ಕವಿತಾಳ | ಹದಗೆಟ್ಟ ಶಾಲೆ ರಸ್ತೆ: ವಿದ್ಯಾರ್ಥಿಗಳ ಪರದಾಟ

ಕವಿತಾಳ: ಸತತ ಮಳೆಯಿಂದ ಸಮೀಪದ ಅಮೀನಗಡ ಗ್ರಾಮದ ಸರ್ಕಾರಿ ಪ್ರೌಢಶಾಲೆ ಸಂಪರ್ಕಿಸುವ ರಸ್ತೆ ಹದಗೆಟ್ಟಿದೆ. ಕೆಸರು ಗದ್ದೆಯಂತಾದ ರಸ್ತೆಯಲ್ಲಿ ಶಾಲೆಗೆ ತೆರಳಲು ವಿದ್ಯಾರ್ಥಿಗಳು ಪರದಾಡಿದ ದೃಶ್ಯ ಗುರುವಾರ ಕಂಡು ಬಂತು.

ಮುಖ್ಯ ರಸ್ತೆಯಿಂದ ಶಾಲೆ ಸಂಪರ್ಕಿಸುವ ಮಣ್ಣಿನ ರಸ್ತೆಯಲ್ಲಿ ಮಳೆ ನೀರು ನಿಂತು ಹಾಳಾಗಿದೆ. ಶಾಲೆಗೆ ತೆರಳುವಾಗ ಕೆಲವು ವಿದ್ಯಾರ್ಥಿಗಳು ಕಾಲು ಜಾರಿ ಬಿದ್ದಿದ್ದಾರೆ. ಮಕ್ಕಳ ಪರದಾಟ ಗಮನಿಸಿದ ಗ್ರಾಮದ ಕೆಲವು ಯುವಕರು ತಮ್ಮ ಸ್ವಂತ ಖರ್ಚಿನಲ್ಲಿ ಮೂರು ಟ್ರ್ಯಾಕ್ಟರ್‌ ಮರಂ ಹಾಕಿಸಿ ತಗ್ಗುಗಳನ್ನು ತಾತ್ಕಾಲಿಕವಾಗಿ ಮುಚ್ಚಿದ್ದಾರೆ.

’ರಸ್ತೆಗೆ ಮರಂ ಹಾಕಿಸುವಂತೆ ಅಭಿವೃದ್ದಿ ಅಧಿಕಾರಿಗಳಿಗೆ ಮನವಿ ಮಾಡಿದರೂ ಸ್ಪಂದಿಸಲಿಲ್ಲ. ಹೀಗಾಗಿ ಸ್ವಂತ ಖರ್ಚಿನಲ್ಲಿ ಮರಂ ಹಾಕಿಸಿದ್ದೇವೆʼ ಎಂದು ಮಂಜೂರ್‌ ಪಾಶಾ, ಅಯ್ಯಣ್ಣ, ಹುಚ್ಚಬುಡ್ಡ ತಳವಾರ ಮತ್ತು ಆದೇಶ ತಿಳಿಸಿದರು.