರ್ಷಗಳ ಇತಿಹಾಸ ಹೊಂದಿರುವ ಮಹದೇವರ ದೇವಾಲಯ ಕಣ್ಮನ ಸೆಳೆಯುತ್ತಿದೆ. ಇಲ್ಲಿ ಮಹದೇವರ ಗುಡಿಯ ಜತೆಗೆ ಗಣತಿ, ದುರ್ಗಿ, ಭದ್ರಕಾಳಿ, ಬಾಲಕೃಷ್ಣನ ಗುಡಿಗಳಿವೆ. ಇವುಗಳೆಲ್ಲೆಲ್ಲ ಮಹದೇವರ ಗುಡಿಯೇ ಪ್ರಧಾನವಾದದು.

ಪ್ರತಿ ವರ್ಷ ಮೇ 8ರಂದು ಈ ದೇವಸ್ಥಾನದ ವಾರ್ಷಿಕೋತ್ಸವ ನಡೆಯುತ್ತದೆ. ದೀಪಾವಳಿ ಮುಗಿದ ಮೇಲೆ ಒಂದು ತಿಂಗಳ ಕಾಲ ಪ್ರತಿ ಸೋಮವಾರ ಕಾರ್ತಿಕ ಪೂಜೆಯೂ ನಡೆಯುತ್ತದೆ. ಈ ಸಂದರ್ಭದಲ್ಲಿ ಸುತ್ತಮುತ್ತಲಿನ ಊರುಗಳಾದ ನಲ್ಲೂರು, ಕಿರುಗೂರು, ಪೊನ್ನಪ್ಪಸಂತೆ, ಕಾನೂರು, ಬೆಕ್ಕೆಸೊಡ್ಲೂರು, ಬಾಳೆಲೆ, ಕೋಣನಕಟ್ಟೆ ಮತ್ತೂರು ಮೊದಲಾದ ಗ್ರಾಮಗಳ ಭಕ್ತರು ಪಾಲ್ಗೊಳ್ಳುತ್ತಾರೆ.

ಇಲ್ಲಿನ ಗುಡಿಗೋಪುರಗಳು ಸಾಮಾನ್ಯ ಕಟ್ಟಡದಿಂದ ಕೂಡಿದ್ದು ಸರಳವಾಗಿ, ಸುಂದರವಾಗಿವೆ. ದೇವಸ್ಥಾನದ ಆವರಣದೊಳಗೆ ಬೇವು, ನೆಲ್ಲಿ, ಸಂಪಿಗೆ, ಮಾವು ಬಿಲ್ವಪತ್ರೆ ಮೊದಲಾದ ಹಲವು ಜಾತಿಯ ಮರಗಳಿವೆ. ಗುಡಿಗಳ ಅಕ್ಕಪಕ್ಕ ವಿವಿಧ ಜಾತಿಯ ಹೂ ಗಿಡಗಳು ಮತ್ತು ಅಲಂಕಾರಿಕಾ ಸಸ್ಯಗಳನ್ನು ಅಚ್ಚುಕಟ್ಟಾಗಿ ಬೆಳೆಸಲಾಗಿದೆ.

ಆಯಾ ದೇವರಗುಡಿಗಳ ಮುಂಭಾಗದಲ್ಲಿ ಕಮಾನುಗಳನ್ನು ನಿರ್ಮಿಸಲಾಗಿದೆ. ನೀರಿಗಾಗಿ ತೆರೆದ ಬಾವಿ ನಿರ್ಮಿಸಲಾಗಿದೆ. ಈ ಬಾವಿ ಕಟ್ಟಡಕ್ಕೆ ಸುಣ್ಣ ಬಣ್ಣ ಹಚ್ಚಿ ಸುಂದರಗೊಳಿಸಲಾಗಿದೆ. ದೇವಸ್ಥಾನ ಕಟ್ಟಡ ಮತ್ತು ಕಾಂಪೌಂಡ್‌ಗೆ ಕೇವಲ ಬಿಳಿ ಬಣ್ಣ ಮತ್ತು ನೀಲಿ ಬಣ್ಣ ಬಳೆಯಲಾಗಿದೆ.

ಪ್ರತಿ ದಿನ ಬೆಳಿಗ್ಗೆ 6.30ರಿಂದಪೂಜೆ ನಡೆಯುತ್ತಿದೆ. ಈ ಸಂದರ್ಭದಲ್ಲಿ ಭಕ್ತರ ಸಂಖ್ಯೆ ಹೆಚ್ಚಿದ್ದರೆ ಈ ಸಮಯವನ್ನು ವಿಸ್ತರಿಸಲಾಗುತ್ತದೆ ಎನ್ನುತ್ತಾರೆ ದೇವಸ್ಥಾನದ ಪುರೋಹಿತರಾದ ಜಗನ್ನಾಥ್ ಭಟ್.

ಈ ದೇವಸ್ಥಾನಕ್ಕೆ ಸ್ಥಳೀಯಭಕ್ತರಿಗಿಂತ ಹೊರಗಿನವರೇ ಹೆಚ್ಚು. ದೇವಸ್ಥಾನದಲ್ಲಿ ಮೈಕ್ ಹಾಗೂ
ಗಂಟೆ ಜಾಗಟೆಗಳ ಗದ್ದಲವಿಲ್ಲ.ಪ್ರಶಾಂತವಾದ ವಾತಾವರಣದಲ್ಲಿ ಭಕ್ತರು ತಮ್ಮ ಕಷ್ಟ ಸುಖಗಳನ್ನು ನಿವೇದಿಸಿಕೊಂಡು, ಭಕ್ತಿಭಾವದಿಂದ ಹರಕೆ ತೀರಿಸಿ ವಿನೀತರಾಗಿ
ತೆರಳುತ್ತಾರೆ.