ಸಾಲದ ಹೊರೆ: ಬಸ್ ಚಾಲಕ ಆತ್ಮಹತ್ಯೆ

ಪ್ರಜಾವಾಣಿ ವಾರ್ತೆ

ಮೈಸೂರು: ಸಾಲದ ಕಿರುಕುಳದಿಂದ ಬೇಸತ್ತು ಕೆಎಸ್‌ಆರ್‌ಟಿಸಿ ಬಸ್ ಚಾಲಕ ವರುಣ ನಾಲೆಗೆ ಬಿದ್ದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಇಲ್ಲಿನ ನೆಹರೂ ನಗರದ ನಿವಾಸಿ ಶ್ರೀಕಾಂತ ಯಲ್ಲಪ್ಪ ಬಾಲಂಗಾವಿ(39) ಮೃತ ಚಾಲಕ. ರಾಯಚೂರು ಮೂಲದ ಅವರು ನ.6ರಂದು ಮನೆಯಿಂದ ತೆರಳಿದ್ದರು. ತಾಲ್ಲೂಕಿನ ಕಿರಾಳು ಗ್ರಾಮದ ವರುಣ ಉಪ ಕಾಲುವೆಯಲ್ಲಿ ನ.9ರಂದು ಶವ ದೊರೆತಿದೆ.

‘ಸ್ನೇಹಿತರಾದ ಗುರುರಾಜ ಉಪಾಸ್ ಮತ್ತು ಸುಭಾಷ್ ಬಳಿ ಸಾಲ ಮಾಡಿದ್ದು, ಹಣ ಮರುಪಾವತಿ ವಿಚಾರದಲ್ಲಿ ಗಲಾಟೆಯಾಗಿತ್ತು. ಇದರಿಂದ ರೋಸಿ ಹೋಗಿದ್ದ ಅವರು ನನ್ನ ಸಾವಿಗೆ ಗುರುರಾಜ ಉಪಾಸ್ ಮತ್ತು ಸುಭಾಷ್ ಅವರೇ ಕಾರಣ ಎಂದು ಡೆತ್ ನೋಟ್ ಬರೆದಿಟ್ಟು, ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ’ ಎಂದು ಪೊಲೀಸರು ತಿಳಿಸಿದ್ದಾರೆ.

ಮೃತರ ಪತ್ನಿ ನೀಡಿದ ದೂರಿನ ಮೇರೆಗೆ ವರುಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.