ತಿ.ನರಸೀಪುರ: ಬಾಯಿ ಬೀಗ ಧರಿಸಿ ಹರಕೆ ತೀರಿಸಿದ ಭಕ್ತರು

ತಿ.ನರಸೀಪುರ: ಬಣ್ಣಾರಿ ಮಾರಿಯಮ್ಮ ದೇವಸ್ಥಾನದ 79ನೇ ವರ್ಷದ ವಾರ್ಷಿಕೋತ್ಸವದ ಅಂಗವಾಗಿ ಪಟ್ಟಣದಲ್ಲಿ ಬುಧವಾರ ಬಾಯಿ ಬೀಗದ ಧರಿಸಿದ ಭಕ್ತರು ಪಟ್ಟಣದಲ್ಲಿ ಮೆರವಣಿಗೆಯಲ್ಲಿ ಸಾಗಿದರು.

ಪಟ್ಟಣದ ಗುಂಜಾ ನರಸಿಂಹ ಸ್ವಾಮಿ ದೇವಸ್ಥಾನದ ಮುಂಭಾಗದ ಸಂಗಮದಲ್ಲಿ ಬೆಳಿಗ್ಗೆ ಪುಣ್ಯ ಸ್ನಾನದ ನಂತರ ಹರಕೆ ಹೊತ್ತ ಭಕ್ತರು ಸಾಲಿನಲ್ಲಿ ನಿಂತು ಬಾಯಿ ಬೀಗ ಹಾಕಿಸಿಕೊಂಡು ತಮ್ಮ ಹರಕೆ ತೀರಿಸುವುದರ ಜತೆಗೆ ಭಕ್ತಿ ಪ್ರದರ್ಶನ ಮಾಡಿದರು.

ಸುಮಾರು 5ರಿಂದ 10 ಅಡಿಗಳ ಉದ್ದದ ಕಬ್ಬಿಣದ ಸರಳುಗಳ ಚೂಪಾದ ತ್ರಿಶೂಲಾಕಾರದ ಬಾಯಿ ಬೀಗ ಧರಿಸಿದ್ದವರು ಪಟ್ಟಣದ ವಿವಿಧ ಬೀದಿಗಳಲ್ಲಿ ಸಂಚರಿಸಿದರು. ಬಳಿಕ ದೇವಾಲಯಕ್ಕೆ ತೆರಳಿದ ಭಕ್ತರು ಬಾಯಿ ಬೀಗ ತೆಗೆಸಿ ದೇವಿಯ ದರ್ಶನ ಪಡೆದು ಪೂಜೆ ಸಲ್ಲಿಸಿದರು.