ಮದ್ದೂರು: ಮನಸೆಳೆಯುತ್ತಿದೆ ‘ಕೂಸಿನ ಮನೆ’

ಮದ್ದೂರು: ಶಿಥಿಲಗೊಂಡು 10 ವರ್ಷದಿಂದ ಬಳಕೆಯಾಗದೇ, ಮುಚ್ಚಿದ ಹೆಮ್ಮನಹಳ್ಳಿಯ ಸರ್ಕಾರಿ ಶಾಲೆಗೆ ಕೊಠಡಿಗೆ ಗ್ರಾಮ ಪಂಚಾಯಿತಿಯಿಂದ ಹೊಸ ಸ್ವರೂಪ ನೀಡುವ ಮೂಲಕ ‘ಕೂಸಿನ ಮನೆ’ಯಾಗಿ ಪರಿವರ್ತಿಸಿದ್ದು, ಗ್ರಾಮಸ್ಥರ ಮೆಚ್ಚುಗೆಗೆ ಪಾತ್ರವಾಗಿದೆ.

ದಶಕದಿಂದ ಶಿಥಿಲಗೊಂಡು ಮೂಲೆಗುಂಪಾಗಿದ್ದ ಕಟ್ಟಡದ ಸದ್ಬಳಕೆಗೆ ಗ್ರಾ.ಪಂ. ಸದಸ್ಯ ನಂದೀಶ್ ಗೌಡ ಚಿಂತಿಸಿದ್ದರು. ಈ ಕುರಿತಂತೆ ಪಿಡಿಒ ಲೀಲಾವತಿ ಅವರ ಬಳಿ ಚರ್ಚಿಸಿ ಸುಮಾರು 8 ತಿಂಗಳ ಹಿಂದೆ ಯೋಜನೆ ರೂಪಿಸಿದರು. ಶಿಕ್ಷಣ ಇಲಾಖೆಗೆ ಪತ್ರ ಬರೆದು ಅನುಮತಿ ಪಡೆದು, ₹4 ಲಕ್ಷ ಖರ್ಚು ಮಾಡಿ ನವೀಕರಿಸಿದರು.

ಅದರ ಪರಿಣಾಮದ ಫಲವಾಗಿ ದಶಕದ ಹಿಂದೆ ಶಿಥಿಲಗೊಂಡು ಮುಚ್ಚಿಹೋಗಿ, ಬಳಕೆಯಾಗದೆ ಇದ್ದ ಸರ್ಕಾರಿ ಶಾಲೆಯ ಕಟ್ಟಡ ಹೊಸದಾಗಿ ವಿನ್ಯಾಸಗೊಂಡು ‘ಕೂಸಿನ ಮನೆ’ಯಾಗಿ ಪರಿವರ್ತನೆಗೊಂಡಿದೆ.  ಸೋಮವಾರ ಮಕ್ಕಳ ಮತ್ತು ಮಹಿಳಾ ಇಲಾಖೆಗೆ ಹಸ್ತಾಂತರಿಸಲಾಯಿತು. ಆ ಮೂಲಕ್ಕೆ ಗ್ರಾಮಕ್ಕೆ ‘ಕೂಸಿನ ಮನೆ’ ಕೇಂದ್ರ ಬಂದಂತಾಗಿದೆ.

ಕಳೆದ ವರ್ಷವೂ ಹೆಮ್ಮನಹಳ್ಳಿ ಗ್ರಾ. ಪಂ ವ್ಯಾಪ್ತಿಯ ಕದಲೀಪುರ ಗ್ರಾಮದ ಸರ್ಕಾರಿ ಶಾಲೆಯು ಸಂಪೂರ್ಣ ಮುಚ್ಚಿ ಹೋಗಿದ್ದರಿಂದ ನಂದೀಶ್ ಗೌಡ, ಪಿಡಿಒ ಲೀಲಾವತಿ ಅವರ ಆಸಕ್ತಿಯಿಂದ ನವೀಕೃತಗೊಂಡು ಹೊಸದಾದ ಅಂಗನವಾಡಿ ಕೇಂದ್ರವಾಗಿ, ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿತ್ತು.