ಕುಷ್ಟಗಿ: ಸಾಮೂಹಿಕ ಜ್ವರ, ಜನ ಜರ್ಝರಿತ

ಕುಷ್ಟಗಿ: ಕಳೆದ ಎರಡು ವಾರದಿಂದಲೂ ತಾಲ್ಲೂಕಿನ ನೆರೆಬೆಂಚಿ ಗ್ರಾಮಸ್ಥರು ಸಾಮೂಹಿಕವಾಗಿ ವಿಪರೀತ ಜ್ವರಬಾಧೆಯಿಂದ ಬಳಲುತ್ತಿದ್ದಾರೆ. ಊರಿನ ಬೀರಲಿಂಗೇಶ್ವರ ದೇವಸ್ಥಾನದಲ್ಲಿನ ತಾತ್ಕಾಲಿಕ ಚಿಕಿತ್ಸಾ ಕೇಂದ್ರ ರೋಗಿಗಳಿಂದ ಭರ್ತಿಯಾಗಿದೆ. ಮಕ್ಕಳು, ಮಹಿಳೆಯರು ಸೇರಿದಂತೆ ಸಾಕಷ್ಟು ಜನ ಚಿಕಿತ್ಸೆ ಪಡೆಯುತ್ತಿರುವ ದೃಶ್ಯ ಸಾಮಾನ್ಯವಾಗಿದೆ.

ಜನರ ಆರೋಗ್ಯ ಸುಧಾರಿಸುವ ನಿಟ್ಟಿನಲ್ಲಿ ಆರೋಗ್ಯ ಇಲಾಖೆ ತಾತ್ಕಾಲಿಕ ಚಿಕಿತ್ಸಾ ಕೇಂದ್ರ ತೆರೆದು ಅಗತ್ಯ ಸಿಬ್ಬಂದಿ, ಔಷಧಿಯೊಂದಿಗೆ ನೆರವಾಗುತ್ತಿದೆ. ಅನೇಕ ಜನರ ರಕ್ತದ ಮಾದರಿಗಳನ್ನೂ ಜಿಲ್ಲಾ ಕೇಂದ್ರದ ಪ್ರಯೋಗಾಲಯಕ್ಕೆ ಕಳಿಸಲಾಗಿದೆ. ಅದು ಡೆಂಗಿ ಅಲ್ಲ, ಚಿಕೂನ್‌ಗುನ್ಯಾ ಬಾಧೆಯೂ ಅಲ್ಲ ಎಂಬ ವರದಿ ಬಂದಿದೆ. ಮತ್ತ್ಯಾವ ಕಾಯಿಲೆ ನಮ್ಮನ್ನು ಕಾಡುತ್ತಿದೆ? ಎಂಬ ಪ್ರಶ್ನೆ ಗ್ರಾಮಸ್ಥರನ್ನು ಕಾಡುತ್ತಿದೆ.

ಗ್ರಾಮದ ಪ್ರತಿಯೊಂದು ಮನೆಯಲ್ಲೂ ಜನರು ಜ್ವರ ಬಾಧೆಯಿಂದ ಜರ್ಝರಿತರಾಗಿರುವುದು ಗೋಚರಿಸುತ್ತಿದೆ.

‘ಕೈಕಾಲು, ಕೀಲು ನೋವಿನಿಂದ ನೆಲಬಿಟ್ಟು ಏಳ್ದಂಗಾಗೇತಿ, ಬಹಿರ್ದೆಸೆಗೆ ಹೋಗಲೂ ಆಗುತ್ತಿಲ್ಲ, ವಿಪರೀತ ಜ್ವರ ಕಾಡಕ್ಹತ್ಯಾವ. ನಮ್ಮ ಊರಿನ ಜನರ ಗೋಳಿಗೆ ಪರಿಹಾರ ಇಲ್ದಂಗಾಗೇತ್ರಿ’ ಎಂದು ಗ್ರಾಮಸ್ಥರಾದ ಮೌನೇಶ ಮೇಟಿ, ಶರಣಪ್ಪ ಹಿರೇಬಂಡಿಹಾಳ,
ಅಜ್ಜಪ್ಪ ಕನಕೊಪ್ಪ ಅಲವತ್ತುಕೊಂಡರು.

ದೇವಸ್ಥಾನದ ಒಳ ಹೊರ ಆವರಣ ರೋಗಿಗಳಿಂದ ಭರ್ತಿಯಾಗಿದ್ದು ನೆಲದ ಮೇಲೆ ಮಲಗಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಕಂಬಗಳಿಗೆ ದಾರ ಕಟ್ಟಿ ಅದಕ್ಕೆ ಇಳಿಬಿಟ್ಟ ಸಲಾಯಿನ್‌ ಬಾಟಲಿಗಳ ಡ್ರಿಪ್‌ ಮೂಲಕ ಔಷಧಿ ನೀಡುತ್ತಿರುವುದು ಕಂಡುಬಂದಿತು. ಅದೇ ರೀತಿ ಕುಷ್ಟಗಿ ಸರ್ಕಾರಿ ಆಸ್ಪತ್ರೆಯಲ್ಲಿಯೂ ನೆರೆಬೆಂಚಿ ರೋಗಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ದಾಖಲಾಗುತ್ತಿದ್ದಾರೆ.

ನೈರ್ಮಲ್ಯ ಕೊರತೆ: ಸಮಸ್ಯೆ ಎದುರಾದ ನಂತರ ನೈರ್ಮಲ್ಯ ಕಾಪಾಡುವ ನಿಟ್ಟಿನಲ್ಲಿ ಗ್ರಾಮ ಪಂಚಾಯಿತಿ ಮುಂದಾಗಿದ್ದು ಅಗತ್ಯ ಕ್ರಮ ಕೈಗೊಂಡಿದೆ. ಆದರು ಮಾಲಿನ್ಯ ಸಮಸ್ಯೆ ಹಾಗೇ ಇದೆ, ತಾತ್ಕಾಲಿಕ ಚಿಕಿತ್ಸಾ ಕೇಂದ್ರದ ಪಕ್ಕದಲ್ಲಿ ಬೃಹತ್ ಕಾಲುವೆಯಲ್ಲಿ ಅನೇಕ ತಿಂಗಳುಗಳಿಂದ ಕೊಳಚೆ ನೀರು ಮಡುಗಟ್ಟಿದೆ. ಅದನ್ನು ಸ್ವಚ್ಛಗೊಳಿಸಲು ಪಂಚಾಯಿತಿ ಮುಂದಾಗಬೇಕಿದೆ ಎಂದು ಜನರು ಹೇಳಿದರು.