ರಾಯಚೂರು: ಈದ್ ಉಲ್ ಅದಾ ಆಚರಣೆ

ರಾಯಚೂರು: ಜಿಲ್ಲೆಯ ವಿವಿಧೆಡೆ ಸೋಮವಾರ ಮುಸ್ಲಿಮರು ಈದ್ ಉಲ್ ಅದಾ ಹಬ್ಬವನ್ನು ಶ್ರದ್ಧಾಭಕ್ತಿಯಿಂದ ಆಚರಿಸಿದರು.

ಮಸೀದಿ ಹಾಗೂ ಈದ್ಗಾ ಮೈದಾನಗಳಲ್ಲಿ ಮುಸ್ಲಿಮರು ಸಾಮೂಹಿಕ ಪ್ರಾರ್ಥನೆ ಸಲ್ಲಿಸಿದರು.

ಮಕ್ಕಳು ಆದಿಯಾಗಿ ಹೊಸ ಬಟ್ಟೆ ಧರಿಸಿ 'ಲಬ್ಬೈಕ್ ಅಲ್ಲುಹುಮ್ಮ,ಲಬ್ಬೈಕ್ ' ಎನ್ನುವ ಮಂತ್ರ ಪಠಿಸುತ್ತ ಸಾಮೂಹಿಕ ಪ್ರಾರ್ಥನಾ ಕಾರ್ಯಕ್ರಮದಲ್ಲಿ ಪಾಲ್ಗೊಂಡರು. ನಂತರ ಪರಸ್ಪರ ಆಲಿಂಗನ ಮಾಡಿ ಈದ್ ಮುಬಾರಕ್ ಎನ್ನುತ್ತ ಶುಭಾಶಯ ವಿನಿಮಯ ಮಾಡಿಕೊಂಡರು.

ಭಾನುವಾರ ಮಧ್ಯಾಹ್ನ, ರಾತ್ರಿ ಕೆಲಕಾಲ ಮಳೆ ಸುರಿದ ಕಾರಣ ರಾಯಚೂರಿನ ಅರಬ್ ಮೊಹಲ್ಲಾ ಬಳಿಯ ಈದ್ಗಾ ಮೈದಾನ ಹಾಗೂ ರಸ್ತೆ ಬದಿಯಲ್ಲಿ ನೀರು ನಿಂತಿತ್ತು, ನೀರಿನ ಪಕ್ಕದಲ್ಲಿಯೇ ಜಮಖಾನಾ ಹಾಸಿ ನಮಾಜ್ ಮಾಡಿ ಭಕ್ತಿಭಾವ ಮೆರೆದರು.

ಪ್ರಾರ್ಥನೆಯ ನಂತರ ಕೆಲವರು ಹಿರಿಯರ ಸಮಾಧಿ ಇರುವ ಸ್ಥಳಕ್ಕೆ ತೆರಳಿ ಪುಷ್ಪ ಸಮರ್ಪಣೆ ಮಾಡಿ ಅವರನ್ನು ಸ್ಮರಿಸಿದರು