ಸ್ಥಾಯಿ ಸಮಿತಿಗೆ 11 ಸದಸ್ಯರ ಆಯ್ಕೆ

ರಾಮನಗರ: ಆಡಳಿತಾರೂಢ ಕಾಂಗ್ರೆಸ್‌ನ 10 ಸದಸ್ಯರು ಸೇರಿದಂತೆ ಒಟ್ಟು 11 ಮಂದಿ ನಗರಸಭೆಯ ಸ್ಥಾಯಿ ಸಮಿತಿಗೆ ಸೋಮವಾರ ಆಯ್ಕೆಯಾದರು. ನಗರಸಭೆ ಅಧ್ಯಕ್ಷೆ ಬಿ.ಕೆ. ಪವಿತ್ರ ಅಧ್ಯಕ್ಷೆ ನೇತೃತ್ವದಲ್ಲಿ ಬೆಳಿಗ್ಗೆ ನಡೆದ ವಿಶೇಷ ಸಭೆಯಲ್ಲಿ ಆಯ್ಕೆ ಪ್ರಕ್ರಿಯೆ ಜರುಗಿತು.

ಬೆಳಿಗ್ಗೆ ನಡೆದ ಸಭೆಗೆ ಜೆಡಿಎಸ್‌ ಸದಸ್ಯರ ಪೈಕಿ ವಾರ್ಡ್ 2ರ ಜೆಡಿಎಸ್‌ ಸದಸ್ಯ ಶಿವಸ್ವಾಮಿ ಹೊರತುಪಡಿಸಿದರೆ, ಉಳಿದವರು ಗೈರಾಗಿದ್ದರು.

ಕಾಂಗ್ರೆಸ್‌ನ ಹಿರಿಯ ಸದಸ್ಯ ಕೆ. ಶೇಷಾದ್ರಿ (ಶಶಿ) ಅವರು, ಸ್ಥಾಯಿ ಸಮಿತಿ ಸದಸ್ಯರಾಗಿ ತಮ್ಮ ಪಕ್ಷದ 10 ಸದಸ್ಯರ ಜೊತೆಗೆ, ಶಿವಸ್ವಾಮಿ ಅವರು ಒಳಗೊಂಡ ಹೆಸರನ್ನು ಸೂಚಿಸಿದರು. ಎಲ್ಲರೂ ಒಕ್ಕೊರಲಿನಿಂದ ಅನುಮೋದಿಸಿದರು.

ಕ್ರಿಯಾಯೋಜನೆಗೆ ಒಪ್ಪಿಗೆ:  ರಾಜ್ಯ ಹಣಕಾಸು ಆಯೋಗದ (ಎಸ್‌ಎಫ್‌ಸಿ) ಮುಕ್ತ ನಿಧಿಯಡಿ ಪರಿಶಿಷ್ಟ ಜಾತಿಯವರ ಕಲ್ಯಾಣಕ್ಕೆ ₹34 ಲಕ್ಷ ವೆಚ್ಚದಲ್ಲಿ ಮತ್ತು ಪರಿಶಿಷ್ಟ ಪಂಗಡದವರಿಗೆ ₹14 ಲಕ್ಷ ವೆಚ್ಚದಲ್ಲಿ ಕೈಗೊಂಡಿರುವ ಕಲ್ಯಾಣ ಕಾರ್ಯಕ್ರಮಗಳ ಕ್ರಿಯಾಯೋಜನೆಯನ್ನ ಅಧಿಕಾರಿಗಳು ಸಭೆಯ ಗಮನಕ್ಕೆ ತಂದರು.

