‘ಪ್ರಜಾವಾಣಿ’ ಫೋನ್‌ ಇನ್‌ | ಕೊಪ್ಪಳ: ಬಿತ್ತನೆ ಪೂರ್ಣ, ಮುಂಗಾರು ನಿರಾತಂಕ
‘ಪ್ರಜಾವಾಣಿ’ ಫೋನ್‌ ಇನ್‌ ಕಾರ್ಯಕ್ರಮದಲ್ಲಿ ಕೃಷಿ ಇಲಾಖೆ ಜಂಟಿ ನಿರ್ದೇಶಕ ರುದ್ರೇಶಪ್ಪ ಟಿ.ಎಸ್‌.
ಕೊಪ್ಪಳ: ‘ಮುಂಗಾರು ಹಂಗಾಮಿನಲ್ಲಿ ಬಿತ್ತನೆ ಕಾರ್ಯ ಪೂರ್ಣಗೊಂಡಿದ್ದು ಬಿತ್ತನೆ ಬೀಜ, ರಸಗೊಬ್ಬರ ಸೇರಿದಂತೆ ಯಾವುದೇ ಸಮಸ್ಯೆಗಳು ಇಲ್ಲ. ತುಂಗಭದ್ರಾ ಜಲಾಶಯಕ್ಕೂ ಉತ್ತಮವಾಗಿ ಒಳಹರಿವು ಬರುತ್ತಿರುವುದರಿಂದ ಅನ್ನದಾತರು ನಿರಾತಂಕವಾಗಿ ಕೃಷಿ ಚಟುವಟಿಕೆ ಮಾಡಬಹುದು’ ಎಂದು ಕೃಷಿ ಇಲಾಖೆಯ ಜಂಟಿ ನಿರ್ದೇಶಕ ರುದ್ರೇಶಪ್ಪ ಟಿ.ಎಸ್‌. ಹೇಳಿದರು.
ಗುರುವಾರ ‘ಪ್ರಜಾವಾಣಿ’ ಹಮ್ಮಿಕೊಂಡಿದ್ದ ಫೋನ್‌ ಇನ್‌ ಕಾರ್ಯಕ್ರಮದಲ್ಲಿ ಸಾರ್ವಜನಿಕರ ಪ್ರಶ್ನೆಗಳಿಗೆ ಅವರು ಉತ್ತರ ನೀಡಿದರು. ಕೃಷಿ ಇಲಾಖೆಯ ಯೋಜನೆಗಳು, ರೈತರಿಗೆ ಆಗುತ್ತಿರುವ ಸಮಸ್ಯೆಗಳಿಗೆ ದನಿಯಾದರು. ಕಾರ್ಯಕ್ರಮದ ಸಾರ ಇಲ್ಲಿದೆ.
ರಾಕೇಶ, ಘಟ್ಟಿರೆಡ್ಡಿಹಾಳ: ಬೆಳೆದ ಉಳ್ಳಾಗಡ್ಡಿ ವ್ಯಾಪಕ ಮಳೆಯಿಂದಾಗಿ ಕೊಳೆತು ಹೋಗಿದೆ. ಏನು ಮಾಡಬೇಕು?
ಈ ಸಲದ ಮುಂಗಾರಿನಲ್ಲಿ ಬೆಳೆ ಹಾನಿಗೆ ಪರಿಹಾರ ಕೊಡುವ ಬಗ್ಗೆ ಚರ್ಚೆ ನಡೆಯುತ್ತಿದ್ದು, ಅಧಿಕಾರಿಗಳು ಪರಿಶೀಲನೆ ಮಾಡುತ್ತಿದ್ದಾರೆ. ವಿಮೆ ತುಂಬಿದ್ದರೆ ನಮ್ಮ ಕಚೇರಿಗೆ ಅರ್ಜಿ ಕಳುಹಿಸಿ. ನಿಮ್ಮ ಸಮೀಪದ ಕೃಷಿ ಇಲಾಖೆ ಅಧಿಕಾರಿಗಳೊಂದಿಗೂ ಮಾತನಾಡಿ.
