ಮೈಸೂರು | ಮುಡಾ ಪ್ರಕರಣ: ಲೋಕಾಯುಕ್ತ ವಿಚಾರಣೆ ಎದುರಿಸಿದ ಸಿಎಂ ಸಿದ್ದರಾಮಯ್ಯ
ತವರು ಮೈಸೂರಿನಲ್ಲಿ ಎರಡು ತಾಸು ವಿಚಾರಣೆಗೊಳಗಾದ ಸಿದ್ದರಾಮಯ್ಯ
ಮೈಸೂರು: ‘ಪತ್ನಿ ಬಿ.ಎಂ. ಪಾರ್ವತಿ ಅವರಿಗೆ ಮುಡಾದಿಂದ ಬದಲಿ ನಿವೇಶನ ಕೊಡಿಸಲು ಪ್ರಭಾವ ಬೀರಿದ ಆರೋಪ’ ಎದುರಿಸುತ್ತಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಬುಧವಾರ ಇಲ್ಲಿನ ಲೋಕಾಯುಕ್ತ ಎಸ್.ಪಿ. ಕಚೇರಿಯಲ್ಲಿ ವಿಚಾರಣೆಗೆ ಹಾಜರಾದರು.
ಅಧಿಕಾರದಲ್ಲಿ ಇದ್ದಾಗಲೇ ಲೋಕಾಯುಕ್ತ ವಿಚಾರಣೆ ಎದುರಿಸಿದ ಮೊದಲ ಮುಖ್ಯಮಂತ್ರಿ ಅವರಾಗಿದ್ದಾರೆ. ಅಲ್ಲದೇ, ನಾಲ್ಕು ದಶಕಗಳ ತಮ್ಮ ಸುದೀರ್ಘ ರಾಜಕೀಯ ಬದುಕಿನಲ್ಲಿ ಎದುರಿಸಿದ ಮೊದಲ ವಿಚಾರಣೆಯೂ ಇದಾಗಿದೆ.
ಎರಡು ತಾಸು ವಿಚಾರಣೆ: ಕಾನೂನು ಸಲಹೆಗಾರ ಎ.ಎಸ್. ಪೊನ್ನಣ್ಣ ಜೊತೆ ಖಾಸಗಿ ಕಾರಿನಲ್ಲಿ ಬೆಳಿಗ್ಗೆ 10.10ಕ್ಕೆ ಲೋಕಾಯುಕ್ತ ಕಚೇರಿಗೆ ಬಂದ ಸಿದ್ದರಾಮಯ್ಯ, ಮಧ್ಯಾಹ್ನ 12.07ರ ಸುಮಾರಿಗೆ ಅಲ್ಲಿಂದ ನಿರ್ಗಮಿಸಿದರು.
ಲೋಕಾಯುಕ್ತ ಕಚೇರಿಯ ಮೊದಲ ಮಹಡಿಯಲ್ಲಿನ ಕಾನ್ಫರೆನ್ಸ್‌ ಸಭಾಂಗಣದಲ್ಲಿ ಎರಡು ಗಂಟೆವರೆಗೆ ನಡೆದ ವಿಚಾರಣೆಯಲ್ಲಿ ಮೈಸೂರು ಲೋಕಾಯುಕ್ತ ಎಸ್.ಪಿ. ಟಿ.ಜೆ. ಉದೇಶ್‌, ಚಾಮರಾಜನಗರ ಡಿವೈಎಸ್‌ಪಿ ಥಾಮಸ್‌ ಮ್ಯಾಥ್ಯೂ ಹಾಗೂ ಕೊಡಗು ಇನ್‌ಸ್ಪೆಕ್ಟರ್ ಲೋಕೇಶ್‌ ಅವರನ್ನು ಒಳಗೊಂಡ ತನಿಖಾಧಿಕಾರಿಗಳ ತಂಡವು, ಪ್ರಕರಣದ ಮೊದಲ ಆರೋಪಿ ಆಗಿರುವ ಸಿದ್ದರಾಮಯ್ಯ ಅವರನ್ನು ಪ್ರಶ್ನಿಸಿತು.
