ಮೈಸೂರು | ಗರಿಗೆದರಲಿದೆ ಪಾರಂಪರಿಕ ಸಂಗೀತೋತ್ಸವ

ಮೈಸೂರು: ದಸರೆಯಲ್ಲಿ ಅರಮನೆಯ ಮುಂಬೆಳಗಲ್ಲಿ ಸಂಗೀತ ಕಛೇರಿ ನೀಡುವುದು ಎಷ್ಟು ಸಂಭ್ರಮವೋ, ವಾಣಿವಿಲಾಸ ಮೊಹಲ್ಲಾದ 8ನೇ ಕ್ರಾಸ್‌ನ ಪುಟ್ಟ ಬೀದಿಯಲ್ಲಿ ಗಣೇಶನ ಮುಂದೆ ತನ್ಮಯರಾಗಿ ಹಾಡುವುದು ದೇಶದ ಪ್ರತಿಯೊಬ್ಬ ಸಂಗೀತಗಾರನ ಕನಸು!

ಕಳೆದ 6 ದಶಕದಿಂದ ‘ಪಾರಂಪರಿಕ ಸಂಗೀತೋತ್ಸವ’ ನಡೆಯುತ್ತಿರುವ ಮೈಸೂರಿನ ಈ ಪುಟ್ಟ ಬೀದಿ ಮಾಡುವ ಕೆಲಸವನ್ನು ಯಾವ ಸಂಗೀತ ವಿಶ್ವವಿದ್ಯಾಲಯವೂ ಮಾಡದೆಂದು ಸರೋದ್‌ ವಾದಕ ದಿವಂಗತ ಪಂಡಿತ್ ರಾಜೀವ್ ತಾರಾನಾಥ ದಶಕದ ಹಿಂದೆ ಪ್ರಶಂಸಿಸಿದ್ದರು. ಅದು ಈ ಬೀದಿಗೆ ನೀಡಿದ ನುಡಿಹಾರ.

ಶ್ರೀಪ್ರಸನ್ನ ವಿದ್ಯಾ ಗಣಪತಿ ಮಹೋತ್ಸವ ಚಾರಿಟಬಲ್‌ ಟ್ರಸ್ಟ್‌ (ಎಸ್‌ಪಿವಿಜಿಎಂಸಿ ಟ್ರಸ್ಟ್‌) 63ನೇ ಪಾರಂಪರಿಕ ಸಂಗೀತೋತ್ಸವ ಸೆ.7ರಿಂದ ಸೆ.18ರ ವರೆಗೆ ಆಯೋಜಿಸಿದ್ದು, 10 ದಿನ ನಿತ್ಯ ಭಾರತೀಯ ಸಂಗೀತದ ಉತ್ಸವ ನಡೆಯಲಿದೆ. ರಸದೌತಣ ಸವಿಯಲು ಸಹೃದಯರು ಕಾದು ಕುಳಿತಿದ್ದರೆ, ಇಲ್ಲಿ ಸಿಗುವ ಸಮ್ಮಾನಕ್ಕೆ, ಚಪ್ಪಾಳೆ, ನುಡಿಹಾರಕ್ಕೆ ದೇಶದ ಸಂಗೀತತಜ್ಞರು ತುದಿಗಾಲಿನಲ್ಲಿ ನಿಂತಿದ್ದಾರೆ. 

ಉತ್ಸವದಲ್ಲಿ 30ಕ್ಕೂ ಹೆಚ್ಚು ಕಛೇರಿ ನೀಡಿರುವ, ಖ್ಯಾತ ಕರ್ನಾಟಕ ಶಾಸ್ತ್ರೀಯ ಸಂಗೀತಗಾರ ವಿದ್ವಾನ್ ಟಿ.ಎಂ.ಕೃಷ್ಣ ಪ್ರಧಾನ ಆಕರ್ಷಣೆ. ಅವರು 16 ವರ್ಷದ ಬಾಲಕನಾಗಿದ್ದಾಗಿನಿಂದಲೂ ಇಲ್ಲಿ ಕಛೇರಿಗಳನ್ನು ನೀಡಿದ್ದಾರೆ. ಉತ್ಸವದ ಕೊನೇ ದಿನ ಅವರಿಗೆ ಸನ್ಮಾನವನ್ನು ಟ್ರಸ್ಟ್ ಮಾಡಲಿದೆ. ತಿರುವಾಯೂರು ಗಿರೀಶ್‌, ವಿಘ್ನೇಶ್‌ ಈಶ್ವರ್, ಕುನ್ನಕ್ಕುಡಿ ಬಾಲಮುರಳೀಕೃಷ್ಣ ಅವರ ಗಾಯನ ಸುಧೆ ಹರಿಯಲಿದೆ.

