ಜೂಜು ಅಡ್ಡೆ ಮೇಲೆ ಪೊಲೀಸರ ದಾಳಿ

ಕುದೂರು: ಜೂಜು ಅಡ್ಡೆ ಮೇಲೆ ಕುದೂರು ಪೊಲೀಸರು ದಾಳಿ ನಡೆಸಿ ಇಬ್ಬರು ಜೂಜುಕೋರರನ್ನು ಬಂಧಿಸಿ, ನಗದನ್ನು ವಶಪಡಿಸಿಕೊಂಡಿದ್ದಾರೆ. ಕಾರ್ಯಾಚರಣೆಯಲ್ಲಿ ನಾಲ್ವರು ಜೂಜುಕೋರರು ಪರಾರಿಯಾಗಿದ್ದಾರೆ.

ಕುಣಿಗಲ್ ತಾಲ್ಲೂಕಿನ ಕೆಂಪಸಾಗರದ ಲೋಕೇಶ್, ಮುತ್ತಸಾಗರದ ಅಬೀಬ್ ಉಲ್ಲಾರ ಬಂಧಿತರು. ಇವರಿಂದ ₹5,200 ಹಣ ಮತ್ತು ಮೂರು ಬೈಕ್ ವಶಪಡಿಸಿಕೊಳ್ಳಲಾಗಿದೆ.

ತಿಪ್ಪಸಂದ್ರ ಹೋಬಳಿಯ ಸಂಕೀಘಟ್ಟ ಗ್ರಾಮದ ಅಡಿಕೆ ತೋಟದ ಬಳಿ 5-6 ಮಂದಿ ಜೂಜು ಆಡುತ್ತಿದ್ದಾರೆ ಎಂಬ ಮಾಹಿತಿ ಮೇರೆಗೆ ಕುದೂರು ಪೊಲೀಸ್ ಠಾಣೆಯ ಸಬ್ ಇನ್‌ಸ್ಪೆಕ್ಟರ್‌ ಶ್ರೀನಿವಾಸ್ ಮತ್ತು ತಂಡದವರು ದಾಳಿ ನಡೆಸಿತು.

ದಾಳಿಯ ವೇಳೆ ಕುಣಿಗಲ್ ತಾಲ್ಲೂಕಿನ ಶೆಟ್ಟಿಗೆರೆಯ ಶಂಕರೇಗೌಡ, ಕಾರ್ತಿಕ್, ಬಾಗೇನಹಳ್ಳಿಯ ಪ್ರದೀಪ್, ತಿಪ್ಪಸಂದ್ರದ ಚಿಗಳೂರು ಗ್ರಾಮದ ಕುಮಾರ್ ತಪ್ಪಿಸಿಕೊಂಡಿದ್ದಾರೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.