ಹುಸೇನಪ್ಪ ಹಿರೇಮನಿ, ಮುದೇನೂರು: ಜೀವನೋಪಾಯ ನಿಧಿ ಯೋಜನೆ ಯಲಬುರ್ಗಾ ತಾಲ್ಲೂಕಿಗೆ ಮಾತ್ರ ಸೀಮಿತವೇ?
ಜಿಲ್ಲೆಯ ಎಲ್ಲ ತಾಲ್ಲೂಕುಗಳಿಗೂ ಇದು ಅನ್ವಯವಾಗುತ್ತದೆ. ಕಳೆದ ವರ್ಷ ಬರಗಾಲವಿದ್ದ ಕಾರಣ ಸಣ್ಣ ಹಾಗೂ ಅತಿ ಸಣ್ಣ ರೈತರಿಗೆ ₹2000ರಂತೆ ಈ ನಿಧಿ ನೀಡಲಾಗಿತ್ತು. ಜಿಲ್ಲೆಯ 54 ಸಾವಿರ ರೈತರಿಗೆ ಇದರ ಪ್ರಯೋಜನ ಲಭಿಸಿದೆ.
ವೀರಭದ್ರಪ್ಪ ಕೋರಿ, ನವಲಹಳ್ಳಿ: ರಸಗೊಬ್ಬರ ತರಲು ನಮ್ಮಲ್ಲಿ ಜನಸಂದಣಿ ಇರುವುದರಿಂದ ನಿತ್ಯ ಕಾಯುವುದು ಕೆಲಸವಾಗಿದೆ. ಇನ್ನೊಂದು ಕೇಂದ್ರ ಆರಂಭಿಸಬಹುದಲ್ಲವೇ?
ಜನಸಂದಣಿಯಾಗುತ್ತಿರುವ ಸಮಸ್ಯೆ ನಮ್ಮ ಗಮನಕ್ಕಿದೆ. ಚರ್ಚೆಯೂ ಆಗಿದೆ. ಹಿಂಗಾರು ಅವಧಿಯಲ್ಲಿ ಆದಷ್ಟು ಬೇಗನೆ ಮತ್ತೊಂದು ಕೇಂದ್ರ ಆರಂಭಿಸಲು ಕ್ರಮ ಕೈಗೊಳ್ಳಲಾಗುವುದು. ಬೆಂಬಲ ಬೆಲೆಯಲ್ಲಿ ಹೆಸರು ಹಾಗೂ ಸೂರ್ಯಕಾಂತಿ ಖರೀದಿಗೆ ನೋಂದಣಿ ಆರಂಭವಾಗಿದೆ. ಆದಷ್ಟು ಬೇಗನೆ ನೋಂದಣಿ ಮಾಡಿಕೊಳ್ಳಿ.
ರಮೇಶ, ಅಳವಂಡಿ: ಕಳೆದ ಹಿಂಗಾರಿನಲ್ಲಿ ಮೆಣಸಿನಕಾಯಿ ಬೆಳೆಗೆ ವಿಮೆ ತುಂಬಿದ್ದೆವು. ಇನ್ನೂ ಹಣ ಬಂದಿಲ್ಲ?
ಇದು ಬೆಳೆ ಆಧಾರಿತ ವಿಮೆಯಾಗಿದ್ದು, ತೋಟಗಾರಿಕಾ ಇಲಾಖೆಗೆ ಜಿಲ್ಲಾಧಿಕಾರಿ ಈ ಕುರಿತು ನಿರ್ದೇಶನ ನೀಡಿದ್ದಾರೆ. ಆದಷ್ಟು ಬೇಗನೆ ಬರಬಹುದು. ಹಿಂದಿನ ವರ್ಷ ರಾಜ್ಯ ಸರ್ಕಾರ ಮುಂಗಾರು ಬೆಳೆಗಳ ಬರ ಘೋಷಣೆ ಮಾಡಿತ್ತು. ಮುಂಗಾರಿನಲ್ಲಿ ₹ 74 ಕೋಟಿ ಬೆಳೆ ವಿಮೆ ರೈತರಿಗೆ ನೀಡಲಾಗಿದೆ.
ಚಂದ್ರಶೇಖರ, ಹನಕುಂಟಿ: ಮೆಕ್ಕಜೋಳ ಗಿಡ ಬುಡಸಮೇತ ಹಾಳಾಗಿದೆ ಹೋಗಿದ್ದು, ಏನು ಮಾಡಬೇಕು?