ಕರ್ನಾಟಿಕ್, ಹಿಂದೂಸ್ಥಾನಿ ಗಾಯನ, ವಾದನದ ನಾದದ ಅಲೆಗಳು ಉತ್ಸವದಲ್ಲಿ ಏಳಲಿವೆ. ಇದೇ ಮೊದಲು ಕಛೇರಿ ನೀಡುತ್ತಿರುವವರು ಹಲವರು. 8ರಂದು ಬಾಲಪ್ರತಿಭೆ ಸೂರ್ಯಗಾಯತ್ರಿ ಅವರ ಗಾಯನವಿದೆ. ಭಾವಪೂರ್ಣ ಪ್ರಸ್ತುತಿಯು ಎಂ.ಎಸ್‌.ಸುಬ್ಬಲಕ್ಷ್ಮಿ ಅವರನ್ನು ಹೋಲುತ್ತದೆಂದು ಸಂಗೀತ ವಲಯದಲ್ಲಿ ಮಾತಿದೆ. ಅವರ ಹಾಡುಗಾರಿಕೆಯ ಜನಪ್ರಿಯತೆಯು ಎಷ್ಟಿದೆಯೆಂದರೆ ಯೂಟ್ಯೂಬ್ ಚಾನಲ್‌ಗೆ 15 ಕೋಟಿ ವೀಕ್ಷಕರಿದ್ದಾರೆ.

ಕೇರಳದ ‘ಅಗಂ’ ಬ್ಯಾಂಡ್‌ನ ಗಾಯಕ ವಿದ್ವಾನ್ ಹರೀಶ್‌ ಶಿವರಾಮಕೃಷ್ಣನ್ ಉತ್ಸವದಲ್ಲಿ ಇದೇ ಮೊದಲ ಬಾರಿ ಕಛೇರಿ ನೀಡುತ್ತಿದ್ದು, ಯುವ ಸಮೂಹ ಅವರ ಗಾಯನಕ್ಕೆ ತಲೆದೂಗಲಿದೆ. ಕಲ್ಯಾಣಪುರಂ ಎಸ್‌.ಅರವಿಂದ್, ಸ್ಫೂರ್ತಿರಾವ್‌ ಕಛೇರಿ ನೀಡುತ್ತಿರುವ ಯುವ ಕಲಾವಿದರು.

ಜುಗಲ್‌ಬಂದಿ ಝಲಕ್‌: ಸಹೃದಯರ ಮೈ ನವಿರೇಳಿಸುವ ಜುಗಲ್‌ಬಂದಿ, ದಂದ್ವ ವಯೊಲಿನ್ ವಾದನ ಈ ಬಾರಿಯ ಉತ್ಸವದಲ್ಲಿವೆ. ವಿದ್ವಾನ್‌ ಶ್ರುತಿಸಾಗರ್, ವಿದುಷಿ ಚಾರುಮತಿ ರಘುರಾಮನ್ ಅವರ ಕೊಳಲು– ವಯೊಲಿನ್‌ ಮೋಡಿ ಇರಲಿದ್ದು, ಅಕ್ಕರೈ ಸಹೋದರಿಯರಾದ ಶುಭಲಕ್ಷ್ಮಿ– ಸ್ವರ್ಣಲತಾ ಅವರ ದ್ವಂದ್ವ ವಯೊಲಿನ್ ವಾದನವು ಮೈ ನವಿರೇಳಿಸಲಿದೆ.   

