ರಾತ್ರಿ ಸುರಿದ ಭಾರಿ ಮಳೆಗೆ ಜನರ ಪರದಾಟ

ಮಾಗಡಿ: ಕಳೆದ ಎರಡು ದಿನಗಳಿಂದ ಸುರಿಯುತ್ತಿರುವ ಭಾರಿ ಮಳೆಗೆ ತಾಲ್ಲೂಕಿನಲ್ಲಿ ಸಾಕಷ್ಟು ಹಾನಿವುಂಟಾಗಿದೆ. ಮನೆ, ಜಮೀನು, ತೋಟಗಳಿಗೆ ನೀರು ನುಗ್ಗಿ ಜನರು ಸಂಕಷ್ಟ ಪಡುವಂತಾಗಿದೆ.

ಭಾನುವಾರ ರಾತ್ರಿ ಸುರಿದ ಭಾರಿ ಮಳೆಗೆ ತಿಪ್ಪಗೊಂಡನಹಳ್ಳಿ ಜಲಾಶಯದಿಂದ ಹೆಚ್ಚುವರಿ ನೀರು ತೊರೆಯ ಮೂಲಕ ಬಂದ ಪರಿಣಾಮ ಚಿಕ್ಕತೊರೆ ಪಾಳ್ಯದ ಮೂರ್ತಿ ನಾಯಕ್ ಅವರ ಮನೆಗೆ ನೀರು ನುಗ್ಗಿದೆ. ರಾತ್ರಿಯಿಡೀ ಕುಟುಂಬಸ್ಥರು ಪರದಾಡಿದ್ದಾರೆ. ಏಳು ತಿಂಗಳ ಬಾಣಂತಿ ಕೂಡ ಮಗುವಿನೊಂದಿಗೆ ಆತಂಕದಲ್ಲೇ ರಾತ್ರಿ ಕಳೆದಿದ್ದಾರೆ. ಅಪಾರ ಪ್ರಮಾಣದ ವಸ್ತುಗಳು ಹಾನಿಗೆ ಒಳಗಾಗಿವೆ.

ತೋಟಕ್ಕೆ ನುಗ್ಗಿದ ನೀರು: ಹೊಸಪಾಳ್ಯ ಸಮೀಪ ತೊರೆ ಮಣ್ಣು ಕುಸಿದು ರೈತರ ಜಮೀನಿಗಳಿಗೆ ನೀರು ನುಗ್ಗಿದೆ. ಮರೂರು- ಚಿಕ್ಕಕಲ್ಯಾ ಸಂಪರ್ಕಿಸುವ ರಸ್ತೆ ಮೇಲೆ ನೀರು ಹರಿಯುತ್ತಿರುವುದರಿಂದ ವಾಹನ ಸವಾರರು ಪರದಾಡಿದರು.