ಕನಕಪುರ | ಮದುವೆಗೆ ಹೊರಟಿದ್ದ ಬಸ್ ಪಲ್ಟಿ: 25 ಮಂದಿಗೆ ಗಾಯ

ಕನಕಪುರ: ಮದುವೆಗೆ ಹೊರಟ್ಟಿದ ಬಸ್ ಪಲ್ಟಿ ಹೊಡೆದು 25ಕ್ಕೂ ಹೆಚ್ಚಿನ ಮಂದಿ ಪ್ರಯಾಣಿಕರು ಗಾಯಗೊಂಡಿರುವ ಘಟನೆ ಭಾನುವಾರ ಸಂಗಮ ಬಳಿ ನಡೆದಿದೆ.

ಸಂಗಮ ಬಳಿ ಎರಡನೇ ತಿರುವಿನ ಕಾರಚ್ಚಲು ದಿಬ್ಬದ ಮುಂಭಾಗದಲ್ಲಿ ಬಸ್‌ ತಿರುವು ಪಡೆಯುತ್ತಿದ್ದಾಗ ಚಾಲಕನ ನಿಯಂತ್ರಣ ತಪ್ಪಿದೆ.

ಅಪಘಾತದಲ್ಲಿ ತಗಡೆಗೌಡನದೊಡ್ಡಿ ಗ್ರಾಮದ 25 ಮಂದಿ ಗಾಯಗೊಂಡಿದ್ದಾರೆ. ಅದರಲ್ಲಿ ಶಿವಿರಮ್ಮ, ಅಶೋಕಮ್ಮ, ಕಮಲಮ್ಮ, ರತ್ನಮ್ಮ, ಸ್ವಾಮಣ್ಣ, ಮಾದಶೆಟ್ಟಿ, ಶಿವಣ್ಣ, ಕುಮಾರ್, ಪುಷ್ಪ, ಬಿಂದುಶ್ರೀ ಸೇರಿದಂತೆ 10ಕ್ಕೂ ಹೆಚ್ಚು ಮಂದಿಗೆ ಕೈ, ಕಾಲು, ಸೊಂಟ, ಬೆನ್ನು ಮೂಳೆ ಮುರಿದಿದೆ. ಉಳಿದವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.

ಗಾಯಾಳುಗಳನ್ನು ದೊಡ್ಡಆಲಳ್ಳಿ, ಕನಕಪುರ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಪ್ರಾಥಮಿಕ ಚಿಕಿತ್ಸೆ ನೀಡಿದ ನಂತರ ದಯಾನಂದ ಸಾಗರ್, ಬೆಂಗಳೂರಿನ ಸೇಂಟ್‌ ಜಾನ್ ಹಾಗೂ ನಿಮ್ಹಾನ್ಸ್ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.