ಕುಕನೂರು: ಪಪ್ಪಾಯಿ ಬೆಳೆದು ಯಶಸ್ವಿ ಕಂಡ ರೈತ

ಕುಕನೂರು: ತಾಲ್ಲೂಕಿನ ಕುದುರಿಮೋತಿ ರೈತ ಸುರೇಶ್ ಚೌಡ್ಕಿ ‘ನಂಬರ್ ಫಿಫ್ಟೀನ್’ ತಳಿಯ ಪಪ್ಪಾಯಿ ಬೆಳೆದು ಲಾಭ ಕಂಡುಕೊಂಡಿದ್ದಾರೆ.

ಗೋವಿನಜೋಳ, ಬಾಳೆ, ಕಡಲೆ, ತರಕಾರಿ ಹೀಗೆ... ಮಿಶ್ರ ಬೇಸಾಯ ಮಾಡಿಕೊಂಡಿರುವ ಸುರೇಶ ಅವರಿಗೆ ಕೃಷಿಯಲ್ಲಿ ಏನಾದರೂ ಹೊಸ ಬೆಳೆ (ಪ್ರಯೋಗ) ಮಾಡಲು ಎಲ್ಲಿಲ್ಲದ ಖುಷಿ. 3 ವರ್ಷಗಳಿಂದ 4 ಎಕರೆಯಲ್ಲಿ ನಂಬರ್ ಫಿಫ್ಟೀನ್ (ಸಸಿ) ನೆಟ್ಟಿದ್ದು 8 ತಿಂಗಳು ಕಳೆಯುತ್ತಿದ್ದಂತೆಯೇ ಗಿಡಗಳ ತುಂಬೆಲ್ಲಾ ಪಪ್ಪಾಯಿಗಳ ಗೊಂಚಲು ತುಂಬಿಕೊಂಡಿದೆ. ಒಂದೂವರೆ ಕೆ.ಜಿ.ಯಿಂದ 2 ಕೆ.ಜಿ. ತೂಗುವ ಪಪ್ಪಾಯಿ ಒಂದು ಗಿಡಕ್ಕೆ ಕನಿಷ್ಠ 50ರಿಂದ 70 ಕಾಯಿಗಳ ಇಳುವರಿ ಇದೆ. 18 ತಿಂಗಳವರೆಗೆ ಪಪ್ಪಾಯಿ ಹಣ್ಣಿನ ನಿರಂತರ ಇಳುವರಿ ಇರುತ್ತದೆ ಎನ್ನುತ್ತಾರೆ ಸುರೇಶ್.

ಗಿಡದಿಂದ ಗಿಡಕ್ಕೆ 4 ಅಡಿ, ಸಾಲಿನಿಂದ– ಸಾಲಿಗೆ 8 ಅಡಿ ಅಂತರದಲ್ಲಿ ಎಕರೆಗೆ ಸಾವಿರ ಸಸಿ ನಾಟಿ ಮಾಡಿದ್ದೇನೆ. ಎಂಟು ತಿಂಗಳಿಗೆ ಇಳುವರಿ ಚಾಲೂ ಆಗೈತ್ರೀ’ ಎಂದು ಸುರೇಶ್ ತಿಳಿಸಿದರು.

ಸಾವಯವ ಕೃಷಿ: ಒಂದೂವರೆ ದಶಕದಿಂದ ತಮ್ಮ 12 ಎಕರೆ ಭೂಮಿಯಲ್ಲಿ ಸಾವಯವ ಕೃಷಿ ಅಳವಡಿಸಿಕೊಂಡಿರುವ ರೈತ ಸುರೇಶ್ ದ್ರವ ಜೀವಾಮೃತ, ಘನ ಜೀವಾಮೃತ, ಸಗಣಿ ಗೊಬ್ಬರ ಕ್ರಿಮಿನಾಶಕ ಕಷಾಯ ಎಲ್ಲವನ್ನೂ ಶೂನ್ಯ ಬಂಡವಾಳದಿಂದ ಮಾಡಿಕೊಂಡಿದ್ದಾರೆ. ಕಸದಿಂದ ಗೊಬ್ಬರ ತಯಾರಿಸಿ ರಸ ಮಾಡುತ್ತಿದ್ದಾರೆ.

