ಮೊಟ್ಟೆ ದರ, ಸಾದಿಲ್ವಾರು ಹೆಚ್ಚಿಳಕ್ಕೆ ಮನವಿ

ಲಿಂಗಸುಗೂರು: ಪ್ರಧಾನಮಂತ್ರಿ ಪೋಷಣ ಅಭಿಯಾನದಡಿ ನೀಡುವ ಮೊಟ್ಟೆ ಸಾದಿಲ್ವಾರು ಹಣ ಹೆಚ್ಚಿಸಲು ರಾಜ್ಯ ಸರ್ಕಾರಿ ಪ್ರಾಥಮಿಕ ಶಾಲಾ ಪದವೀಧರ ಮುಖ್ಯ ಶಿಕ್ಷಕರ ಸಂಘ ಒತ್ತಾಯಿಸಿದೆ.

ಗುರುವಾರ ಅಕ್ಷರ ದಾಸೋಹ ಅಧಿಕಾರಿ ಅಮಲರಾಜ್ ಮಾರ್ಟಿನ್ ಅವರಿಗೆ ಮನವಿ ಸಲ್ಲಿಸಿ, ‘ಸದ್ಯ ಒಂದು ಮೊಟ್ಟೆಗೆ ₹6 ನೀಡಲಾಗುತ್ತಿದೆ. ಮಾರುಕಟ್ಟೆ ದರ ₹6.50ಕ್ಕೆ ಏರಿಕೆ ಆಗಿದ್ದು ಬಿಸಿಯೂಟ ಅಡುಗೆದಾರರ ಸಾದಿಲ್ವಾರು ಒಟ್ಟು ₹7 ಆಗುತ್ತದೆ’ ಎಂದು ಗಮನ ಸೆಳೆದರು.

‘ಮೊಟ್ಟೆ ದರ ಮತ್ತು ಸಾದಿಲ್ವಾರು ಹಣ ಮಾರುಕಟ್ಟೆ ದರ ಆಧರಿಸಿ ಹೆಚ್ಚಿಸಬೇಕು. ಮೊಟ್ಟೆ ಖರೀದಿಯಿಂದ ಮುಖ್ಯ ಶಿಕ್ಷಕರನ್ನು ಮುಕ್ತಿಗೊಳಿಸಬೇಕು. ಅಜೀಂ ಪ್ರೇಮಜಿ ಫೌಂಡೇಷನ್ ಅನುದಾನ ಜಿ.ಎಸ್.ಟಿ ವಿನಾಯ್ತಿ ನೀಡಬೇಕು. ಇಲಾಖೆ ಮೊಟ್ಟೆ ಪೂರೈಸಲು ಕ್ರಮ ಕೈಗೊಳ್ಳಬೇಕು’ ಎಂದು ಆಗ್ರಹಿಸಿದರು.

ಅಧ್ಯಕ್ಷ ಅಮರಪ್ಪ ಸಾಲಿ, ಸದಸ್ಯರಾದ ಶಿವಶಂಕರ ಪಾಟೀಲ, ನಾಗೇಶ, ಹುಲಗಪ್ಪ, ಶೇಖಫರಿಯಾನ್, ಶೆಟ್ಟೆಪ್ಪ, ಲಕ್ಕನಗೌಡ ಲೆಕ್ಕಿಹಾಳ, ಮಲ್ಲಪ್ಪ ನಗಾರಿ, ಸಂಗಯ್ಯ, ಕಾಶಿಬಾಯಿ, ಶರಣಮ್ಮ, ಶೋಭಾ ಪಾಟೀಲ, ರುಕ್ಮುದ್ದೀನ್, ಶರಣಬಸವ ಪಾಲ್ಗೊಂಡಿದ್ದರು.