ಒಟ್ಟು 3–4 ಪುಟಗಳ ಪ್ರಶ್ನಾವಳಿ ಸಿದ್ಧಪಡಿಸಿದ್ದ ಅಧಿಕಾರಿಗಳು, 25ರಿಂದ 30 ಪ್ರಶ್ನೆಗಳಿಗೆ ಉತ್ತರ ಪಡೆದುಕೊಂಡರು. ಇಡೀ ವಿಚಾರಣೆಯನ್ನು ವಿಡಿಯೊ ರೆಕಾರ್ಡ್ ಮಾಡಿಕೊಳ್ಳಲಾಯಿತು. ಪ್ರತಿ ಪ್ರಶ್ನೆಗೂ ಸಿದ್ದರಾಮಯ್ಯ ನಗುಮೊಗದಿಂದ, ತಾಳ್ಮೆಯಿಂದ ಉತ್ತರಿಸಿದರು ಎಂದು ಲೋಕಾಯುಕ್ತ ಮೂಲಗಳು ತಿಳಿಸಿವೆ.
ಇಡೀ ಪ್ರಕರಣದ ಕೇಂದ್ರಬಿಂದುವಾಗಿರುವ ಮೈಸೂರು ತಾಲ್ಲೂಕಿನ ಕೆಸರೆ ಗ್ರಾಮದ ಸರ್ವೆ ಸಂಖ್ಯೆ 464ರ ದಾಖಲೆಗಳನ್ನು ಹಿಡಿದಿದ್ದ ಅಧಿಕಾರಿಗಳು, ಆ ಸಂಬಂಧವೂ ವಿವರಣೆ ಪಡೆದರು.
‘ಜಮೀನಿನ ಮಾಲೀಕ ಎನ್ನಲಾದ ದೇವರಾಜು ನಿಮಗೆ ಹೇಗೆ ಪರಿಚಯ, 1997–98ರಲ್ಲಿ ಈ ಜಮೀನಿನ ಡಿನೋಟಿಫೈ ವೇಳೆ ಉಪಮುಖ್ಯಮಂತ್ರಿ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರೂ ಆಗಿದ್ದಿರಿ. ಆಗ ಏನಾದರೂ ಪ್ರಭಾವ ಬೀರಿದ್ದೀರಾ, ನಿಮ್ಮ ಬಾಮೈದ ಮಲ್ಲಿಕಾರ್ಜುನ ಸ್ವಾಮಿ 2004ರಲ್ಲಿ ಈ ಜಮೀನು ಖರೀದಿಸಿದ್ದು ನಿಮಗೆ ಮಾಹಿತಿ ಇತ್ತಾ, 2005ರಲ್ಲಿ ಅಂದಿನ ಜಿಲ್ಲಾಧಿಕಾರಿ ಈ ಜಮೀನಿನ ಅನ್ಯಕ್ರಾಂತ ಆದೇಶ ಮಾಡಿಕೊಡಲು ಪ್ರಭಾವ ಬೀರಿದ್ದೀರಾ, 2010ರಲ್ಲಿ ನಿಮ್ಮ ಪತ್ನಿಗೆ ಈ ಜಮೀನು ದಾನಪತ್ರದ ಮೂಲಕ ವರ್ಗಾವಣೆ ಆಗಿದ್ದು, ಅದಾಗಲೇ ಅಲ್ಲಿ ಮುಡಾ ಬಡಾವಣೆ ನಿರ್ಮಿಸಿದ ಸಂಗತಿ ನಿಮ್ಮ ಗಮನದಲ್ಲಿ ಇತ್ತೆ’ ಎಂಬ ಪ್ರಶ್ನೆಗಳನ್ನು ತನಿಖಾಧಿಕಾರಿಗಳು ಕೇಳಿದರು ಎಂದು ಮೂಲಗಳು ತಿಳಿಸಿವೆ.
