ರಾಮನಗರ: ಇನ್ನೂ ಸ್ವಚ್ಛತೆ ಕಾಣದ ರಾಜಕಾಲುವೆ, ಚರಂಡಿ

ರಾಮನಗರ: ಮಳೆಗಾಲಕ್ಕೆ ಮುಂಚೆ ನಗರದ ರಾಜಕಾಲುವೆ ಹಾಗೂ ಚರಂಡಿಗಳನ್ನು ಸ್ವಚ್ಛಗೊಳಿಸಿ ಮಳೆಯಿಂದ ಸಂಭವಿಸಬಹುದಾದ ಅನಾಹುತಗಳನ್ನು ತಪ್ಪಿಸುವುದು ಸ್ಥಳೀಯ ಆಡಳಿತ ಸಂಸ್ಥೆಗಳ ಕರ್ತವ್ಯ. ಆದರೆ, ರಾಮನಗರ ನಗರಸಭೆ ಕರ್ತವ್ಯ ಮೈ ಮರೆತು ಕುಳಿತಿದೆ. ಮುಂಗಾರು ಮಳೆ ಶುರುವಾಗಿ ದಿನಗಳು ಉರುಳಿದರೂ ನಗರದ ರಾಜಕಾಲುವೆ ಹಾಗೂ ಚರಂಡಿಗಳು ಇದುವರೆಗೆ ಸ್ವಚ್ಛತೆ ಕಂಡಿಲ್ಲ.

ಜಿಲ್ಲೆಯಲ್ಲಿ ಡೆಂಗಿ ಪ್ರಕರಣಗಳು ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದ್ದು, ಮಾರಕ ರೋಗಕ್ಕೆ ಕೆಲ ದಿನಗಳ ಹಿಂದೆಯಷ್ಟೇ ಯುವತಿಯೊಬ್ಬರು ಬಲಿಯಾಗಿದ್ದಾರೆ. ನಗರದಲ್ಲಿ ಡೆಂಗಿ ಸೇರಿದಂತೆ ವೈರಾಣು ಜ್ವರದ ಕಾರಣಕ್ಕಾಗಿ ಆಸ್ಪತ್ರೆಗೆ ದಾಖಲಾಗುತ್ತಿರುವವರ ಸಂಖ್ಯೆಯೂ ಹೆಚ್ಚುತ್ತಿದೆ. ಇಷ್ಟಾದರೂ, ಸಾಂಕ್ರಾಮಿಕ ರೋಗಗಳ ಉಲ್ಭಣಕ್ಕೆ ಕಾರಣವಾಗುವ ರಾಜಕಾಲುವೆ ಮತ್ತು ಚರಂಡಿಗಳ ಸ್ವಚ್ಛತೆಯನ್ನು ನಗರಸಭೆ ಕೈಗೊಂಡಿಲ್ಲ.

ಆಳೆತ್ತರದ ಗಿಡಗಂಟಿ: ಆಳೆತ್ತರಕ್ಕೆ ಬೆಳೆದಿರುವ ಗಿಡಗಂಟಿ ಹಾಗೂ ಹುಲ್ಲು ರಾಜಕಾಲುವೆಯನ್ನು ಆವರಿಸಿಕೊಂಡಿದೆ. ಕಾಲುವೆಗೆ ಸಂಪರ್ಕ ಕಲ್ಪಿಸುವ ಚರಂಡಿಗಳಲ್ಲಿ ಹೂಳು ತುಂಬಿಕೊಂಡು, ಅಲ್ಲಲ್ಲಿ ಕೊಳಚೆ ನಿಂತು ಗಬ್ಬೆದ್ದು ನಾರುತ್ತಿದೆ. ಕಾಲುವೆ ಮತ್ತು ಚರಂಡಿಗಳು ಸಾಂಕ್ರಾಮಿಕ ರೋಗಗಳನ್ನು ಹರಡುವ ಸೊಳ್ಳೆಗಳ ಉತ್ಪತ್ತಿಯ ತಾಣವಾಗಿವೆ. ಬೀಡಾಡಿ ಹಂದಿಗಳು ಬಿದ್ದು ಒದ್ದಾಡುವ ಈ ಜಾಗಗಳಲ್ಲಿ ಜನ ಮೂಗು ಹಿಡಿದುಕೊಂಡು ಓಡಾಡಬೇಕಾದ ಸ್ಥಿತಿ ಇದೆ.

‘ಟಿಪ್ಪುನಗರ, ಟ್ರೂಪ್‌ಲೈನ್, ಹುಣಸನಹಳ್ಳಿ ರಸ್ತೆ, ಐಜೂರು, ವಿವೇಕಾನಂದನಗರ, ರಾಯರದೊಡ್ಡಿ, ಬಾಲಗೇರಿ, ಕೆಂಪೇಗೌಡ ವೃತ್ತ, ಮಾಗಡಿ ರಸ್ತೆ, ಅರ್ಕಾವತಿ ಬಡಾವಣೆ, ವಿನಾಯಕನಗರ, ಗಾಂಧಿನಗರ, ಶೆಟ್ಟಿಹಳ್ಳಿ ಬೀದಿ, ಕೊತ್ತಿಪುರ ಸೇರಿದಂತೆ ನಗರದ ಯಾವುದೇ ಬಡಾವಣೆಗೆ ಹೋದರೂ ಅಲ್ಲಿರುವ ರಾಜಕಾಲುವೆ ಮತ್ತು ಚರಂಡಿಗಳು ಸೊಳ್ಳೆಗಳ ಸಂತಾನಕ್ಕೆ ರಕ್ಷೆಯಾಗಿವೆ’ ಎಂದು ಸ್ಥಳೀಯ ನಿವಾಸಿ ಶ್ರೀಧರ್ ಹೇಳಿದರು.

