ಮಸ್ಕಿ: ನಗರೋತ್ಥಾನ ಕಾಮಗಾರಿಗಳು ನೆನೆಗುದಿಗೆ

ಮಸ್ಕಿ: ಕಾಮಗಾರಿಯ ಮೂರನೇ ಗುಣಮಟ್ಟ ತಪಾಸಣೆ (ಥರ್ಡ್ ಪಾರ್ಟಿ) ವರದಿಗೆ ಸರ್ಕಾರ ನಿಗದಿಪಡಿಸಿದ ತಂಡ ಬಾರದ ಕಾರಣ ಪುರಸಭೆ ಹಾಗೂ ಪಟ್ಟಣ ಪಂಚಾಯಿತಿಯ ವಿವಿಧೆಡೆ ನಗರೋತ್ಥಾನ ಯೋಜನೆಯಲ್ಲಿ ಕೈಗೊಂಡಿರುವ ಕೋಟ್ಯಾಂತರ ರೂಪಾಯಿಗಳ ಕಾಮಗಾರಿಗಳು ನನೆಗುದಿಗೆ ಬಿದ್ದಿದ್ದು ಗುತ್ತಿಗೆದಾರರು ಪರದಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಸ್ಥಳೀಯ ಪುರಸಭೆ ಹಾಗೂ ತಾಲ್ಲೂಕಿನ ಬಳಗಾನೂರು ಪಟ್ಟಣ ಪಂಚಾಯಿತಿ ವ್ಯಾಪ್ತಿಯಲ್ಲಿ ಲೋಕೋಪಯೋಗಿ ಇಲಾಖೆ ಮೂಲಕ ವಿವಿಧ ಕಾಮಗಾರಿಗಳನ್ನು ಅನುಷ್ಠಾನಗೊಳಿಸಲಾಗಿತ್ತು. 2022-23 ಸಾಲಿನಲ್ಲಿ ನಗರೋತ್ಥಾನ ಇಲಾಖೆಯಿಂದ ಕಳೆದ ಒಂದು ವರ್ಷದಿಂದ ನಡೆಯುತ್ತಿರುವ ಕಟ್ಟಡ, ರಸ್ತೆ, ಚರಂಡಿ ಸೇರಿದಂತೆ ವಿವಿಧ ಕಾಮಗಾರಿಗಳು ಮೂರನೇ ಗುಣಮಟ್ಟ ತಪಾಸಣೆ ತಂಡದ ಏಜನ್ಸಿ ಪಡೆದವರು ತಪಾಸಣೆಗೆ ಬಾರದ ಕಾರಣ ನೆನೆಗುದಿಗೆ ಬಿದ್ದಿವೆ.

ವರ್ಷದಿಂದ ಪಾವತಿಯಾಗದ ಬಾಕಿ ಹಣ: ನಗರೋತ್ಥಾನ ಯೋಜನೆ ಅಡಿಯಲ್ಲಿ ಕೈಗೊಂಡಿರುವ ಕಾಮಗಾರಿಗಳ ಗುಣಮಟ್ಟದ ಮೂರನೇ ಪರಿಶೀಲನಾ ವರದಿಗೆ ಸರ್ಕಾರದಿಂದ ನಿಯೋಜನೆಗೊಂಡ ಖಾಸಗಿ ಏಜನ್ಸಿಗೆ ಕಳೆದ ಒಂದು ವರ್ಷದಿಂದ ಸರ್ಕಾರ ಹಣ ಪಾವತಿ ಮಾಡಿಲ್ಲ. ಇದರಿಂದ ನಾವು ಯಾವುದೇ ಗುಣಮಟ್ಟದ ತಪಾಸಣೆ ಮಾಡುವುದಿಲ್ಲ ಎಂದು ಖಾಸಗಿ ಏಜನ್ಸಿಯೊಂದು ಹೇಳಿದೆ. ಇದರಿಂದ ವರ್ಷದಿಂದ ಆರಂಭಗೊಂಡ ಕಾಮಗಾರಿಗಳು ವೇಗ ಪಡೆಯದೆ ನೆನೆಗುದಿಗೆ ಬಿದ್ದಿದ್ದು ಗುತ್ತಿಗೆದಾರರನ್ನು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿಸಿದೆ.

ಮೂರನೇ ತಂಡ ತಪಾಸಣೆ ವರದಿ ಇಲ್ಲದೇ ಗುತ್ತಿಗೆದಾರರು ಏನು ಮಾಡುವಂತಿಲ್ಲ ಎಂದು ಲೋಕೋಪಯೋಗಿ ಇಲಾಖೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಆದರೆ, ಸರ್ಕಾರದಿಂದ ನಿಯೋಜನೆಗೊಂಡ ಖಾಸಗಿ ಏಜೆನ್ಸಿಯವರು ಗುಣಮಟ್ಟ ತಪಾಸಣೆಗೆ ಮುಂದೆ ಬರುತ್ತಿಲ್ಲ. ಸರ್ಕಾರ ಪರ್ಯಾಯ ವ್ಯವಸ್ಥೆ ಮಾಡಿ ಗುಣಮಟ್ಟ ತಪಾಸಣೆಗೆ ಮುಂದಾಗಬೇಕು ಎಂದು ಗುತ್ತಿಗೆದಾರರು ಜಿಲ್ಲಾಡಳಿತಕ್ಕೆ ಆಗ್ರಹಿಸಿದ್ದಾರೆ.