ಮುಡಾದಿಂದ 2021ರಲ್ಲಿ ಬಿ.ಎಂ. ಪಾರ್ವತಿ ಅವರಿಗೆ ವಿಜಯನಗರದಲ್ಲಿ ಮಂಜೂರಾದ 14 ಬದಲಿ ನಿವೇಶನಗಳ ಬಗ್ಗೆಯೂ ತನಿಖಾಧಿಕಾರಿಗಳ ತಂಡವು ಪ್ರಶ್ನಿಸಿದೆ. ‘ಅಲ್ಲೇ ನಿವೇಶನ ಕೊಡುವಂತೆ ನೀವು ಪ್ರಭಾವ ಬೀರಿದ್ದೀರಾ? ಅಧಿಕಾರಿಗಳ ಮೇಲೆ ಒತ್ತಡ ಹೇರಿದ್ದೀರಾ’ ಎಂದು ತನಿಖಾಧಿಕಾರಿಗಳು ಪ್ರಶ್ನಿಸಿದರು ಎಂದು ಹೇಳಿವೆ.
ವಿಚಾರಣೆ ಮುಕ್ತಾಯದ ಬಳಿಕ ಹೇಳಿಕೆಗಳನ್ನು ಲಿಖಿತ ರೂಪದಲ್ಲಿ ದಾಖಲಿಸಿಕೊಂಡ ತನಿಖಾಧಿಕಾರಿಗಳ ತಂಡವು ಅದಕ್ಕೆ ಸಿದ್ದರಾಮಯ್ಯ ಅವರಿಂದ ಸಹಿ ಪಡೆದಿದೆ. ಅಗತ್ಯವಿದ್ದಲ್ಲಿ ಮತ್ತೆ ವಿಚಾರಣೆಗೆ ಕರೆಯುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ಮೂಲಗಳು ಹೇಳಿವೆ.
ಪೊಲೀಸ್ ಬಂದೋಬಸ್ತ್, ಮಾಧ್ಯಮಗಳಿಗೂ ನಿರ್ಬಂಧ: ಲೋಕಾಯುಕ್ತ ಕಚೇರಿಯ ಸುತ್ತಮುತ್ತ ಪೊಲೀಸ್ ಬಂದೋಬಸ್ತ್ ಮಾಡಲಾಗಿತ್ತು. ವಿಚಾರಣೆಯ ಅವಧಿಯಲ್ಲಿ ಸುತ್ತಲಿನ ರಸ್ತೆಗಳಲ್ಲಿ ವಾಹನಗಳ ಸಂಚಾರಕ್ಕೆ ನಿರ್ಬಂಧ ಹೇರಲಾಗಿತ್ತು. ಸಮೀಪದಿಂದ ಚಿತ್ರೀಕರಣಕ್ಕೆ ಮಾಧ್ಯಮದವರಿಗೂ ಅವಕಾಶ ನೀಡಲಿಲ್ಲ.
ಹೇಗಿತ್ತು ಸಿದ್ದರಾಮಯ್ಯ ದಿನಚರಿ? ಬೆಳಿಗ್ಗೆ 7.30: ಬೆಂಗಳೂರಿನ ನಿವಾಸದಿಂದ ಮೈಸೂರಿಗೆ ಪ್ರಯಾಣ ಬೆಳಿಗ್ಗೆ 9.30: ಮೈಸೂರಿನ ಸರ್ಕಾರಿ ಅತಿಥಿಗೃಹಕ್ಕೆ ಸಿದ್ದರಾಮಯ್ಯ ಭೇಟಿ; ಉಪಾಹಾರ ಸೇವನೆ ಬೆಳಿಗ್ಗೆ 10.05: ಬೆಂಗಾವಲು ವಾಹನವಿಲ್ಲದೆ ಖಾಸಗಿ ಕಾರಿನಲ್ಲಿ ಲೋಕಾಯುಕ್ತ ಕಚೇರಿಯತ್ತ ಪ್ರಯಾಣ ಬೆಳಿಗ್ಗೆ 10.10: ಲೋಕಾಯುಕ್ತ ಕಚೇರಿಗೆ ಬಂದ ಮುಖ್ಯಮಂತ್ರಿ ಮಧ್ಯಾಹ್ನ 12.07: ವಿಚಾರಣೆ ಪೂರ್ಣ; ಲೋಕಾಯುಕ್ತ ಕಚೇರಿಯಿಂದ ನಿರ್ಗಮನ ಮಧ್ಯಾಹ್ನ 12.45: ಸರ್ಕಾರಿ ಅತಿಥಿಗೃಹದಿಂದ ಚನ್ನಪಟ್ಟಣದತ್ತ ಪ್ರಯಾಣ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.