ಮಳೆ ಜಾಸ್ತಿಯಾಗಿರುವುದರಿಂದ ಸಮಸ್ಯೆಯಾಗಿದೆ. ಈಗ ನಿಯಂತ್ರಣ ಕಷ್ಟವಾಗಿದ್ದು, ಸಮಸ್ಯೆಯಾಗಿರುವ ಬೆಳೆಯನ್ನು ಆದಷ್ಟು ಬೇಗನೆ ಕಿತ್ತು ಹಾಕಿ. ಇಲ್ಲವಾದರೆ ಇರುವ ಬೆಳೆಗೂ ರೋಗ ಹರಡಿಕೊಳ್ಳುತ್ತದೆ. ಪರ್ಯಾಯ ಬೆಳೆಯ ಬಗ್ಗೆಯೂ ಯೋಚನೆ ಮಾಡಿ. ಎರಡ್ಮೂರು ದಿನಗಳಲ್ಲಿ ವಿಜ್ಞಾನ ಕೇಂದ್ರದ ಸಂಶೋಧಕರನ್ನು ನಿಮ್ಮೂರಿಗೆ ಕಳುಹಿಸುವೆ.
ಶಂಕ್ರಪ್ಪ ಸಾದರ, ಹಿರೇಹಂಚಿನಾಳ: ಹಲವು ಬೆಳೆಗಳಿಗೆ ಬೆಂಬಲ ಬೆಲೆ ಘೋಷಣೆಯಾಗಿದ್ದು, ಅದನ್ನು ಪಡೆದುಕೊಳ್ಳುವುದು ಹೇಗೆ?
ಬೆಂಬಲ ಬೆಲೆಯ ಯೋಜನೆ ಲಾಭ ಪಡೆದುಕೊಳ್ಳಲು ಬೆಳೆ ಸಮೀಕ್ಷೆಯಾಗಿರಬೇಕು. ಆಧಾರ್‌ ಕಾರ್ಡ್‌, ಬ್ಯಾಂಕ್‌ ಖಾತೆ ವಿವರ ಕೇಂದ್ರದಲ್ಲಿ ಕೊಡಬೇಕು. ಬೆಳೆ ಚೆನ್ನಾಗಿ ಒಣಗಿಸಿಕೊಂಡು ಹೋಗಬೇಕು.
ಏಳುಕೋಟೇಶ, ಬೆಟಗೇರಿ: ಹೊಲದಲ್ಲಿ ಉದ್ಯೋಗಖಾತ್ರಿ ಯೋಜನೆಯಡಿ 100 ದಿನ ಕೆಲಸ ನೀಡಲು ಕೃಷಿ ಇಲಾಖೆ ಅನುಷ್ಠಾನ ತೆಗೆದುಕೊಂಡಿದೆ. ಬದು ನಿರ್ಮಾಣಕ್ಕೆ ಇನ್ನೂ ಕೆಲಸ ಸಿಕ್ಕಿಲ್ಲ?
ಎಲ್ಲ ಇಲಾಖೆ ಸೇರಿ 100 ದಿನ ಕೆಲಸ ಕೊಡಬೇಕು ಎನ್ನುವ ನಿಯಮವಿದೆ. ಇಷ್ಟು ದಿನಗಳ ಕಾಲ ಹೊಲದಲ್ಲಿ ಬೆಳೆ ಇದ್ದ ಕಾರಣ ಕೊಟ್ಟಿರಲಿಲ್ಲ. ಬೆಳೆ ಕಟಾವು ಮಾಡಿದ ತಕ್ಷಣ ಕೆಲಸ ಮಾಡಿಕೊಡಲಾಗುವುದು.
ಹನುಮರಡ್ಡಿ, ಘಟ್ಟರೆಡ್ಡಿಹಾಳ: ಹೊಲ ಜಂಟಿಯಾಗಿದ್ದು, ಎರಡು ಪಹಣಿ ಇವೆ. ಜಿಪಿಎಸ್‌ ಮಾಡಲು ಹೋದಾಗ ಒಂದು ಪಹಣಿ ಮಾತ್ರ ಬರುತ್ತದೆ. ಈ ಸಮಸ್ಯೆಗೆ ಪರಿಹಾರವೇನು?
