ಮಾಗಡಿ | ಮಳೆಗಾಲದಲ್ಲಿ ಈಜುಕೊಳ ಆಗುವ ಶಾಲೆ: ಸೋರುವ ಹೆಂಚುಗಳ ಕೆಳಗೆ ಮಕ್ಕಳಿಗೆ ಪಾಠ

ಮಾಗಡಿ: ಹೊಡೆದಿರುವ ಹೆಂಚು, ಮಳೆ ಬಂದರೆ ಕೊಠಡಿ ಒಳಗೆ ಸೋರುವ ನೀರು, ಕುಸಿದಿರುವ ಗೋಡೆ, ಕಿತ್ತು ಹೋಗಿರುವ ನೆಲ... ಇದು ತಾಲ್ಲೂಕಿನ ಕರಲಮಂಗಲ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಸ್ಥಿತಿಯಾಗಿದೆ.

ಮಾಗಡಿ - ರಾಮನಗರ ಮುಖ್ಯ ರಸ್ತೆಯಲ್ಲಿರುವ ಶಾಲೆಯಲ್ಲಿ 1 ರಿಂದ 7ನೇ ತರಗತಿವರೆಗೆ 42 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ. ಶಾಲೆಯಲ್ಲಿ ಐದು ಕೊಠಡಿಗಳಿದ್ದು, ಎರಡು ಕಡೆ ಶಾಲೆ ನಡೆಯುತ್ತಿದೆ. ಒಂದು ಕಡೆ ಕಟ್ಟಡದ ಕಿಟಕಿ, ಬಾಗಿಲು ಮುರಿದು ಹೋಗಿರುವ ಜತೆಗೆ ನೆಲವೂ ಕಿತ್ತು ಹೋಗಿದ್ದು, ಮಳೆಗಾಲದಲ್ಲಿ ಶಾಲೆಯಲ್ಲಿ ನೀರು ತುಂಬಿಕೊಂಡಿರುತ್ತದೆ. ಇದರಿಂದ ಶಾಲಾ ಮಕ್ಕಳಿಗೆ ಪಾಠ ಕೇಳಲು ತೊಂದರೆಯಾಗುತ್ತಿದೆ.

ಮತ್ತೊಂದು ಕಡೆ ಕೋತಿಗಳ ಕಾಟ ಹೆಚ್ಚಾಗಿದ್ದು, ಹೆಂಚುಗಳು ಹೊಡೆದು ಹೋಗಿ ಮಳೆ ಬಂದರೆ ಕಟ್ಟಡ ಸೋರುತ್ತದೆ. ಈ ಬಗ್ಗೆ ಶಿಕ್ಷಣ ಇಲಾಖೆಯವರಿಗೆ ಮಾಹಿತಿ ನೀಡಲಾಗಿದ್ದು, ಅನುದಾನ ಬಂದ ಕೂಡಲೇ ಹೆಂಚನ್ನು ತೆಗೆದು ಶೀಟ್ ಹಾಕಿಸುವುದಾಗಿ ಭರವಸೆ ನೀಡಿದ್ದಾರೆ ಎಂದು ಮುಖ್ಯ ಶಿಕ್ಷಕ ನರಸಯ್ಯ ತಿಳಿಸಿದರು.

ಶಾಲೆಯಲ್ಲಿದ್ದ ಹಳೆಯ ಕಟ್ಟಡ ಬಿದ್ದು ಹೋಗಿದೆ. ಕಳೆದ ವರ್ಷ ಒಂದು ಭಾಗದ ಶಾಲಾ ಕಟ್ಟಡದ ಚಾವಣಿ ರಿಪೇರಿ ಮಾಡಿಸಲಾಗಿದ್ದು, ಕಿಟಕಿ, ಬಾಗಿಲುಗಳ ರಿಪೇರಿಯಾಗಿಲ್ಲ. ಇದರಿಂದ 5, 6ನೇ ತರಗತಿ ಮಕ್ಕಳಿಗೆ ಸಮಸ್ಯೆಯಾಗುತ್ತಿದೆ.

ಶಾಲಾ ಆವರಣದಲ್ಲಿ ಶಿಥಿಲ ದೇವಾಸ್ಥಾನ ಕಟ್ಟಡವಿದ್ದು, ಆತಂಕ ಪಡುವಂತಾಗಿದೆ. ಇದನ್ನು ತೆರವುಗೊಳಿಸಿ ಮಕ್ಕಳಿಗೆ ಅನುಕೂಲ ಮಾಡಿಕೊಡಬೇಕೆಂದು ಪಂಚಾಯಿತಿಯವರಿಗೆ ಶಾಲಾ ಆಡಳಿತ ಮನವಿ ಮಾಡಿದೆ.