ಅರ್ಕಾವತಿ ಒಡಲಿಗೆ ಕಲುಷಿತ: ನಗರದ ಹೃದಯಭಾಗದಲ್ಲಿ ಹರಿಯುವ ಅರ್ಕಾವತಿ ನದಿಯು ನಗರದ ಕೊಳಚೆ ಬಂದು ಸೇರುವ ಕಡೆಯ ತಾಣವಾಗಿದೆ. ಜನವಸತಿ ಪ್ರದೇಶಗಳಿಗೆ ಹೊಂದಿಕೊಂಡಂತೆ ಹರಿಯುವ ನದಿಯ ಒಡಲಿನಿಂದಿಡಿದು ದಡದವರೆಗೆ ಕಳೆಗಳು ಆವರಿಸಿಕೊಂಡಿವೆ. ವರ್ಷವಾದರೂ ಸ್ವಚ್ಛತೆ ಕಾಣದಿರುವುದರಿಂದ ನಗರದುದ್ದಕ್ಕೂ ನದಿ ದಡವು ಕುರುಚಲು ಕಾಡಿನಂತೆ ಭಾಸವಾಗುತ್ತದೆ.

‘ವಿವಿಧ ಬಡಾವಣೆಗಳ ಶೌಚಾಲಯದ ನೀರು ವರ್ಷಗಳಿಂದ ನೇರವಾಗಿ ನದಿಯನ್ನು ಸೇರುತ್ತಿದೆ. ಕೆಲವೆಡೆ ಜನರು ಸಹ ವಿವಿಧ ರೀತಿಯ ತ್ಯಾಜ್ಯವನ್ನು ನದಿಗೆ ಎಸೆಯುವುದು ಸಾಮಾನ್ಯವಾಗಿದೆ. ಗಬ್ಬೆದ್ದು ನಾರುತ್ತಿರುವ ನದಿಗೆ ಇಳಿಯಲಾಗದ ಸ್ಥಿತಿ ಇದೆ. ಜೊತೆಗೆ ಹೂಳು ತುಂಬಿಕೊಂಡಿದೆ. ನದಿಗೆ ಶೌಚ ನೀರು ಸೇರದಂತೆ ಎಚ್ಚರಿಕೆ ವಹಿಸಬೇಕಿದೆ’ ಎಂದು ನಗರಸಭೆಯ ಮಾಜಿ ಸದಸ್ಯೆ ಕಮಲಮ್ಮ ಹೇಳಿದರು.

ನೆಪಕ್ಕಷ್ಟೇ ಕಾರ್ಯಪಡೆ: ‘ಮಳೆಗಾಲ ನಿರ್ವಹಣೆಗೆ ಸಂಬಂಧಿಸಿದಂತೆ ಮೇ ತಿಂಗಳಲ್ಲೇ ಹಿಂದಿನ ಜಿಲ್ಲಾಧಿಕಾರಿ ಸಭೆ ನಡೆಸಿದ್ದಾರೆ. ಸ್ವಚ್ಛತೆ, ಪ್ರವಾಹ ಸ್ಥಿತಿ ನಿರ್ವಹಣೆ ಸೇರಿದಂತೆ ಮಳೆಗಾಲದಲ್ಲಿ ಎದುರಾಗಬಹುದಾದ ಸಮಸ್ಯೆಗಳಿಗೆ ತ್ವರಿತವಾಗಿ ಸ್ಪಂದಿಸಲು ಕಾರ್ಯಪಡೆ ರಚಿಸುವಂತೆ ಸೂಚನೆ ನೀಡಿದ್ದರು. ಆದರೆ, ಅಂತಹ ಯಾವುದೇ ಕೆಲಸ ರಾಮನಗರ ನಗರಸಭೆಯಲ್ಲಿ ನಡೆದಿಲ್ಲ’ ಎಂದು

‘ಎರಡು ತಿಂಗಳಿಂದ ನಗರಸಭೆಗೆ ಅಧ್ಯಕ್ಷರು ಮತ್ತು ಉಪಾಧ್ಯಕ್ಷರಿಲ್ಲ. ಅವರಿದ್ದಿದ್ದರೆ ಇಷ್ಟೊತ್ತಿಗಾಗಲೇ ಒಂದು ಸಭೆಯನ್ನಾದರೂ ಮಾಡುತ್ತಿದ್ದರು. ಸದ್ಯ ಇರುವ ಸದಸ್ಯರು ತಲೆ ಕೆಡಿಸಿಕೊಳ್ಳುವುದಿಲ್ಲ. ಹಾಗಾಗಿ, ಅಧಿಕಾರಿಗಳು ಸಹ ತಮಗಿಷ್ಟ ಬಂದಂತೆ ಆಡಳಿತ ನಡೆಸಿಕೊಂಡು ಹೋಗುತ್ತಿದ್ದಾರೆ. ಹೇಳುವವರು ಮತ್ತು ಕೇಳುವವರೇ ಇಲ್ಲವಾಗಿದೆ’ ಎಂದು ಸ್ಥಳೀಯ ಮುಖಂಡ ಸಮದ್ ಬೇಸರ ವ್ಯಕ್ತಪಡಿಸಿದರು.

ಸ್ವಚ್ಛತಾ ಕಾರ್ಯಗಳ ಕುರಿತು ಮಾಹಿತಿ ಪಡೆಯಲು ನಗರಸಭೆಯ ಪರಿಸರ ಎಂಜಿನಿಯರ್ ಸುಬ್ರಮಣ್ಯ ಅವರಿಗೆ ‘ಪ್ರಜಾವಾಣಿ’ ಕರೆ ಮಾಡಿದಾಗ ಸ್ವೀಕರಿಸಲಿಲ್ಲ.