ಕೆಂಚನಕುಪ್ಪಗೆ ದುರ್ನಾತದ ಸ್ವಾಗತ: ನಿರ್ವಹಣೆ ಕಾಣದ ಕಾಲುವೆ, ವಿಲೇವಾರಿಯಾಗದ ಕಸ

ಬಿಡದಿ: ಬಿಡದಿಯ ವಾರ್ಡ್‌ ನಂ.4ರ ಕೆಂಚನಕುಪ್ಪೆ ಗ್ರಾಮಕ್ಕೆ ವಿಲೇವಾರಿಯಾಗದ ತ್ಯಾಜ್ಯ, ನಿರ್ವಹಣೆ ಕಾಣದ ಕಾಲುವೆ ಹಾಗೂ ದುರ್ನಾತ ಸ್ವಾಗತ ಕೋರುತ್ತದೆ.

ಗ್ರಾಮದಲ್ಲಿ ಹರಿಯುವ ನೆಲ್ಲಿಗುಡ್ಡ ಕೆರೆಯ ಕಾಲುವೆಗೆ ಚರಂಡಿ ಕೊಳಚೆ ನೀರು ಸೇರುತ್ತದೆ. ಮತ್ತೊಂದೆಡೆ ಕೆರೆ ಏರಿ ಮೇಲೆ ಕಸ ವಿಲೇವಾರಿಯಾಗದೆ ಗಬ್ಬು ನಾರುತ್ತಿದೆ.

ನೆಲ್ಲಿಗುಡ್ಡ ಕೆರೆಯ ಕಾಲುವೆಯು ಸುಮಾರು 6 ಕಿಲೋಮೀಟರ್ ಉದ್ದವಿದೆ. ಇಲ್ಲಿನ ತಮ್ಮಣ್ಣನ‌ದೊಡ್ಡಿ, ಕೆಂಚನಕುಪ್ಪೆ, ಆಲಸಿನ ಮರದ ದೊಡ್ಡಿ, ಗೊಲ್ಲಹಳ್ಳಿ, ಅಂಗರಹಳ್ಳಿ ಸೇರಿದಂತೆ ಹಲವು ಗ್ರಾಮಗಳ ಹೊಲ‌, ಗದ್ದೆಗಳಿಗೆ ಇದೇ ಕಾಲುವೆಯಿಂದ ನೀರು ಹರಿಯುತ್ತದೆ.

ಕೆಂಚನಕುಪ್ಪೆ ಗ್ರಾಮದಲ್ಲಿ ಸುಮಾರು ಒಂದು ಕಿಲೋಮೀಟರ್ ಉದ್ದದ ಕಾಲುವೆಯಲ್ಲಿ ಗಿಡ ಗಂಟಿ ಬೆಳೆದು ನಿಂತಿದೆ. ನೀರು ಸರಾಗವಾಗಿ ಹರಿಯದೆ ಕಲುಷಿತಗೊಂಡಿದ್ದು, ಜಾನುವಾರುಗಳು ನೀರು ಕುಡಿಯಲು ಆಗುತ್ತಿಲ್ಲ.

ನಿರ್ವಹಣೆ  ಇಲ್ಲದೆ ಕಾಲುವೆಯಲ್ಲಿ ಗಿಡಗಳು ಬೆಳೆದು ನಿಂತಿರುವುದರಿಂದ ಸೊಳ್ಳೆ ಹಾಗೂ ವಿಷಜಂತುಗಳ ಆವಾಸ ಸ್ಥಾನವಾಗಿ ಮಾರ್ಪಟ್ಟಿದೆ. ಜನರಲ್ಲಿ ಸಾಂಕ್ರಾಮಿಕ ಕಾಯಿಲೆ ಹರಡುವ ಭೀತಿ ಬಂದಿದೆ.

ನಿವಾಸಿಗಳಿಗೆ ಅರಿವಿನ ಕೊರತೆ: ಸ್ಥಳೀಯ ನಿವಾಸಿಗಳು ಅರಿವಿನ ಕೊರತೆಯಿಂದ ಕಾಲುವೆ ಬಳಿ ಕಸ ಸುರಿಯುತ್ತಿದ್ದಾರೆ. ಇದರಿಂದ ಅವರೇ ತೊಂದರೆ ಅನುಭವಿಸುತ್ತಿದ್ದಾರೆ. ಈ ಬಗ್ಗೆ ಪುರಸಭೆ ಕಾಲುವೆ ಬಳಿ ಕಸ ಸುರಿಯದಂತೆ ಜನರಿಗೆ ಅರಿವು ಮೂಡಿಸಬೇಕು. ಅಲ್ಲದೆ ಕಾಲಕಾಲಕ್ಕೆ ಪುರಸಭೆಯಿಂದ ಸ್ವಚ್ಛಗೊಳಿಸಬೇಕೆಂದು ಪ್ರಜ್ಞಾವಂತರು ಒತ್ತಾಯಿಸಿದ್ದಾರೆ.