ರಾಮನಗರ | ಮಾಯಗಾನಹಳ್ಳಿ ಡೇರಿಯಲ್ಲಿ ಅಕ್ರಮ: ಆರೋಪ

ರಾಮನಗರ: ‘ತಾಲ್ಲೂಕಿನ ಮಾಯಗಾನಹಳ್ಳಿ ಹಾಲು ಉತ್ಪಾದಕರ ಸಹಕಾರ ಸಂಘದ ಪದಾಧಿಕಾರಿಗಳ ಆಯ್ಕೆಗೆ ಮೂವತ್ತು ವರ್ಷಗಳಿಂದ ಚುನಾವಣೆಯನ್ನೇ ನಡೆಸಿಲ್ಲ. ತಮಗೆ ಬೇಕಾದವರನ್ನು ಅವಿರೋಧ ಆಯ್ಕೆ ಮಾಡಿಕೊಂಡು ಅಕ್ರಮ ಎಸಗಲಾಗುತ್ತಿದೆ. ಈ ಕುರಿತು ಪ್ರಶ್ನಿಸಿದವರಿಗೆ ಸಂಘದ ಅಧ್ಯಕ್ಷರೂ ಆಗಿರುವ ಬಮೂಲ್ ನಿರ್ದೇಶಕ ಪಿ. ನಾಗರಾಜ್ ಬೆದರಿಕೆ ಹಾಕುತ್ತಿದ್ದಾರೆ’ ಎಂದು ಸಂಘದ ಸದಸ್ಯ ಯೋಗೇಶ್ ಆರೋಪಿಸಿದರು.

‘ಸಂಘಕ್ಕೆ ನಾನೇ ಅಧ್ಯಕ್ಷ ಎಂದು ನಾಗರಾಜ್ ಹೇಳಿಕೊಂಡಿದ್ದಾರೆ. ಆದರೆ, ಈ ಕುರಿತು ಸಂಘದಲ್ಲಿ ಮಾಹಿತಿ ಪ್ರದರ್ಶಿಸಿಲ್ಲ. ಪದಾಧಿಕಾರಿಗಳು ಹಾಗೂ ಸಂಘದ ವಹಿವಾಟಿನ ಮಾಹಿತಿ ಕೇಳಿದರೆ, ಕೊಡಲು ನಿರಾಕರಿಸುವ ಕಾರ್ಯದರ್ಶಿ ಶಿವನಂಜಯ್ಯ ಅಸಭ್ಯವಾಗಿ ಮಾತನಾಡುತ್ತಾರೆ’ ಎಂದು ನಗರದ ಜೆಡಿಎಸ್ ಕಚೇರಿಯಲ್ಲಿ ಮಂಗಳವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ದೂರಿದರು.

‘ಸಂಘದ ವ್ಯವಹಾರಗಳು ಪಾರದರ್ಶಕವಾಗಿ ನಡೆಯುತ್ತಿಲ್ಲ. ವೈಯಕ್ತಿಕ ಅನುಕೂಲಕ್ಕಾಗಿ ಗ್ರಾಮಸ್ಥರ ವಿರೋಧ ಲೆಕ್ಕಿಸದೆ ಊರಾಚೆ ತಮಗೆ ಬೇಕಾದ ಜಾಗದಲ್ಲಿ ಸಂಘದ ಕಚೇರಿ ಕಟ್ಟಿಸಿದ್ದಾರೆ. ಸಂಘದ ಸರ್ವ ಸದಸ್ಯರ ಸಾಮಾನ್ಯ ಸಭೆಯನ್ನೇ ನಡೆಸಿಲ್ಲ. ಸಂಘದಲ್ಲಿ ಅವ್ಯವಹಾರ ನಡೆದಿಲ್ಲವಾದರೆ, ಪ್ರಶ್ನಿಸಿದವರಿಗೆ ಮತ್ತು ದಾಖಲೆ ಕೇಳಿದವರಿಗೆ ಯಾಕೆ ಬೆದರಿಕೆ ಹಾಕಬೇಕು?’ ಎಂದು ಪ್ರಶ್ನಿಸಿದರು.

ಅವರ ಮಾತಿಗೆ ದನಿಗೂಡಿಸಿದ ಮತ್ತೊಬ್ಬ ಸದಸ್ಯ ರಾಮಚಂದ್ರ, ‘ಸಂಘದಲ್ಲಿ ಅವ್ಯವಹಾರ ನಡೆದಿರುವ ಕುರಿತು ಮಾಧ್ಯವರಿಗೆ ಹೇಳಿಕೆ ನೀಡಿದ್ದಕ್ಕೆ ನನ್ನ ಮೇಲೆ ಹಲ್ಲೆ ನಡೆಸಿದರು. ಅವರಿಂದ ನಮಗೆ ಜೀವ ಬೆದರಿಕೆ ಇದೆ. ನಮಗೇನಾದರು ತೊಂದರೆಯಾದರೆ, ಅದಕ್ಕೆ ನಾಗರಾಜ್ ಅವರೇ ಹೊಣೆಯಾಗಿರುತ್ತಾರೆ’ ಎಂದು ಹೇಳಿದರು.

ವೀರೇಶ್, ಶಿವಸ್ವಾಮಿ, ರಾಜು ಎಂ.ಎಸ್, ಜಯಕುಮಾರ್, ಪಾಪಣ್ಣ, ಕೆಂಪಣ್ಣ, ಶಿವಲಿಂಗಪ್ಪ, ಕೆಂಪರಾಜು, ವಾಸು ಹಾಗೂ ಇತರರು ಇದ್ದರು.