ನಾಗಮಂಗಲ ತಾಲ್ಲೂಕಿನಾದ್ಯಂತ ಉತ್ತಮ ಮಳೆ: ರೈತರ ಹರ್ಷ

ನಾಗಮಂಗಲ: ಪಟ್ಟಣ ಸೇರಿದಂತೆ ತಾಲ್ಲೂಕಿನಲ್ಲಿ ಮಂಗಳವಾರ ಉತ್ತಮ ಮಳೆಯಾಗಿದೆ.

ಬೆಳಿಗ್ಗೆಯಿಂದಲೇ ತಾಲ್ಲೂಕಿನ ಮೋಡ ಕವಿದ ವಾತಾವರಣವಿದ್ದು, ನಂತರ ಪಟ್ಟಣದ ವ್ಯಾಪ್ತಿಯೂ ಸೇರಿದಂತೆ ತಾಲ್ಲೂಕಿನಾದ್ಯಂತ ಪ್ರಾರಂಭಗೊಂಡ ಮಳೆಯು ಮಧ್ಯಾಹ್ನದವೆರೆಗೂ ಸುರಿಯಿತು.

ಬೆಳಿಗ್ಗೆ ಸೋನೆಯಿಂದ ಆರಂಭವಾಗಿ ನಂತರ ಬಿರುಸು ಪಡೆದುಕೊಂಡು ಜೋರಾಗಿ ಸುರಿಯಿತು. ಅಲ್ಲದೇ ಮಧ್ಯಾಹ್ನ 2ರವರೆಗೂ ಮಳೆ ಮುಂದುವರಿಯಿತು. ಅಲ್ಲದೇ ಪಟ್ಟಣ ಸೇರಿದಂತೆ ಸುತ್ತಲಿನ ಗ್ರಾಮಗಳಾದ ಕೆ.ಮಲ್ಲೇನಹಳ್ಳಿ, ಬೀರೇಶ್ವರಪುರ, ಗದ್ದೇಭೂವನಹಳ್ಳಿ, ಬದ್ರಿಕೊಪ್ಪಲು, ಮದಲಹಳ್ಳಿ, ಸಾರೀಮೇಗಲ ಕೊಪ್ಪಲು, ತೊಳಲಿ, ಚೌಡೇನಹಳ್ಳಿ, ಉಪ್ಪಾರಹಳ್ಳಿ ಮತ್ತು ಅರಸೇಗೌಡನಕೊಪ್ಪಲು ಭಾಗಗಳಲ್ಲೂ ಮಳೆಯಾಯಿತು.

ಅಲ್ಲದೇ ತಾಲ್ಲೂಕಿನ ಕಸಬಾ, ಬೆಳ್ಳೂರು ಮತ್ತು ದೇವಲಾಪುರ ಮತ್ತು ಬಿಂಡಿಗನವಿಲೆ ಹೋಬಳಿಯ ಕೆಲ ಭಾಗಗಳಲ್ಲೂ ಉತ್ತಮ ಮಳೆಯಾಗಿದೆ. ಅಲ್ಲದೇ ರಾಗಿ ಬಿತ್ತನೆ ಮಾಡಿರುವ ರೈತರಿಗೆ ಮಳೆಯು ಅನುಕೂಲವಾಗಿದ್ದು, ನಾಲ್ಕು ದಿನಗಳಿಂದಲೂ ಮಳೆಯಾಗುತ್ತಿರುವುದರಿಂದ ಕೃಷಿ ಚಟುವಟಿಕೆ ಬಿರುಸುಗೊಂಡಿದ್ದು, ರೈತರಲ್ಲಿ ಸಂತಸ ಮನೆಮಾಡಿದೆ.