ಹಾರೋಹಳ್ಳಿ: ಒಡೆದ ಹೆಂಚು, ಸೋರುವ ಶಾಲೆ

ಹಾರೋಹಳ್ಳಿ: ಅಕ್ಷರ ಜ್ಞಾನಕ್ಕಾಗಿ ಈ ಶಾಲೆಗೆ ಬರುವ ಇಲ್ಲಿನ ಮಕ್ಕಳು ಶಿಥಿಲ ಕೊಠಡಿಗಳು, ಒಡೆದಿರುವ ಹೆಂಚುಗಳು, ಸೋರುವ ಚಾವಣಿ, ಪಾಚಿಗಟ್ಟಿದ ಗೋಡೆಗಳು, ಕಿತ್ತು ಬಂದಿರುವ ನೆಲದಲ್ಲೇ ಕುಳಿತು, ನಿತ್ಯ ಭಯದಲ್ಲೇ ಪಾಠ ಕೇಳಬೇಕು. ಶಿಕ್ಷಕರು ಸಹ ಆತಂಕದಲ್ಲೇ ಶಾಲೆಗೆ ಬಂದು, ಮಕ್ಕಳಿಗೆ ಜ್ಞಾನ ಧಾರೆಯೆರೆಯಬೇಕು.

ತಾಲ್ಲೂಕಿನ ತೋಕಸಂದ್ರ ಗ್ರಾಮದಲ್ಲಿರುವ ಸುಮಾರು 81 ವರ್ಷಗಳಷ್ಟು ಹಳೆಯದಾಗಿರುವ, ಶಿಥಿಲಾವಸ್ಥೆ ತಲುಪಿರುವ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ದುಃಸ್ಥಿತಿ ಇದು. 1943ರಲ್ಲಿ ಶುರುವಾದ ಶಾಲೆಯು ನೂರಾರು ವಿದ್ಯಾರ್ಥಿಗಳ ಬದುಕು ರೂಪಿಸಿದೆ. ಆದರೆ, ಶಾಲಾ ಕಟ್ಟಡದ ಭವಿಷ್ಯ ಮಾತ್ರ ಶೋಚನಿಯವಾಗಿದೆ.

60 ವರ್ಷದ ಹಿಂದಿನ ಕಟ್ಟಡ: ಸುಮಾರು 60 ವರ್ಷಗಳ ಹಿಂದೆ ನಿರ್ಮಾಣವಾಗಿರುವ ಕಟ್ಟಡ ಇದುವರೆಗೆ ಸರಿಯಾಗಿ ದುರಸ್ತಿ ಕಂಡಿಲ್ಲ. ಹೀಗಾಗಿ, ವರ್ಷದಿಂದ ವರ್ಷಕ್ಕೆ ಶಾಲಾ ಕಟ್ಟಡವು ತನ್ನ ಸುಸ್ಥಿರತೆ ಕಳೆದುಕೊಂಡಿದೆ. ಇತ್ತ ದುರಸ್ತಿಯೂ ಇಲ್ಲದೆ, ಅತ್ತ ಹೊಸ ಕಟ್ಟಡದ ನಿರೀಕ್ಷೆಯೂ ಹುಸಿಯಾಗುತ್ತಲೇ ಬಂದಿದೆ.

‘ಶಾಲೆಯಲ್ಲಿ ಒಂದರಿಂದ 7ನೇ ತರಗತಿವರೆಗೆ ಸುಮಾರು 110 ಮಕ್ಕಳಿದ್ದಾರೆ. ಶಾಲೆಯಲ್ಲಿ  ಒಟ್ಟು 8 ಕೊಠಡಿಗಳಿವೆ. ಆ ಪೈಕಿ 3 ಕೊಠಡಿಗಳು ಸ್ವಲ್ಪಮಟ್ಟಿಗೆ ಸುಸ್ಥಿತಿಯಲ್ಲಿದ್ದು, ಉಳಿದ 5 ಕೊಠಡಿಗಳು ಸಂಪೂರ್ಣ ಶಿಥಿಲವಾಗಿವೆ’ ಎಂದು ಶಾಲೆಯವರು ಕಟ್ಟಡದ ದುಃಸ್ಥಿತಿಯನ್ನು ‘ಪ್ರಜಾವಾಣಿ’ಯೊಂದಿಗೆ ಹಂಚಿಕೊಂಡರು.

ಶೋಚನೀಯ ಪರಿಸ್ಥಿತಿ: ‘ಕೊಠಡಿಗಳ ಬಾಗಿಲು ಮುರಿದಿವೆ. ಕಿಟಕಿಯ ಬೋಲ್ಟ್‌ಗಳು ಮುರಿದಿದ್ದು, ಕೊಂಡಿ ಕಳಚಿದೆ. ಬೇಸಿಗೆಯಲ್ಲಿ ಬಿಸಿಲು ಸೂಸುವ ಒಡೆದ ಹೆಂಚಿನ ಕಿಂಡಿಗಳಿಂದ ಮಳೆಗಾಲದಲ್ಲಿ ನೀರು ಸೋರುತ್ತದೆ. ಜೋರು ಗಾಳಿ–ಮಳೆ ಬಂದಾಗಲೆಲ್ಲಾ ಹೆಂಚುಗಳು ಸರ್ರನೆ ಜಾರಿ ಬೀಳುತ್ತವೆ. ಮಳೆ ಬಂದರೆ, ಶಾಲೆಯ ಸ್ಥಿತಿ ನರಕವೆನಿಸುತ್ತದೆ’ ಎಂದು ಬೇಸರ ತೋಡಿಕೊಂಡರು.

ಈಗಿರುವ ಕಟ್ಟಡವನ್ನು ನೆಲಸಮಗೊಳಿಸಿ ಹೊಸ ಕಟ್ಟಡ ಕಟ್ಟುವಂತೆ ಹಲವು ವರ್ಷಗಳಿಂದ ಶಾಲಾ ಶಿಕ್ಷಕರು ಬೇಡಿಕೆ ಇಡುತ್ತಾ, ಮನವಿ ಸಲ್ಲಿಸುತ್ತಲೇ ಬಂದಿದ್ದಾರೆ. ಆದರೆ, ಇದುವರೆಗೂ ನೂತನ ಕಟ್ಟಡ ನಿರ್ಮಾಣಕ್ಕೆ ಕಾಲ ಕೂಡಿ ಬಂದಿಲ್ಲ. ಬಡವರಿಗೆ ಅಕ್ಷರ ಜ್ಞಾನ ನೀಡುವ ಇಂತಹ ಹಳ್ಳಿ ಸರ್ಕಾರಿ ಶಾಲೆಯ ಬಗ್ಗೆ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳಿಗೆ ಕಳಕಳಿ ಇಲ್ಲವಾಗಿದೆ.