ಬಿಡದಿ: ಕ್ಯಾಮೆರಾ ಮುಂದೆಯೇ ಕಸದ ರಾಶಿ

ಬಿಡದಿ: ಪಟ್ಟಣದ ಹಲವು ಕಡೆ ಕಸದ ಬ್ಲಾಕ್ ಸ್ಪಾಟ್‌ಗಳಾಗಿರುವ ರಸ್ತೆಬದಿ, ಖಾಲಿ ನಿವೇಶನ, ಮುಖ್ಯ ರಸ್ತೆ, ಸಾರ್ವಜನಿಕ ಸ್ಥಳಗಳನ್ನು ಗುರುತಿಸಿ ಪುರಸಭೆ ಹಾಗೂ ಖಾಸಗಿ ಕಂಪನಿಗಳ ಸಹಭಾಗಿತ್ವದಲ್ಲಿ ಪಟ್ಟಣದ ಹಲವು ಕಡೆ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದರೂ, ಕ್ಯಾಮೆರಾ ಮುಂದೆಯೇ ಜನ ಕಸ ಸುರಿದು ಹೋಗುತ್ತಿದ್ದಾರೆ.

ಬ್ಲಾಕ್ ಸ್ಪಾಟ್‌ಗಳಾಗಿರುವ ಸ್ಥಳಗಳಲ್ಲಿಯೇ ಮತ್ತೆ ಮತ್ತೆ ಕಸದ ರಾಶಿಗಳು ಬೀಳುತ್ತಿವೆ. ಗಾಂಧಿ ಜಯಂತಿಯ ಅಂಗವಾಗಿ ಸ್ವಚ್ಛವಾಗಿದ್ದ ರಸ್ತೆಗಳು ಮತ್ತೆ ಕಸ ತುಂಬಿಕೊಂಡು ತುಳುಕಾಡುತ್ತಿವೆ. 

ಸಾರ್ವಜನಿಕರು ಪುರಸಭೆ ಅಳವಡಿಸಿರುವ ಸಿಸಿಟಿವಿ ಕ್ಯಾಮೆರಾಗಳನ್ನು ಗಂಭೀರವಾಗಿ ತೆಗೆದುಕೊಂಡಂತೆ ಕಾಣುತ್ತಿಲ್ಲ. ಕ್ಯಾಮೆರಾ ಇದ್ದರೂ, ಅವುಗಳ ಮುಂದೆಯೇ ಕಸ ಸುರಿದು ಹೋಗುತ್ತಾರೆ. ಇದು ಪುರಸಭೆಗೂ ತಲೆನೋವಾಗಿ ಪರಿಣಮಿಸಿದೆ. ಸಿಸಿಟಿವಿ ಕ್ಯಾಮೆರಾಗಳನ್ನು ಪ್ರತಿನಿತ್ಯ ಪರಿಶೀಲಿಸಿ, ನಂತರ ಕ್ಯಾಮರಾದಲ್ಲಿ ಕಸ ಹಾಕಿದವರನ್ನು ಗುರುತಿಸಿ, ಪತ್ತೆಹಚ್ಚುವುದು ಅಷ್ಟು ಸುಲಭವಾಗಿಲ್ಲ. ಅಲ್ಲದೇ, ಅಳವಡಿಸಿರುವ ಕೆಲವು ಕ್ಯಾಮೆರಾಗಳೂ ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ.

ರಸ್ತೆ ಬದಿಯಲ್ಲಿ ಕಸ ಸುರಿಯುವವರನ್ನು ಪತ್ತೆ ಹಚ್ಚಿ ದಂಡ ಹಾಕುವ ಕಾರ್ಯ ನಿಡೆದೇ ಇದೆ. ಆದರೂ ಜನರು ಎಚ್ಚೆತ್ತುಕೊಳ್ಳುತ್ತಿಲ್ಲ. ಮನೆಮನೆಯಿಂದ ಕಸ ಸಂಗ್ರಹಿಸಲು ವ್ಯವಸ್ಥೆ ಮಾಡಿದರೂ ಕೂಡ ಬೀದಿ ಬದಿ ಕಸ ಸುರಿಯುವುದು ನಿಲ್ಲುತ್ತಿಲ್ಲ ಎನ್ನುತ್ತಾರೆ ಪುರಸಭೆ ಅಧಿಕಾರಿಗಳು.