ಹಿಸ್ಸಾ ಆಗಿಲ್ಲವಾದರೆ ಈ ಸಮಸ್ಯೆಯಾಗುತ್ತದೆ. ಮೊದಲು ಹಿಸ್ಸಾ ಮಾಡಿಸಿ ಸಮಸ್ಯೆ ಪರಿಹಾರವಾಗುತ್ತದೆ. ಈ ಕುರಿತು ಪರಿಶೀಲಿಸಲು ನಮ್ಮ ಅಧಿಕಾರಿಗಳಿಗೆ ಸೂಚಿಸುವೆ. ನಿಮ್ಮ ವ್ಯಾಪ್ತಿಯ ಕವಲೂರು ಪಿ.ಆರ್‌.ಗೆ ಮಾಹಿತಿ ಕಳುಹಿಸಿ.
ಪರಮೇಶರಡ್ಡಿ, ಹ್ಯಾಟಿ: ನನ್ನ ಹಾಗೂ ತಾಯಿ ಹೆಸರಿನಲ್ಲಿ ಪಹಣಿ ಪ್ರತ್ಯೇಕವಾಗಿದೆ. ಪಿ.ಎಂ. ಕಿಸಾನ್ ಹಣ ಬರುತ್ತಿಲ್ಲ.
2019ಕ್ಕಿಂತಲೂ ಮೊದಲು ಪಹಣಿ ಇದ್ದವರಿಗೆ ಮಾತ್ರ ಈ ಸೌಲಭ್ಯ ಲಭಿಸುತ್ತದೆ. ಕುಟುಂಬದ ಒಬ್ಬರಿಗೆ ಮಾತ್ರ ಈ ಸೌಲಭ್ಯ ಲಭಿಸುತ್ತದೆ. ತಾಯಿಗೆ ಬಂದರೆ ಮಗನಿಗೆ, ಹೆಂಡತಿಗೆ ಬಂದರೆ ಗಂಡನಿಗೆ ಬರುವುದಿಲ್ಲ. ನಿಮ್ಮ ಸಮೀಪದ ಕೃಷಿ ಅಧಿಕಾರಿಯನ್ನು ಭೇಟಿಯಾಗಿ ಸಮಸ್ಯೆ ಪರಿಹರಿಸುತ್ತಾರೆ.
ಈಶ್ವರಯ್ಯ ಹಿರೇಬೊಮ್ಮನಹಾಳ: ಕೃಷಿ ಇಲಾಖೆಯಲ್ಲಿ ಇರುವ ಪ್ರಮುಖ ಯೋಜನೆಗಳು ಯಾವುವು? ಅವುಗಳನ್ನು ಪಡೆಯುವುದು ಹೇಗೆ?
ಕೃಷಿ ಇಲಾಖೆಯಿಂದ 20ಕ್ಕೂ ಹೆಚ್ಚು ಯೋಜನೆಗಳನ್ನು ಅನುಷ್ಠಾನ ಮಾಡಲಾಗುತ್ತಿದ್ದು ಹಿಂಗಾರು ಮತ್ತು ಮುಂಗಾರು ಹಂಗಾಮಿನಲ್ಲಿ ರೈತ ಸಂಪರ್ಕ ಕೇಂದ್ರಗಳ ಮೂಲಕ ಬಿತ್ತನೆ ಬೀಜ ವಿತರಣೆ ಟ್ರ್ಯಾಕ್ಟರ್‌ ನೇಗಿಲು ಹೀಗೆ ಕೃಷಿಗೆ ಸಂಬಂಧಿಸಿದ ಉಪಕರಣಗಳನ್ನು ಸಬ್ಸಿಡಿಯಲ್ಲಿ ವಿತರಣೆ ಮಾಡಲಾಗುತ್ತಿದೆ. ಅಗತ್ಯ ಇರುವವರು ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಿದರೆ ಇಲಾಖೆಯಲ್ಲಿ ಹಣಕಾಸಿನ ಲಭ್ಯತೆ ಆಧಾರದ ಮೇಲೆ ಮಂಜೂರು ಮಾಡಲಾಗುತ್ತದೆ. ಪ್ರಧಾನಮಂತ್ರಿ ಕೃಷಿ ಸಿಂಚಾಯ್‌ ಯೋಜನೆಯಲ್ಲಿ ಸ್ಪಿಂಕ್ಲರ್‌ ಪಡೆಯಲು ಶೇ 90ರಷ್ಟು ಸಹಾಯಧನ ಕೃಷಿ ಭಾಗ್ಯ ಯೋಜನೆಯಡಿ ಕೃಷಿ ಹೊಂಡ ಪಂಪ್‌ಸೆಂಟ್‌ ಸ್ಪಿಂಕ್ಲರ್‌ ಸೇರಿ ಹಲವು ಸೌಲಭ್ಯ ಲಭಿಸುತ್ತವೆ. ಮಣ್ಣು ಆರೋಗ್ಯ ಅಭಿಯಾನದಡಿ ಉಚಿತವಾಗಿ ಮಣ್ಣು ಪರೀಕ್ಷಾ ವರದಿ ನೀಡುವುದು ಹೀಗೆ ಅನೇಕ ಯೋಜನೆಗಳು ಇವೆ.
