ರಾಜ್ಯಪಾಲರಲ್ಲ, ಕೇಂದ್ರಪಾಲರೆನ್ನಿ: ಹಂಸಲೇಖ ವ್ಯಂಗ್ಯ

ಮೈಸೂರು: ‘ಕೇಂದ್ರ ಸರ್ಕಾರದ ಆದೇಶದಂತೆ ವರ್ತಿಸುತ್ತಿರುವ ರಾಜ್ಯಪಾಲರನ್ನು ಕೇಂದ್ರಪಾಲ ಎಂದೇ ಕರೆಯುವುದು ಸೂಕ್ತ’ ಎಂದು ಚಲನಚಿತ್ರ ಸಂಗೀತ ನಿರ್ದೇಶಕ ಹಂಸಲೇಖ ವ್ಯಂಗ್ಯವಾಡಿದರು.

ಮುಖ್ಯಮಂತ್ರಿ ಸಿದ್ಧರಾಮಯ್ಯ ವಿರುದ್ಧ ತನಿಖೆಗೆ ಅನುಮತಿಸಿರುವ ರಾಜ್ಯಪಾಲರ ನಡೆ ಖಂಡಿಸಿ ‘ಕರ್ನಾಟಕ ಜನರಂಗ’ ನಗರದ ಚಿಕ್ಕಗಡಿಯಾರದಲ್ಲಿ ಶನಿವಾರ ಸಂಜೆ ಆರಂಭಿಸಿದ 24 ಗಂಟೆಗಳ ಅಹೋರಾತ್ರಿ ಧರಣಿಗೆ ಚಾಲನೆ ನೀಡಿ ಮಾತನಾಡಿದರು.

‘ತನಿಖೆಗೆ ಅನುಮತಿ ನೀಡಿದ ನಂತರ ರಾಜ್ಯಪಾಲರಿಗೆ ‘ಝಡ್‌’ ಶ್ರೇಣಿ ಭದ್ರತೆ ನೀಡಲಾಗಿದೆ. ಭದ್ರತೆ ನೀಡಬೇಕಿರುವುದು ಸಂವಿಧಾನಕ್ಕೆ. ಜನರೇ ‘ಎ ಟು ಝಡ್‌’ ಭದ್ರತೆ ನೀಡಲಿದ್ದಾರೆ’ ಎಂದರು.

ಲೇಖಕ ಪ್ರೊ.ಬಂಜಗೆರೆ ಜಯಪ್ರಕಾಶ್‌ ಮಾತನಾಡಿ, ‘ಈ ಹಿಂದೆ ಕೇಂದ್ರದಲ್ಲಿ ಕಾಂಗ್ರೆಸ್ ಸರ್ಕಾರವಿದ್ದಾಗ, ಇದೇ ರಾಜ್ಯಪಾಲ ಹುದ್ದೆಗಳನ್ನು ದುರ್ಬಳಕೆ ಮಾಡಿದಾಗಲೂ ಖಂಡಿಸಿದ್ದೇವೆ’ ಎಂದು ಹೇಳಿದರು.

ಸಬಿಹಾ ಭೂಮಿಗೌಡ, ಟಿ.ಗುರುರಾಜ್, ಎಚ್‌.ಜನಾರ್ಧನ್, ಗೋಪಾಲಕೃಷ್ಣ, ಕೆ.ಎಸ್‌.ಶಿವರಾಮ್, ಕಾಳಚನ್ನೇಗೌಡ, ಸವಿತಾ ಪ.ಮಲ್ಲೇಶ್, ನಾ.ದಿವಾಕರ, ರವಿರಾವ್ ಹಾಜರಿದ್ದರು.