ದಸರಾ ಉತ್ಸವ: ಪ್ರಜಾಪ್ರಭುತ್ವದ ಆಶಯ ಬಿಂಬಿಸಲು ‘ಯೋಗ ಪುಷ್ಪ’

ಮೈಸೂರು: ದಸರಾ ಉತ್ಸವಕ್ಕೆ ಈ ಬಾರಿ ವಿಶಿಷ್ಟ ಯೋಗ ಪ್ರದರ್ಶನ ಮೆರುಗು ನೀಡಲಿದೆ. ಅಂಬಾವಿಲಾಸ ಅರಮನೆ ಆವರಣದಲ್ಲಿ ಸಾವಿರಾರು ಯೋಗಪಟುಗಳಿಂದ ಮಾನವ ಸರಪಳಿ ರಚಿಸಿ ‘ಪ್ರಜಾಪ್ರಭುತ್ವಕ್ಕಾಗಿ ಯೋಗ’ ಆಚರಣೆಗೆ ಸಿದ್ಧತೆ ನಡೆದಿದೆ.

ಅ.4ರಿಂದ 12ರವರೆಗೆ ಕಾರ್ಯಕ್ರಮಕ್ಕೆ ಯೋಜಿಸಲಾಗಿದೆ. ಯೋಗ ಸ್ಪರ್ಧೆ, ಪ್ರಕೃತಿ ಸವಿಯಲು ಯೋಗ ಚಾರಣ, ಭಕ್ತಿ ಸೃಜಿಸಲು ಯೋಗದೊಂದಿಗೆ ದುರ್ಗಾ ನಮಸ್ಕಾರ, ಸಾಂಸ್ಕೃತಿಕವಾಗಿ ಜನರ ರಂಜಿಸಲು ‘ಯೋಗಗುಚ್ಛ’ ನೃತ್ಯ ಪ್ರದರ್ಶನಕ್ಕೂ ಯೋಗ ದಸರಾ ಉಪ ಸಮಿತಿ ತಯಾರಿ ನಡೆಸುತ್ತಿದೆ.

ಅ.7ರಂದು ಅರಮನೆ ಆವರಣದಲ್ಲಿ ನಡೆಯುವ ‘ಪ್ರಜಾಪ್ರಭುತ್ವಕ್ಕಾಗಿ ಯೋಗ’ದಲ್ಲಿ 5ಸಾವಿರ ಜನರು ಭಾಗವಹಿಸಲಿದ್ದಾರೆ. ಬೃಹತ್‌ ಮಾನವ ಸರಪಳಿಯ ಚಕ್ರಗಳನ್ನು ರಚಿಸಿ ಯೋಗ ಮಾಡಲಾಗುತ್ತದೆ. ಸಂವಿಧಾನ, ಪ್ರಜಾಪ್ರಭುತ್ವದ ಮೌಲ್ಯಗಳನ್ನು ಸಾರುವ ವಿವಿಧ ಭಿತ್ತಿ ಚಿತ್ರಗಳನ್ನು, ಫೋಷವಾಕ್ಯಗಳನ್ನು ಯೋಗಪಟುಗಳು ಪ್ರದರ್ಶಿಸಲಿದ್ದಾರೆ.

ದುರ್ಗಾ ನಮಸ್ಕಾರ: ‘ಅ.9ರಂದು ಚಾಮುಂಡಿಬೆಟ್ಟದ ಪಾದದಿಂದ ಬೆಟ್ಟದ ಮೇಲ್ಭಾಗದವರೆಗೆ ಮೆಟ್ಟಿಲುಗಳ ಮೂಲಕ ಯೋಗ ಚಾರಣ ನಡೆಯಲಿದೆ. ನೂರಾರು ಯೋಗಪಟುಗಳು, ಯೋಗ ತರಗತಿಯ ವಿದ್ಯಾರ್ಥಿಗಳು ಭಾಗವಹಿಸಲಿದ್ದಾರೆ. ಬಳಿಕ, ಚಾಮುಂಡಿ ದೇವಸ್ಥಾನದ ಆವರಣದ‌ಲ್ಲಿ ಯೋಗದ ಸುಮಾರು 12 ಭಂಗಿಗಳ ಮೂಲಕ 8 ನಿಮಿಷಗಳ ಕಾಲ ದುರ್ಗಾ ನಮಸ್ಕಾರ ನಡೆಯಲಿದೆ’ ಎಂದು ಯೋಗ ದಸರಾ ಉಪ ಸಮಿತಿ ಕಾರ್ಯದರ್ಶಿ ಡಾ.ಪುಷ್ಪಾ ‘ಪ್ರಜಾವಾಣಿ’ಗೆ ತಿಳಿಸಿದರು.

ಬನ್ನಿಮಂಟಪದಲ್ಲಿ ಯೋಗ ನೃತ್ಯ: ‘ಅ.12ರಂದು ಬನ್ನಿಮಂಟಪದ ಪಂಜಿನ ಕವಾಯತು ಮೈದಾನದಲ್ಲಿ ನಡೆಯುವ ವಿವಿಧ ಕಾರ್ಯಕ್ರಮಗಳಿಗೂ ಮುನ್ನ ಯೋಗಗುಚ್ಛ ಹೆಸರಿನಲ್ಲಿ ಯೋಗ ನೃತ್ಯ ರೂಪಕ ಏರ್ಪಡಿಸಲಾಗಿದೆ. 250 ಯೋಗ ಪಟುಗಳು ಭಾಗವಹಿಸಲಿದ್ದಾರೆ.  8 ನಿಮಿಷಗಳ ವಿವಿಧ ಆಸನಗಳೊಂದಿಗೆ ನೃತ್ಯ ನೀಡಲಾಗುತ್ತದೆ. ಇದರ ಪೂರ್ವಭಾವಿ ಪ್ರದರ್ಶನವನ್ನು ಅ.7ರಂದು ಅರಮನೆ ಆವರಣದಲ್ಲಿ ನೀಡಲಾಗುವುದು’ ಎಂದು ವಿವರಿಸಿದರು.