ನಾಗಮಂಗಲ | ಸರ್ಕಾರಿ ನೌಕರರ ಸಂಘದ ಚುನಾವಣೆ: ಒಂದು ಮತದಲ್ಲಿ ಗೆದ್ದ ವೈ.ಸುರೇಶ್

ನಾಗಮಂಗಲ: ತಾಲ್ಲೂಕು ಸರ್ಕಾರಿ ನೌಕರರ ಸಂಘದ ನಿರ್ದೇಶಕ ಚುನಾವಣೆಯ ಪದವಿ ಪೂರ್ವ ಕಾಲೇಜು ವಿಭಾಗದಿಂದ ನಾಗಮಂಗಲ ಕಾಲೇಜಿನ ಉಪನ್ಯಾಸಕ ವೈ.ಸುರೇಶ್  1ಮತದ ಅಂತರದಲ್ಲಿ ಗೆಲುವು ಸಾಧಿಸಿದರು.

ತಾಲ್ಲೂಕು ಸರ್ಕಾರಿ ನೌಕರರ ಸಂಘದ ನಿರ್ದೇಶಕರ ಚುನಾವಣೆಯಲ್ಲಿ 34 ನಿರ್ದೇಶಕರ ಸ್ಥಾನದಲ್ಲಿ  ಒಟ್ಟು 27 ಮಂದಿ ಅವಿರೋಧವಾಗಿ ಆಯ್ಕೆಯಾಗಿದ್ದರು. ಉಳಿದಂತೆ 6 ನಿರ್ದೇಶಕರ ಸ್ಥಾನಗಳಿಗೆ ಸೋಮವಾರ ಮತದಾನ ನಡೆದಿತ್ತು.

ಸರ್ಕಾರಿ ಪದವಿ ಪೂರ್ವ ಕಾಲೇಜು ವಿಭಾಗದಲ್ಲಿ ಚಲಾವಣೆಯಾದ 39 ಮತಗಳ ಪೈಕಿ ವೈ.ಸುರೇಶ್ 20 ಮತ, ಲೋಕೋಪಯೋಗಿ, ಜಲಸಂಪನ್ಮೂಲ, ಸಣ್ಣ ನೀರಾವರಿ ಮತ್ತು ಅಂತರ್ಜಲ ಅಭಿವೃದ್ಧಿ ಇಲಾಖೆ ವಿಭಾಗದಲ್ಲಿ ಚಲಾವಣೆಯಾದ 39 ಮತಗಳಲ್ಲಿ ಪಾಲಕ್ಷ 20 ಮತ , ಪಂಚಾಯತ್‌ ರಾಜ್ ಎಂಜಿನಿಯರಿಂಗ್ ಪಿ.ಎಂ.ಜಿ.ಎಸ್.ವೈ ಯೋಜನೆ ಮತ್ತು ಗ್ರಾಮೀಣ ಕುಡಿಯುವ ನೀರು ಹಾಗೂ ನೈರ್ಮಲೀಕರಣ ಇಲಾಖೆ ಹಿಂದುಳಿದ ಮತ್ತು ಅಲ್ಪಸಂಖ್ಯಾತರ ಇಲಾಖೆ ವಿಭಾಗದಲ್ಲಿ ಚಲಾವಣೆಯಾದ 44 ಮತಗಳಲ್ಲಿ ಎ.ಎನ್.ಕುಮಾರ 27 ಮತಗಳನ್ನು ಪಡೆದು ಗೆಲುವು ಸಾಧಿಸಿದರು.

 ಸರ್ಕಾರಿ ಪ್ರಾಥಮಿಕ ಶಾಲಾ ವಿಭಾಗದ ಎರಡು ನಿರ್ದೇಶಕರ ಸ್ಥಾನಕ್ಕೆ ಜೆ.ವೈ.ಮಂಜುನಾಥ್, ಚಂದ್ರಮೌಳಿ, ಮತ್ತೊಂದು ಪ್ರಾಥಮಿಕ ಶಾಲಾ ವಿಭಾಗದಲ್ಲಿ ಡಿ.ಕೆ.ವಿನಯ, ನ್ಯಾಯಾಂಗ ಇಲಾಖೆಯ ವಿಭಾಗದಲ್ಲಿ  ಕೆ.ಎಸ್.ಗಿರೀಶ್ ಗೆಲುವು ಸಾಧಿಸಿದರು.