ಶ್ರೀರಂಗಪಟ್ಟಣ: ದೇವಾಲಯದ ಗೇಟ್‌ ಬಿದ್ದು ಬಾಲಕ ಸಾವು

ಶ್ರೀರಂಗಪಟ್ಟಣ (ಮಂಡ್ಯ ಜಿಲ್ಲೆ): ತಾಲ್ಲೂಕಿನ ಹುಂಜನಕೆರೆ ಗ್ರಾಮದಲ್ಲಿ ಚನ್ನಕೇಶವ ದೇವಾಲಯದ ಕಾಂಪೌಂಡ್‌ಗೆ ಅಳವಡಿಸಲು ತಂದಿರಿಸಿದ್ದ ಕಬ್ಬಿಣದ ಗೇಟ್‌ ಬಿದ್ದು, ಗ್ರಾಮದ ಸಿದ್ದರಾಜು ಅವರ ಪುತ್ರ ಜಿಷ್ಣು (6) ಸೋಮವಾರ ರಾತ್ರಿ ಮೃತಪಟ್ಟ.

ಎರಡನೇ ಕಾರ್ತಿಕ ಸೋಮವಾರದ ಪೂಜೆಯಾಗಿ, ಭಕ್ತರು ಮನೆಗಳಿಗೆ ತೆರಳಿದ ನಂತರ ರಾತ್ರಿ 9 ಗಂಟೆ ಸುಮಾರಿಗೆ ಬಾಲಕ ಗೇಟ್‌ ಹಿಡಿದು ಆಟವಾಡುವಾಗ ಅದು ಆತನ ಮೇಲೆ ಬಿದ್ದಿತ್ತು. ತೀವ್ರವಾಗಿ ಗಾಯಗೊಂಡಿದ್ದ ಆತನನ್ನು ಮಂಡ್ಯದ ಮಿಮ್ಸ್‌ ಆಸ್ಪತ್ರೆಗೆ ದಾಖಲಿಸಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ತಹಶೀಲ್ದಾರ್‌ ವಿರುದ್ಧ ದೂರು:

ದೇವಾಲಯವು ಮುಜರಾಯಿ ಇಲಾಖೆಗೆ ಸೇರಿದ್ದು, 6 ತಿಂಗಳ ಹಿಂದೆ ಮುರಿದಿದ್ದ ಗೇಟ್‌ ಅನ್ನು ಸರಿಪಡಿಸಿರಲಿಲ್ಲ. ಗೋಡೆ ಪಕ್ಕ ನಿಲ್ಲಿಸಿದ್ದ ಗೇಟ್‌ ಅನ್ನು ಅಳವಡಿಸದ ಕಾರಣ ಈ ದುರಂತ ಸಂಭವಿಸಿದೆ. ತಹಶೀಲ್ದಾರ್‌, ಅರಕೆರೆ ಹೋಬಳಿಯ ಕಂದಾಯ ನಿರೀಕ್ಷಕ, ಗ್ರಾಮಲೆಕ್ಕಿಗ ಮತ್ತು ದೇವಾಲಯದ ಆಡಳಿತ ಮಂಡಳಿಯ ನಿರ್ಲಕ್ಷ್ಯದಿಂದ ಘಟನೆ ನಡೆದಿದ್ದು, ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಬಾಲಕನ ತಂದೆ ಸಿದ್ದರಾಜು ಪೊಲೀಸರಿಗೆ ದೂರು ನೀಡಿದ್ದಾರೆ. ಅರಕೆರೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.