ವೈವಿಧ್ಯಮಯ: ಸಂಗೀತಕಟ್ಟಿ ಅವರ ಹಿಂದೂಸ್ಥಾನಿ ಗಾಯನವಿದ್ದು, ಮಾಲಿನಿ ಅವರ ‘ಹರಿಕಥೆ’ ಈ ಬಾರಿಯ ‍ಪ್ರಮುಖ ಆಕರ್ಷಣೆ. ಇದಲ್ಲದೆ ಭೀಮಾಶಂಕರ್ ಬಿದನೂರು ಅವರ ವಿದ್ಯಾರ್ಥಿಗಳಿಂದ ‘ಸಮೂಹ ತಬಲಾ’,  ಕಿರಗಸೂರು ರಾಜಣ್ಣ ಅವರ ರಂಗಗೀತೆಗಳ ಗಾಯನವಿದೆ. ಐತಿಹಾಸಿಕ ಸಾಹಿತ್ಯಕ ಕೃತಿಗಳಾದ ರಘುವಂಶ, ಆದಿಪುರಾಣದ ಭರತ ಬಾಹುಬಲಿ ಯುದ್ಧ, ಗಣೇಶ ಪುರಾಣ, ಕನ್ನಡ ಭಾಗವತ, ಶಿವತತ್ವ ಚಿಂತಾಮಣಿ ಕಾವ್ಯಾವಾಚನ, ಗಮಕ ಪ್ರಸ್ತುತಿಯೂ ಇರಲಿವೆ. 

ಗರಿ ಸಂಗ್ರಹಿಸುತ್ತಿದ್ದೆ: ‘ಮೊಹಲ್ಲಾದ ಮಹಾಲಿಂಗು, ರಘೋತ್ತಮ ದಾಸ, ಜಿ.ಟಿ.ಸುಬ್ಬರಾವು, ಶ್ರೀರಾಮ ಅಯ್ಯಂಗಾರ್‌, ನಂಜಪ್ಪ, ಸೌಂದರ್ಯಮ್ಮ ವೆಂಕಟೇಶ್‌, ನಾಗಮ್ಮ 1962ರಲ್ಲಿ ಮೊದಲ ಗಣೇಶ ಉತ್ಸವ ನಡೆಸಲು ನಿರ್ಧರಿಸಿದ್ದರು. ಇವರಲ್ಲಿ ನನ್ನ ತಾಯಿ ರಾಜಮ್ಮ ಸಿ.ಆರ್‌.ಗೌಡ ಕೂಡ ಇದ್ದರು. ಉತ್ಸವದ ಚಪ್ಪರ ಹಾಕಲು ಗರಿ ತೆಗೆದುಕೊಂಡು ಬರಲು ತಾಯಿ ಹೇಳಿದ್ದರು. ಎಲ್ಲರ ಮನೆಗೂ ಹೋಗುತ್ತಿದ್ದೆ. ಆಗ ನನಗೆ 10 ವರ್ಷ’ ಎಂದು ಟ್ರಸ್ಟ್ ಕಾರ್ಯದರ್ಶಿ ಸಿ.ಆರ್‌.ಹಿಮಾಂಶು ‘ಪ್ರಜಾವಾಣಿ’ಗೆ ತಿಳಿಸಿದರು.

‘1985ರಲ್ಲಿ ಟ್ರಸ್ಟ್‌ ರಚನೆಯಾಯಿತು. ಸರೋಜಾ ತುಳಸಿದಾಸಪ್ಪ, ಕೆ.ವಿ.ಮೂರ್ತಿ, ಆರ್‌.ವಾಸುದೇವಮೂರ್ತಿ, ಸೀತಾರಾಮ ರಾವ್, ಅಧಿಕಾರಿಗಳಾದ ಚಿರಂಜೀವಿ ಸಿಂಗ್‌, ಕೃಷ್ಣಕುಮಾರ್‌, ವಿಕ್ರಾಂತ್‌, ಡಿ.ಎನ್.ಮುನಿಕೃಷ್ಣ, ಕೆ.ಆರ್‌.ಶ್ರೀನಿವಾಸನ್‌, ಸಿದ್ದಯ್ಯ ನಿರಂತರ ಪ್ರೋತ್ಸಾಹ ನೀಡಿದ್ದರಿಂದ ಉತ್ಸವ ಅಂತರರಾಷ್ಟ್ರೀಯ ಮಟ್ಟದಲ್ಲೂ ಹೆಸರಾಯಿತು’ ಎಂದು ಸ್ಮರಿಸಿದರು.