ಸಿರಿಧಾನ್ಯ ಮೇಳಕ್ಕೆ ರೈತನಿಗೆ ಆಹ್ವಾನ
‘ನವಣೆ ಬೆಳೆದಿದ್ದೇನೆ. ಇದಕ್ಕೆ ಪ್ರೋತ್ಸಾಹ ಸಿಗುತ್ತದೆಯೇ’ ಎಂದು ಕನಕಗಿರಿ ತಾಲ್ಲೂಕಿನ ಹುಲಿಹೈದರ ಗ್ರಾಮದ ಶಂಕ್ರಪ್ಪ ಟಿ. ಕೇಳಿದ ಪ್ರಶ್ನೆಗೆ ಉತ್ತರಿಸಿದ ರುದ್ರೇಶಪ್ಪ ಅವರು ‘₹10 ಸಾವಿರ ಪ್ರೋತ್ಸಾಹ ಧನ ಸಿಗುತ್ತದೆ. ಇದರ ಪ್ರಯೋಜನ ಪಡೆದುಕೊಳ್ಳಬಹುದು’ ಎಂದರು. ‘ಕುಷ್ಟಗಿ ತಾಲ್ಲೂಕಿನ ಹನುಮನಾಳ ಹಾಗೂ ಹನುಮಸಾಗರ ಭಾಗದಲ್ಲಿ ಕೆಲ ರೈತರು 20 ಎಕರೆ ಸಿರಿಧಾನ್ಯ ಬೆಳೆದಿದ್ದಾರೆ. ನೀವು ಬೆಳೆದ ಸಿರಿಧಾನ್ಯದ ಮಾರಾಟಕ್ಕೆ ಇಲಾಖೆಯಿಂದಲೇ ವ್ಯವಸ್ಥೆ ಮಾಡಿಕೊಡಲಾಗುವುದು. ಅಕ್ಟೋಬರ್‌ನಲ್ಲಿ ಬೆಂಗಳೂರಿನಲ್ಲಿ ಅಂತರರಾಷ್ಟ್ರೀಯ ಸಿರಿಧಾನ್ಯ ಮೇಳ ನಡೆಯಲಿದ್ದು ಜಿಲ್ಲೆಯಿಂದ ಬಸ್ ವ್ಯವಸ್ಥೆ ಇರುತ್ತದೆ. ನೀವೂ ಬನ್ನಿ’ ಎಂದು ರೈತನಿಗೆ ಆಹ್ವಾನ ನೀಡಿದರು.