ನಗರಸಭೆಯ ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡ ಉಪ ಯೋಜನೆಯಡಿ (ಎಸ್‌ಸಿಪಿ–ಟಿಎಸ್‌ಪಿ), ಶೇ 24.10 ಅನುದಾನದ ₹30 ಲಕ್ಷ ಅನುದಾನದಲ್ಲಿ ಎಸ್‌ಸಿ ಮತ್ತು ಎಸ್‌ಟಿಗಳ ಕಲ್ಯಾಣ ಕಾರ್ಯಕ್ರಮಗಳಿಗೆ ಕೈಗೊಂಡಿರುವ ಕ್ರಿಯಾಯೋಜನೆಯ ವಿವರವನ್ನು ಅಧಿಕಾರಿಗಳು ಸಭೆಯಲ್ಲಿ ಮಂಡಿಸಿದರು. ಸದಸ್ಯರು ಅದಕ್ಕೆ ಒಪ್ಪಿಗೆ ನೀಡಿದರು.

ಪೌರ ಸನ್ಮಾನ, ಇಂದೋರ್ ಪ್ರವಾಸ: ‘ರಾಮನಗರ ಕ್ಷೇತ್ರದ ನೂತನ ಶಾಸಕರಾಗಿ ಆಯ್ಕೆಯಾಗಿರುವ ಇಕ್ಬಾಲ್ ಹುಸೇನ್ ಅವರಿಗೆ ನಗರಸಭೆ ವತಿಯಿಂದ ಪೌರ ಸನ್ಮಾನ ಹಮ್ಮಿಕೊಳ್ಳಬೇಕು. ಯಾವ ರೀತಿ ಮಾಡಬೇಕು ಮತ್ತು ಯಾವಾಗ ಕಾರ್ಯಕ್ರಮ ಆಯೋಜಿಸಬೇಕು ಎಂಬುದರ ಬಗ್ಗೆ ನಿರ್ಧರಿಸಿ. ಚಾಮುಂಡೇಶ್ವರಿ ಕರಗಕ್ಕೆ ಅಗತ್ಯ ಸಿದ್ಧತೆ ಮಾಡಿಕೊಳ್ಳಬೇಕು’ ಎಂದು ಶೇಷಾದ್ರಿ ಸಲಹೆ ನೀಡಿದರು.

‘ಸ್ವಚ್ಛತೆ ವಿಷಯದಲ್ಲಿ ದೇಶಕ್ಕೆ ಮಾದರಿಯಾಗಿರುವ ಮಧ್ಯಪ್ರದೇಶದ ಇಂದೋರ್‌ ನಗರಕ್ಕೆ ನಗರಸಭೆ ಸದಸ್ಯರನ್ನು ಅಧ್ಯಯನ ಪ್ರವಾಸಕ್ಕೆ ಕರೆದೊಯ್ಯಬೇಕು. ಈ ಬಗ್ಗೆಯೂ ತೀರ್ಮಾನಿಸಿ’ ಎಂದು ಸಭೆಯ ಗಮನ ಸೆಳೆದರು.

ಸ್ವಾಗತ ಕೋರಿದ ಪೌರಾಯುಕ್ತ ಎಲ್. ನಾಗೇಶ್ ಅವರು, ಅಧ್ಯಕ್ಷೆ ಬಿ.ಕೆ. ಪವಿತ್ರ ಅವರ ಹೆಸರನ್ನು ಸುಮಿತ್ರ ಎಂದು, ವಾರ್ಡ್‌ಗಳ ಒಟ್ಟು ಸಂಖ್ಯೆಯನ್ನು 31ರ ಬದಲು 29 ಎಂದು ಹೇಳಿ ಮುಜಗರಕ್ಕೀಡಾದರು.

ಸಭೆಯಲ್ಲಿ ಉಪಾಧ್ಯಕ್ಷ ಸೋಮಶೇಖರ್, ಅಧೀಕ್ಷಕ ಶಿವಣ್ಣ, ವ್ಯವಸ್ಥಾಪಕಿ ರೇಖಾ, ಎಇಇ ರಂಗರಾಜು ಹಾಗೂ ಸದಸ್ಯರು ಇದ್ದರು.

ಅಂಕಿ ಅಂಶ... 31 ನಗರಸಭೆ ಸದಸ್ಯರ ಸಂಖ್ಯೆ 20 ಕಾಂಗ್ರೆಸ್ ಸದಸ್ಯರು 11 ಜೆಡಿಎಸ್ ಸದಸ್ಯರು