ಕಾನಕಾನಹಳ್ಳಿ ಪಾರ್ಕ್‌ನಲ್ಲಿ ಅವ್ಯವಸ್ಥೆ: ಬಳಕೆ ಬಾರದ ಜಿಮ್‌ ಪರಿಕರ

ಕನಕಪುರ: ನಗರದ ಜನತೆಯ ಆರೋಗ್ಯದ ದೃಷ್ಟಿಯಿಂದ ನಾರಾಯಣಪ್ಪನ ಕೆರೆಯ ಕಾನಕಾನಹಳ್ಳಿ ಪಾರ್ಕ್‌ನಲ್ಲಿ ನಿರ್ಮಿಸಿರುವ ತೆರೆದ ಜಿಮ್ ಮತ್ತು ಆಟದ ಪರಿಕರಗಳು ಮುರಿದು ಹೋಗಿ, ಬಳಕೆಗೆ ಬರುತ್ತಿಲ್ಲ.

2017ರಲ್ಲಿ ನಾರಾಯಣಪ್ಪನ ಕೆರೆಯನ್ನು ಕಾನಕಾನಹಳ್ಳಿ ಉದ್ಯಾನವಾಗಿ ಅಭಿವೃದ್ಧಿಪಡಿಸಿ, ತೆರೆದ ಜಿಮ್‌ ನಿರ್ಮಾಣ ಮಾಡಲಾಗಿತ್ತು. ಮಹಿಳೆಯರು, ಪುರುಷರು ಮತ್ತು ಮಕ್ಕಳಿಗೆ ಪ್ರತ್ಯೇಕವಾಗಿ ವ್ಯಾಯಾಮ ಪರಿಕರ ಅಳವಡಿಸಲಾಗಿತ್ತು.

ಬೆಳಗ್ಗೆ ಮತ್ತು ಸಂಜೆ ಎರಡು ಸಮಯದಲ್ಲಿ ಉದ್ಯಾನವನದಲ್ಲಿ ವಾಯು ವಿಹಾರದ ಜೊತೆಗೆ ಜನ ವ್ಯಾಯಾಮ ಮಾಡುತ್ತಿದ್ದರು.

ಆದರೆ ನಿರ್ವಹಣೆ ಕೊರತೆಯಿಂದ ವ್ಯಾಯಾಮ ಪರಿಕರಗಳು ಬಿಸಿಲು ಮತ್ತು ಮಳೆಯಿಂದ ತುಕ್ಕು ಹಿಡಿದಿವೆ. ಕೆಲವು ಪರಿಕರಗಳು ಮರಿದಿದೆ. ಇದರಿಂದ ಕಳೆದೆರಡು ವರ್ಷಗಳಿಂದ ಜಿಮ್ ಉಪಕರಣ ಬಾರದಾಗಿದೆ.

ನಗರ ಸಭೆಯು ಉದ್ಯಾನ ನಿರ್ವಹಣೆಯನ್ನು ಗುತ್ತಿಗೆದಾರರಿಗೆ ವಹಿಸಿದೆ. ಉದ್ಯಾನವು ಸುಂದರವಾಗಿದೆ. ಆದರೆ ವ್ಯಾಯಾಮ ಪರಿಕರಗಳು ಹಾಳಾಗಿರುವುದು ಜನರು ವ್ಯಾಯಾಮ ಮಾಡಲು ಅಡ್ಡಿ ಉಂಟು ಮಾಡಿವೆ.

ಜಿಮ್‌ ಉಪಕರಣ ಮತ್ತು ಮಕ್ಕಳು ಆಡುವ ಉಪಕರಣಗಳನ್ನು ದುರಸ್ತಿಗೊಳಿಸಬೇಕೆಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.