ಸರ್ಕಾರದ ಆಸ್ತಿ ರಕ್ಷಣೆಗೆ ಬದ್ಧ
* ಪ್ರಲ್ಹಾದ ಜೋಶಿ ಕಾರಟಗಿ: ಕಾರಟಗಿ ಪಟ್ಟಣದಲ್ಲಿ ಕೃಷಿ ಇಲಾಖೆ ಕಚೇರಿ ಮುಂಭಾಗದಲ್ಲಿಯೇ ಅನಧಿಕೃತವಾಗಿ ಜಾಗ ಒತ್ತುವರಿ ಮಾಡಲಾಗಿದೆ. ಯಾವಾಗ ತೆರವು ಮಾಡಲಾಗುತ್ತದೆ? ಸರ್ಕಾರದ ಆಸ್ತಿ ಉಳಿಸುವುದು ನಮ್ಮ ಜವಾಬ್ದಾರಿ. ಈ ಕೆಲಸವನ್ನು ಮಾಡಿಯೇ ಮಾಡುತ್ತೇನೆ. ಕೃಷಿ ಇಲಾಖೆಗೆ ಹೊಸ ಕಟ್ಟಡ ನಿರ್ಮಾಣಕ್ಕೆ ಈಗಾಗಲೇ ₹2 ಕೋಟಿ ಮಂಜೂರಾಗಿದ್ದು ಅಲ್ಲಿ ಕಟ್ಟಡ ನಿರ್ಮಿಸಿ ಅನಧಿಕೃತ ಒತ್ತುವರಿ ತೆರವು ಮಾಡಿ ಕಾಂಪೌಂಡ್‌ ನಿರ್ಮಾಣ ಮಾಡಲಾಗುತ್ತದೆ. ಒತ್ತುವರಿ ಬಗ್ಗೆ ಸ್ಥಳೀಯ ಆಡಳಿತದ ಗಮನಕ್ಕೂ ತಂದಿದ್ದೇವೆ.
ಕೃಷಿ ಇಲಾಖೆಯ ಪ್ರಮುಖ ಯೋಜನೆಗಳು
* ರೈತರಿಗೆ ಶೇ 50ರಷ್ಟು ಸಹಾಯಧನದಲ್ಲಿ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ರೈತರಿಗೆ ಶೇ 75ರ ಸಹಾಯಧನದಲ್ಲಿ ಗರಿಷ್ಠ 5 ಎಕರೆಗೆ ಒಳಪಟ್ಟು ಬಿತ್ತನೆ ಬೀಜ ಒದಗಿಸಲಾಗುತ್ತದೆ.
* ಜಿಲ್ಲೆಯಲ್ಲಿ ಕಾರ್ಮಿಕರ ಸಮಸ್ಯೆ ನೀಗಿಸಿ ಕೃಷಿ ಚಟುವಟಿಕೆಗಳ ಶ್ರಮದಾಯಕ ದುಡಿಮೆ ತಗ್ಗಿಸಿ ಸಕಾಲದಲ್ಲಿ ಕೃಷಿ ಚಟುವಟಿಕೆಗಳನ್ನು ಕೈಗೊಳ್ಳಲು ಕೃಷಿ ಯಾಂತ್ರೀಕರಣ ಯೋಜನೆ ಜಾರಿಗೊಳಿಸಲಾಗಿದೆ. ಸಾಮಾನ್ಯ ರೈತರಿಗೆ ಶೇ 50ರಷ್ಟು ಸಹಾಯಧನ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ರೈತರಿಗೆ ಶೇ 90ರಷ್ಟು ಸಹಾಯಧನ ಗರಿಷ್ಠ ₹1 ಲಕ್ಷದ ತನಕ ಲಭಿಸುತ್ತದೆ.
* ಪ್ರಧಾನ ಮಂತ್ರಿ ಕೃಷಿ ಸಿಂಚಾಯಿ ಯೋಜನೆ (ಸೂಕ್ಷ್ಮ ನೀರಾವರಿ ಘಟಕ)
* ರಾಷ್ಟ್ರೀಯ ಆಹಾರ ಭದ್ರತಾ ಅಭಿಯಾನ
* ಕರ್ನಾಟಕ ರೈತ ಸುರಕ್ಷಾ ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆ
* ಪ್ರಧಾನ ಮಂತ್ರಿ ಕಿಸಾನ್ ಸಮ್ಮಾನ್ ನಿಧಿ ಯೋಜನೆ
ನಿರ್ವಹಣೆ: ಪ್ರಮೋದ ಕುಲಕರ್ಣಿ
ಸಹಕಾರ: ಶರಣಪ್ಪ ಮೆಣಸಿನಕಾಯಿ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.