ಕವಿತಾಳ | ಬಸಾಪುರಕ್ಕೆ ಕಲುಷಿತ ನೀರು ಪೂರೈಕೆ; ಗ್ರಾಮಸ್ಥರಲ್ಲಿ ಆತಂಕ

ಕವಿತಾಳ: ಸಮೀಪದ ಬಸಾಪುರ ಗ್ರಾಮದ ಕುಡಿಯುವ ನೀರಿನ ಕೆರೆಯಿಂದ ಪೂರೈಸುವ ನೀರು ಕಲುಷಿತಗೊಂಡಿದ್ದು, ಗ್ರಾಮಸ್ಥರು ರೋಗ ಹರಡುವ ಆತಂಕ ವ್ಯಕ್ತಪಡಿಸಿದ್ದಾರೆ.

ಮಸ್ಕಿ ತಾಲ್ಲೂಕಿನ ವಟಗಲ್‌ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬಸಾಪುರ ಕೆರೆಯಿಂದ ಗೂಗೆಬಾಳ, ತೋರಣದಿನ್ನಿ, ತಾಯಮ್ಮ ಕ್ಯಾಂಪ್‌, ಗಾಳಿದುರ್ಗಮ್ಮ ಕ್ಯಾಂಪ್‌ ಮತ್ತು ತೋರಣದಿನ್ನಿ ಕ್ರಾಸ್‌ಗೆ ನೀರು ಪೂರೈಸಲಾಗುತ್ತಿದೆ. ಕೆರೆಯಿಂದ ನೀರು ಪೂರೈಸುವ ಮುಖ್ಯ ಪೈಪ್‌ ಹಳ್ಳದಲ್ಲಿ ಹಾದು ಹೋಗಿದ್ದು, ಅಲ್ಲಲ್ಲಿ ಪೈಪ್‌ ಹೊಡೆದ ಪರಿಣಾಮ ಕಲುಷಿತ ನೀರು ಪೂರೈಕೆಯಾಗುತ್ತಿದೆ ಎನ್ನುವುದು ಗ್ರಾಮಸ್ಥರ ಆರೋಪ.

‘ಪೈಪ್‌ ಹೊಡೆದ ಜಾಗದಲ್ಲಿ ನೀರು ನಿಂತು ಕೆಸರು ಉಂಟಾಗಿದೆ. ಅದರಲ್ಲಿ ಎಮ್ಮೆಗಳು ಬಿದ್ದು ಉರುಳಾಡುತ್ತವೆ. ಗುಂಡಿಯಲ್ಲಿ ನಿಂತ ನೀರನ್ನು ಕ್ರಿಮಿನಾಶಕ ಸಿಂಪಡಿಸಲು ಬಳಸುವ ರೈತರು ಅದರಲ್ಲಿಯೇ ಕ್ರಿಮಿನಾಶಕ ಡಬ್ಬಾಗಳನ್ನು ತೊಳೆಯುತ್ತಿದ್ದಾರೆ. ಈ ರೀತಿ ಗಲೀಜು ಒಳಗೊಂಡ ನೀರನ್ನು ಗ್ರಾಮಗಳಿಗೆ ಪೂರೈಸಲಾಗುತ್ತಿದೆ. ಮಣ್ಣು, ಕಸ, ಕಡ್ಡಿ ಸೇರಿದಂತೆ ಗಬ್ಬು ವಾಸನೆ ಬೀರುವ ಗಲೀಜು ನೀರು ಬಳಕೆಗೂ ಯೋಗ್ಯವಾಗಿಲ್ಲ’ ಎಂದು ಗ್ರಾಮದ ರಮೇಶ, ಬಸವರಾಜ ಪೊಲೀಸ್‌ ಪಾಟೀಲ ಮತ್ತು ಅರಳಪ್ಪ ನಾಯಕ ಹೇಳಿದರು.

ಪೈಪ್‌ ದುರಸ್ತಿ ಬಗ್ಗೆ ಹಲವು ಬಾರಿ ಮನವಿ ಮಾಡಿದ್ದರೂ ಅಧಿಕಾರಿಗಳು ಕ್ರಮ ಕೈಗೊಂಡಿಲ್ಲ ಎಂದು ಆರೋಪಿಸಿ ಗ್ರಾಮದ ವ್ಯಕ್ತಿಯೊಬ್ಬರು ಆಡಿಯೋ ಸಂದೇಶ ಮಾಡಿ ಜಾಲ ತಾಣಗಳಲ್ಲಿ ಹರಿಬಿಟ್ಟಿದ್ದಾರೆ.