ಪಪ್ಪಾಯಿಗೆ ರಾಸಾಯನಿಕ ಗೊಬ್ಬರ, ಕ್ರಿಮಿನಾಶಕ ಬಳಸದೆ ಸಾವಯವ ಪದ್ಧತಿಯಲ್ಲಿ ಬೆಳೆಯುತ್ತಿದ್ದಾರೆ. ಸಾವಯವಕ್ಕಾಗಿ 5 ದೇಸಿ ಆಕಳು, ಕುರಿ, ಕೋಳಿ ಸಾಕಿದ್ದು, ರೈತ ಸುರೇಶ್ ಅವರು ಹೈನುಗಾರಿಕೆಯನ್ನು ಇನ್ನೊಂದು ಉಪ ಆದಾಯ ಮಾಡಿಕೊಂಡಿದ್ದಾರೆ.

ಪಪ್ಪಾಯಿಯ ತರು ಖರೀದಿದಾಗಿ ₹13ಸಾವಿರದಿಂದ ₹15ಸಾವಿರ, ಕೂಲಿ ಖರ್ಚು ಸೇರಿದಂತೆ ಇತರ ಖರ್ಚು ಸೇರಿ ಎಕರೆಗೆ ₹20ಸಾವಿರದಿಂದ ₹25ಸಾವಿರ ಖರ್ಚಿದೆ. ವರ್ಷದಲ್ಲಿ ಎಕರೆಗೆ ಕನಿಷ್ಠ ₹2ರಿಂದ ₹3 ಲಕ್ಷದವರೆಗೆ ಆದಾಯ ಖಚಿತ’ ಎನ್ನುತ್ತಾರೆ ಸುರೇಶ್ .

ತೋಟಕ್ಕೆ ಬಂದು ಖರೀದಿಸುತ್ತಾರೆ: ‘ಹುಬ್ಬಳ್ಳಿ ಹಾಗೂ ಮುಂಬೈ ಮಾರುಕಟ್ಟೆಯಿಂದ ತೋಟಕ್ಕೆ ಬಂದು ಕೆ.ಜಿ.ಗೆ ₹14ರಂತೆ ಖರೀದಿಸುತ್ತಾರೆ. ನಾವು ಕಟಾವು ಮಾಡಿಕೊಟ್ಟರೆ ಮುಗಿಯಿತು. ಸಾರಿಗೆ ಖರ್ಚು ಇಲ್ಲ. ಮಾರುಕಟ್ಟೆ ಮಾಡೋದು ತ್ರಾಸ ಇಲ್ಲರ್‍ರೀ’ ಎಂದು ತಿಳಿಸಿದರು.

‘ಔಷಧಿ ಗುಣ ಹೊಂದಿರುವ ಪಪ್ಪಾಯಿ ಆರೋಗ್ಯಕ್ಕೆ ಉತ್ತಮ ಹಣ್ಣು. ಬೇಸಿಗೆ, ಮಳೆಗಾಲ, ಚಳಿಗಾಲದಲ್ಲೂ ಬೇಡಿಕೆ ಇರುವ ಹಣ್ಣು ಆಗಿದ್ದರಿಂದ ಮಾರುಕಟ್ಟೆಗೆ ತೊಂದರೆ ಇಲ್ಲ’ ಎನ್ನುತ್ತಾರೆ ಸುರೇಶ್.

ಸುರೇಶ್ ಅವರ ತೋಟಕ್ಕೆ ಕೃಷಿ ಮತ್ತು ತೋಟಗಾರಿಕೆ ಇಲಾಖೆಯ ಪ್ರಶಿಕ್ಷಣಾರ್ಥಿಗಳು, ಕೃಷಿ ವಿಜ್ಞಾನಿಗಳು ಕೃಷಿ ಸಾಧನೆ ತಿಳಿಯಲು ಬರುತ್ತಾರೆ. ಸಂಪನ್ಮೂಲ ವ್ಯಕ್ತಿಯಾಗಿಯೂ ಕಾರ್ಯನಿರ್ವಹಿಸಿದ್ದಾರೆ. 2023–24ನೇ ಸಾಲಿನಲ್ಲಿ ಕೃಷಿ ಇಲಾಖೆಯ ‘ಕೃಷಿ ಪಂಡಿತ’ ಹಾಗೂ ಶ್ರೇಷ್ಠ ಕೃಷಿಕ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ವಿವಿಧ ಸಂಘ–ಸಂಸ್ಥೆಯ ಪ್ರಶಸ್ತಿ–ಸನ್ಮಾನಕ್ಕೆ ಪಾತ್ರವಾಗಿದ್ದಾರೆ.