ಕಾರಟಗಿ | ಗ್ರಂಥಾಲಯ, ಪ್ರಯೋಗಾಲಯ ಇಲ್ಲ; ಅತಿಥಿ ಉಪನ್ಯಾಸಕರೇ ಎಲ್ಲ

ಕಾರಟಗಿ: ಪಟ್ಟಣದ ಕರ್ನಾಟಕ ಪಬ್ಲಿಕ್‌ ಶಾಲೆಯಲ್ಲಿ ಪೂರ್ವ ಪ್ರಾಥಮಿಕದಿಂದ ಪಿಯುವರೆಗೆ ಶಿಕ್ಷಣದ ವ್ಯವಸ್ಥೆ ಇದೆ. ಕಲಾ, ವಾಣಿಜ್ಯ, ವಿಜ್ಞಾನ ವಿಭಾಗಗಳಿದ್ದು 550 ವಿದ್ಯಾರ್ಥಿಗಳು ಅಧ್ಯಯನ ಮಾಡುತ್ತಿದ್ದಾರೆ. ಪ್ರಯೋಗಾಲ, ಗ್ರಂಥಾಲಯ ಇಲ್ಲ. ಉಪನ್ಯಾಸಕರ ಕೊರತೆಯನ್ನು ಅತಿಥಿ ಉಪನ್ಯಾಸಕರು ತುಂಬಿದ್ದಾರೆ.

ವಿಜ್ಞಾನ, ಬೌತವಿಜ್ಞಾನ, ಕಲಾ ವಿಭಾಗದಲ್ಲಿ ಉಪನ್ಯಾಸಕರೇ ಇಲ್ಲ. ಪ್ರಾಚಾರ್ಯ ಅನೀಲಕುಮಾರ ಪಯತ್ನದಿಂದ ವಿಜ್ಞಾನ, ವಾಣಿಜ್ಯ ವಿಭಾಗದ ವಿದ್ಯಾರ್ಥಿಗಳಿಗೆ ಕಂಪ್ಯೂಟರ್‌ ಸೈನ್ಸ್‌ ಕಲಿಯುವ ಹಾಗೂ ಇಂಗ್ಲೀಷ್ ಬದಲು ಹಿಂದಿ ಆಯ್ಕೆ ಮಾಡಿಕೊಳ್ಳುವ ಅವಕಾಶ ಮಾಡಿಕೊಡಲಾಗಿದೆ.

ಇಲ್ಲಗಳ ಮಧ್ಯದಲ್ಲೂ ಇಲ್ಲಿನ ವಿದ್ಯಾರ್ಥಿಗಳು ಕಲಿಕೆಯಲ್ಲಿ ಹಿಂದೆ ಬಿದ್ದಿಲ್ಲ. ಶೇ 85 ಫಲಿತಾಂದ ಬಂದಿದೆ. ರಾಧಿಕಾ ಶೇ 93 ಅಂಕ ಪಡೆದಿದ್ದರೆ, ಹುಲಿಗೆಮ್ಮ ಮತ್ತು ಶರಣಬಸವ ಪಠ್ಯೇತರ ವಿಭಾಗದಲ್ಲಿ ಸಾಧನೆ ಮೆರೆದಿದ್ದಾರೆ.

ಸಿದ್ದಾಪುರ: ತಾಲ್ಲೂಕಿನ ಸಿದ್ದಾಪುರದಲ್ಲಿರುವ ಪಿಯು ಕಾಲೇಜು ಕಟ್ಟಡ ಕಪ್ಪು ಮಣ್ಣಿನಲ್ಲಿದೆ. ಸ್ವಲ್ಪ ಮಳೆಯಾದರೂ ಆವರಣವೆಲ್ಲ ಕೆಸರು ಮಯವಾಗಿ ಅಡ್ಡಾಡಲು ಕಷ್ಟವಾಗುತ್ತದೆ. ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಯಡಿ ಕಾಲೇಜಿಗೆ ನೀರು ಪೂರೈಕೆಯಾಗುತ್ತದೆ. ಪರ್ಯಾಯ ವ್ಯವಸ್ಥೆ ಇರದ ಕಾರಣ ವಿದ್ಯಾರ್ಥಿಗಳು ಮನೆಯಿಂದ ತಂದ ನೀರನ್ನೇ ಕುಡಿಯಬೇಕು.

ಕಾಯಂ ಪ್ರಾಚಾರ್ಯರಿಲ್ಲ, ಕ್ಲರ್ಕ್ ಇಲ್ಲ. ಇಲ್ಲಿದ್ದವರನ್ನು ಬೇರೆಡೆ ಎರವಲು ಸೇವೆಯ ಮೂಲಕ ನಿಯೋಜಿಸಿಲಾಗಿದೆ.

ಸಚಿವ ಶಿವರಾಜ ತಂಗಡಗಿ ಅವರ ಆಪ್ತ ಸಹಾಯಕ ತನಗಿರುವ ಸಚಿವರೊಂದಿನ ವಿಶ್ವಾಸ ಕುದುರಿಸಿಕೊಂಡು ಖಾಯಂ ಉಪನ್ಯಾಸಕರೊಬ್ಬರನ್ನು ಸಿಂಧನೂರಿಗೆ ಎರವಲು ಸೇವೆಯ ಮೇಲೆ ಕಳುಹಿಸಿ ಮತ್ತಷ್ಟು ಸಮಸ್ಯೆಗೆ ಕಾರಣನಾಗಿದ್ದಾನೆ. ಸಚಿವರಂಥವರು ವಿಶ್ವಾಸ ದುರುಪಯೋಗ ಆಗುವ ಬಗ್ಗೆ ಎಚ್ಚರಿಕೆ ವಹಿಸಿದರೆ ಅವರಿಗೂ ಕ್ಷೇಮ ಎಂಬುದು ವಿದ್ಯಾರ್ಥಿಗಳ ಅನಿಸಿಕೆ.